Breaking News : 250 વર્ષના ઇતિહાસમાં પહેલીવાર… હવે પાસપોર્ટ પર ચમકશે ડોનાલ્ડ ટ્રમ્પનો ફોટો અને ગોલ્ડન સિગ્નેચર
અમેરિકા પોતાની આઝાદીના 250 વર્ષની ઉજવણી નિમિત્તે એક ખાસ પાસપોર્ટ લોન્ચ કરવા જઈ રહ્યું છે. આ નવા પાસપોર્ટની સૌથી મોટી ખાસિયત એ છે કે, તેના પર રાષ્ટ્રપતિ ડોનાલ્ડ ટ્રમ્પની તસવીર અને તેમની ગોલ્ડન સિગ્નેચર હશે.
અમેરિકામાં પાસપોર્ટને લઈને એક મોટો ફેરફાર થવા જઈ રહ્યો છે. વિદેશ વિભાગે મંગળવારે જણાવ્યું હતું કે, તેઓ ‘United States Declaration of Independence’ ના 250 વર્ષ પૂર્ણ થવાના અવસરે ખાસ અમેરિકન પાસપોર્ટ બહાર પાડવાની તૈયારી કરી રહ્યા છે. આ પાસપોર્ટ પર રાષ્ટ્રપતિ ડોનાલ્ડ ટ્રમ્પની તસવીર હશે.
કયા નાગરિકોને મળશે આ ‘પાસપોર્ટ’?
અમેરિકી વિદેશ વિભાગના જણાવ્યા અનુસાર, આ વિચાર પર મહિનાઓથી ચર્ચા ચાલી રહી હતી અને તાજેતરમાં જ તેને સેનેટ દ્વારા મંજૂરી આપવામાં આવી છે. યોજના મુજબ, વોશિંગ્ટન ડીસીની પાસપોર્ટ ઓફિસમાં લગભગ 25,000 થી 30,000 પાસપોર્ટ તૈયાર કરવામાં આવશે. જો કે, આ પાસપોર્ટ તમામ નાગરિકો માટે ઉપલબ્ધ રહેશે નહીં, ફક્ત મર્યાદિત લોકોને જ આપવામાં આવશે. આ નવા પાસપોર્ટ 4 જુલાઈના થોડા સમય પહેલા વોશિંગ્ટન, ડી.સી. સ્થિત પાસપોર્ટ ઓફિસમાં અરજદારો માટે ઉપલબ્ધ થશે.
નવા પાસપોર્ટની ડિઝાઈન
આ નવા પાસપોર્ટની ડિઝાઈન હાલના પાસપોર્ટ કરતા અલગ અને ખાસ હશે. અંદરના એક પેજ પર ડોનાલ્ડ ટ્રમ્પનો ફોટો હશે, જેની ઉપર તેમની સહીની ગોલ્ડન સ્ટેમ્પ પણ લગાવવામાં આવશે. આ સાથે પાસપોર્ટમાં આધુનિક સિક્યોરિટી ફીચર્સનો સમાવેશ કરવામાં આવશે, જેથી તે સંપૂર્ણપણે સુરક્ષિત અને માન્ય રહેશે.
પાસપોર્ટના કવરમાં પણ ફેરફાર કરવામાં આવ્યા છે. હવે કવર પર મોટા સોનેરી અક્ષરોમાં ‘United States of America’ લખેલું હશે. તેની નીચે પાછળના ભાગમાં એક નાનો ગોલ્ડન અમેરિકન ધ્વજ બનેલો હશે, જેના પર 250 અંકિત હશે, જે 250મી વર્ષગાંઠનું પ્રતિક હશે.
આ ઉપરાંત પાસપોર્ટના કેટલાક પાના પર ઐતિહાસિક તસવીરો પણ ઉમેરવામાં આવશે. આમાં માઉન્ટ રશમોરની તસવીર હશે, જેમાં જ્યોર્જ વોશિંગ્ટન, થોમસ જેફરસન, થિયોડોર રૂઝવેલ્ટ અને અબ્રાહમ લિંકનની મૂર્તિઓ દેખાય છે. હાલના પાસપોર્ટમાં પહેલેથી જ સ્ટેચ્યુ ઓફ લિબર્ટી, લિબર્ટી બેલ અને ઇન્ડિપેન્ડન્સ હોલ જેવી ઐતિહાસિક જગ્યાઓની તસવીરો છે.
