Breaking News: ગ્રિન કાર્ડને લઈ ટ્રમ્પ સરકારનો મોટો નિર્ણય, ભારતીયોને અમેરિકા જવુ થશે વધુ મુશ્કેલ, જાણો ડિટેલ્સ
અમેરિકાના ટ્રમ્પ પ્રશાસને ગ્રીન કાર્ડ અને નાગરિકતા અરજી પ્રક્રિયાને વધુ મોંઘી બનાવતો નવો પ્રસ્તાવ રજૂ કર્યો છે. અમેરિકામાં વસતા લાખો કાયમી નિવાસીઓ તેમજ ભારતીયો પર સીધી અસર પડી શકે છે. નવા નિયમને અમલમાં મૂકતા પહેલાં 60 દિવસની જાહેર ટિપ્પણી પ્રક્રિયા હાથ ધરાશે.
અમેરિકામાં ડોનાલ્ડ ટ્રમ્પ બીજી વખત સત્તામાં આવ્યા બાદ ઇમિગ્રન્ટ્સ માટે અનેક નવી મુશ્કેલીઓ ઊભી થઈ રહી છે. ટ્રમ્પ પ્રશાસને એક નવો નિયમ પ્રસ્તાવિત કર્યો છે, જેના કારણે અમેરિકન નાગરિકતા મેળવવા માટે જરૂરી ફોર્મ ભરવાનો ખર્ચ નોંધપાત્ર રીતે વધી જશે. જો આ નિયમ અમલમાં આવશે તો ગ્રીન કાર્ડ મેળવવાની પ્રક્રિયા પણ વધુ મોંઘી બનશે અને તેનો સીધો પ્રભાવ અમેરિકામાં વસતા ભારતીયો પર પડશે.
હોમલેન્ડ સિક્યોરિટી વિભાગ (DHS)ના પ્રસ્તાવિત નિયમ અનુસાર, કાગળ પર ફોર્મ N-400 (નાગરિકતા માટેની અરજી) ભરવાની ફી 760 ડોલરથી વધીને 1,330 ડોલર થશે, એટલે કે અંદાજે 75 ટકાનો વધારો થશે. જ્યારે ઓનલાઇન અરજી માટેની ફી 710 ડોલરથી વધીને 1,280 ડોલર થશે, એટલે કે લગભગ 80 ટકાનો વધારો થશે.
નવા પ્રસ્તાવ પર 60 દિવસની મુદત
જેઓની ઘરેલુ આવક ફેડરલ પાવર્ટી ગાઇડલાઇન્સના 400 ટકા કરતાં ઓછી છે, તેમના માટે નાગરિકતા અરજીની ફી 380 ડોલર જ રહેશે. આ કેટેગરીમાં કોઈ ફેરફારનો પ્રસ્તાવ નથી. DHSના દસ્તાવેજો અનુસાર ઓછી ફીનો વિકલ્પ માત્ર પેપર ફાઇલિંગ માટે જ ઉપલબ્ધ રહેશે. જો કે, નવા નિયમમાં ફોર્મ N-400 માટે મળતી ફી રાહત અને ફી માફીની જોગવાઈને પણ સમાપ્ત કરવાનો પ્રસ્તાવ મૂકવામાં આવ્યો છે.
આ નવો નિયમ ઇમિગ્રેશન એન્ડ નેશનાલિટી એક્ટ અને હોમલેન્ડ સિક્યોરિટી એક્ટ, 2002ની વિવિધ કલમો હેઠળ પ્રસ્તાવિત કરવામાં આવ્યો છે. જો આ નિયમ લાગુ થશે તો અમેરિકામાં રહેતા લાખો કાયદેસર કાયમી નિવાસીઓ પર તેની નોંધપાત્ર અસર પડશે. ગ્રીન કાર્ડ મેળવવાનો ખર્ચ પણ ઘણો વધી શકે છે. જોકે DHSએ સ્પષ્ટ કર્યું છે કે નવો નિયમ તરત અમલમાં નહીં આવે. નિયમને અમલમાં મૂકતા પહેલા ઓછામાં ઓછા 60 દિવસની જાહેર ટિપ્પણી (Public Comment) પ્રક્રિયા પૂર્ણ કરવામાં આવશે.
