Breaking News: યુરોપમાં અનેક ફ્લાઇટ્સને બોમ્બથી ઉડાવી દેવાની ધમકી: રાયનએર અને ફિનએર સહિતના વિમાનોનું ઈમરજન્સી લેન્ડિંગ, રૂટ ડાયવર્ટ કરાયા
યુરોપના હવાઈ ક્ષેત્રમાં બોમ્બની શ્રેણીબદ્ધ ધમકીઓને પગલે ભારે ખળભળાટ મચ્યો છે. ફિનએર અને રાયનએર સહિતની ઘણી ફ્લાઇટ્સને ગુરુવારે તાબડતોબ ડાયવર્ટ કરીને સુરક્ષિત ઈમરજન્સી લેન્ડિંગ કરાવવામાં આવ્યું હતું. એવિએશન સેક્ટરમાં સુરક્ષા એજન્સીઓ હાઈ એલર્ટ પર છે.
અધિકારીઓએ જણાવ્યું હતું કે ગુરુવારે યુરોપભરમાં બોમ્બની ધમકીઓ મળ્યા બાદ રૂટ બદલીને ઘણી ફ્લાઇટ્સનું ઇમરજન્સી લેન્ડિંગ કરવામાં આવ્યું હતું. વિગતો શેર કરતા ફિનએરે જણાવ્યું હતું કે હેલસિંકીથી રોમ જઈ રહેલી ફ્લાઇટ 1761 ને બોમ્બની ધમકી મળી હતી. જોકે, ઇટાલિયન રાજધાનીમાં વિમાન સુરક્ષિત રીતે ઉતર્યા બાદ તપાસ દરમિયાન કોઈ શંકાસ્પદ વસ્તુ મળી ન હતી.
આ ઉપરાંત, બલ્ગેરિયાના સોફિયા જઈ રહેલી ત્રણ રાયનએર ફ્લાઇટ્સે બોમ્બની ધમકીઓ બાદ ઇમરજન્સી લેન્ડિંગ કર્યું હતું.
ઘણી ફ્લાઇટ્સ ડાયવર્ટ કરવામાં આવી
એસોસિએટેડ પ્રેસ (AP) ના અહેવાલ મુજબ, અધિકારીઓએ જણાવ્યું કે ડેનમાર્કના કોપનહેગનથી એક ફ્લાઇટ અને મેડ્રિડથી બીજી ફ્લાઇટ સોફિયાના વાસિલ લેવસ્કી એરપોર્ટ પર સુરક્ષિત રીતે ઉતરી હતી. લંડનના સ્ટેનસ્ટેડ એરપોર્ટથી સોફિયા જઈ રહેલી અન્ય એક ફ્લાઇટને ડાયવર્ટ કરવામાં આવી હતી અને તે બલ્ગેરિયાના પ્લોવદિવ એરપોર્ટ પર ઉતરી હતી.
આ સિવાય ફ્રેન્ચ વડાપ્રધાનના કાર્યાલય અનુસાર, આયર્લેન્ડથી ઇટાલી જઈ રહેલી એક ફ્લાઇટને પશ્ચિમ ફ્રાન્સના લશ્કરી એરબેઝ પર ડાયવર્ટ કરવામાં આવી હતી. ફ્લાઇટ-ટ્રેકિંગ વેબસાઇટ્સ દર્શાવે છે કે ડબલિનથી રોમ જઈ રહેલી એર લિંગસની ફ્લાઇટ એવરેક્સ તરફ ડાયવર્ટ થતાં પહેલાં પેરિસ તરફ આગળ વધી રહી હતી.
નોંધનીય છે કે, આ સપ્તાહની શરૂઆતમાં પણ ઘણી ફ્લાઇટ્સને બોમ્બની ધમકીઓ મળી હતી. આમાં પોલિશ એરલાઇન LOT, સ્કેન્ડિનેવિયન એરલાઇન્સ, વિઝ એર અને રાયનએર દ્વારા સંચાલિત ફ્લાઇટ્સનો સમાવેશ થાય છે. અગાઉ, બલ્ગેરિયા જઈ રહેલા એક વિમાનને ઉડાન દરમિયાન બોમ્બની ધમકી મળ્યા બાદ હંગેરી તરફ ડાયવર્ટ કરવામાં આવ્યું હતું.
જોકે ઉડ્ડયન ક્ષેત્ર માટે બોમ્બની ધમકીઓ નવી નથી, પરંતુ આ તાજેતરની ઘટનાઓ વધતા ભૂ-રાજકીય તણાવ અને સમગ્ર યુરોપમાં ઊભી થયેલી અવ્યવસ્થા અંગેની વધતી ચિંતાઓ વચ્ચે સામે આવી છે. તાજેતરના સમયમાં, યુરોપમાં સુપરમાર્કેટ રેફ્રિજરેશન સિસ્ટમમાં ખલેલ, ડ્રોન ઘૂસણખોરી અને ઇમરજન્સી નોટિફિકેશન એપ્લિકેશન્સ પર રહસ્યમય એલર્ટ મળવાના અહેવાલો પણ જોવા મળ્યા છે.
