NATO એ સાથના આપતા નિરાશ થયેલા ટ્રમ્પ ભડક્યા ! હોર્મુઝની સુરક્ષા તમે પોતે કરો, અમે નહીં આવીએ!
અમેરિકી રાષ્ટ્રપતિ ડોનાલ્ડ ટ્રમ્પે વિશ્વના સૌથી મહત્વના દરિયાઈ માર્ગ 'હોર્મુઝની ખાડી' (Strait of Hormuz) ની સુરક્ષા બાબતે મોટું નિવેદન આપીને પલ્લું ઝાડી દીધું છે. એક દિવસ પહેલા જ ઈરાનના પાવર પ્લાન્ટ્સ તોડી પાડવાની ધમકી આપનાર ટ્રમ્પે હવે સાફ કહી દીધું છે કે....
વિશ્વના રાજકારણમાં અત્યારે ભારે ગરમાવો જોવા મળી રહ્યો છે. અમેરિકી રાષ્ટ્રપતિ ડોનાલ્ડ ટ્રમ્પે હોર્મુઝની ખાડીને સુરક્ષિત રાખવાના પોતાના વાદાઓમાંથી પીછેહઠ કરી છે. ટ્રમ્પનું માનવું છે કે અમેરિકા આ રસ્તાનો ઉપયોગ કરતું નથી, તો પછી અમેરિકી સેના ત્યાં કેમ તૈનાત રહે?
ટ્રમ્પની સોશિયલ મીડિયા પર ‘ધડાકાભેર’ પોસ્ટ
ટ્રમ્પે ‘ટ્રુથ સોશિયલ’ પર લખ્યું કે, “હોર્મુઝની સુરક્ષાની જવાબદારી એ દેશોની છે જે તેનો ઉપયોગ કરે છે. યુનાઇટેડ સ્ટેટ્સ આ માર્ગનો ઉપયોગ નથી કરતું! જો અન્ય દેશો મદદ માંગશે તો અમે વિચારીશું, પરંતુ ઈરાનનો ખતરો ખતમ થયા પછી અમારી જરૂર રહેવી જોઈએ નહીં.” આ નિવેદન એવા સમયે આવ્યું છે જ્યારે 28 ફેબ્રુઆરીએ ઈરાન પર થયેલા હુમલા બાદ આ માર્ગ જોખમી બન્યો છે.
48 કલાકનું અલ્ટીમેટમ અને યુ-ટર્ન
રસપ્રદ વાત એ છે કે, હજુ 22 માર્ચે જ ટ્રમ્પે ઈરાનને 48 કલાકનું અલ્ટીમેટમ આપ્યું હતું કે જો આ રસ્તો ખોલવામાં નહીં આવે તો અમેરિકા ઈરાનના પાવર ગ્રીડને ‘માટીમાં મેળવી દેશે’. પરંતુ હવે અચાનક અમેરિકાએ આ મામલે પલ્લું ઝાડી દેતા પશ્ચિમી દેશોમાં ભારે ચિંતા પ્રસરી ગઈ છે. ટ્રમ્પે સંકેત આપ્યો છે કે તેઓ મધ્ય-પૂર્વમાં અમેરિકી સૈન્ય હસ્તક્ષેપ ઓછો કરવા માંગે છે.
ભારત માટે કેમ ચિંતાનો વિષય?
હોર્મુઝની ખાડી ભારત માટે લાઈફલાઈન સમાન છે:
- કાચું તેલ: ભારતની જરૂરિયાતનું 40% ક્રૂડ ઓઈલ આ રસ્તેથી આવે છે.
- LNG ગેસ: ભારતનો 54% ગેસ (LNG) સપ્લાય આ માર્ગ પર નિર્ભર છે.
જો આ રસ્તો બંધ રહે અથવા સુરક્ષા ન મળે, તો ભારતમાં પેટ્રોલ-ડીઝલ અને એલપીજી ગેસની ભારે તંગી સર્જાઈ શકે છે. અત્યારે પણ ઘણા રાજ્યોમાં ગેસ સંકટની શરૂઆત થઈ ચૂકી છે.
ટ્રમ્પના આ વલણથી હવે ભારત જેવા દેશોએ પોતાની ઉર્જા સુરક્ષા માટે જાતે જ મેદાનમાં ઉતરવું પડે તેવી સ્થિતિ સર્જાઈ છે. જો અમેરિકા મદદ નહીં કરે, તો વૈશ્વિક તેલ બજારમાં ભયાનક તેજી આવી શકે છે.