ભારતીયો માટે તેનો શું અર્થ?
અમેરિકામાં દર વર્ષે ગ્રીન કાર્ડ મેળવનારા ઇમિગ્રન્ટ્સમાં ભારતીયોની સંખ્યા નોંધપાત્ર છે. ભારતના વિદેશ મંત્રાલયના આંકડા મુજબ જાન્યુઆરી 2026 સુધી અમેરિકામાં કુલ 60,79,221 ભારતીયો વસે છે. તેમાંથી:
- 37,67,737 ભારતીય મૂળના લોકો (PIO)
- 23,11,484 અનિવાસી ભારતીયો (NRI)
અમેરિકામાં કેટલા ભારતીયો કાયદેસર કાયમી નિવાસી (ગ્રીન કાર્ડ ધારક) છે તેના ચોક્કસ આંકડા ઉપલબ્ધ નથી, પરંતુ Office of Homeland Security Statisticsના 2024ના આંકડા મુજબ 66,800 ભારતીયોને ગ્રીન કાર્ડ મળ્યા હતા.
ભારતીયોને ગ્રીન કાર્ડ મળવાની સંખ્યામાં ઘટાડો
તાજેતરના H-1B વિઝા વિવાદોને જોતા આ આંકડો મોટો લાગી શકે છે, પરંતુ હકીકતમાં 2022ની સરખામણીએ તેમાં 50 ટકાથી વધુ ઘટાડો થયો છે.
- 2022માં 1,27,010 ભારતીયોને ગ્રીન કાર્ડ મળ્યા
- 2023માં આ સંખ્યા ઘટીને 78,070 રહી
- 2024માં વધુ ઘટીને 66,800 રહી
સંખ્યામાં ઘટાડા છતાં DHS દ્વારા નાગરિકતા અરજી ફીમાં સૂચવાયેલા વધારાનો ભારતીયો પર મોટો પ્રભાવ પડી શકે છે. વધુ ખર્ચને કારણે ઘણા ભારતીયો અમેરિકા ખાતે કાયમી વસવાટ માટેના અન્ય વિકલ્પો પર વિચાર કરી શકે છે.
H-1B વિઝા વિવાદ શું છે?
ગત વર્ષે સપ્ટેમ્બરમાં રાષ્ટ્રપતિ ડોનાલ્ડ ટ્રમ્પે H-1B વિઝા અરજીની ફી સરેરાશ 2,000 ડોલરથી વધારીને 100,000 ડોલર કરી હતી. આ ફી તે નોકરીદાતાઓએ ચૂકવવાની હોય છે, જે અમેરિકામાં કામ કરવા માટે કુશળ વિદેશી કર્મચારીઓને બોલાવવા માંગે છે. H-1B કાર્યક્રમ ખાસ પ્રકારની કુશળતા ધરાવતા કર્મચારીઓને અમેરિકામાં કામ કરવાની તક આપે છે. આ કાર્યક્રમના કારણે હજારો ભારતીયોને અમેરિકામાં રોજગાર મળ્યો છે.
પરંતુ ટ્રમ્પ પ્રશાસનનું માનવું હતું કે H-1B કાર્યક્રમ તેમની “America First” નીતિને નુકસાન પહોંચાડે છે. તેથી આ કાર્યક્રમને મર્યાદિત કરવા માટે તેની ફીમાં મોટો વધારો કરવામાં આવ્યો હતો. હવે ગ્રીન કાર્ડ અને નાગરિકતા પ્રક્રિયાની ફીમાં પ્રસ્તાવિત વધારો અમેરિકામાં વસતા ભારતીયો માટે નવી ચિંતા ઊભી કરી શકે છે.
