શું તમારું બાળક પણ સાંજે પગના દુખાવાની ફરિયાદ કરે છે? જાણો શું હોય શકે છે તકલીફ
દિવસભર રમતું બાળક રાત્રે પગના દુખાવાથી પરેશાન થાય ત્યારે માતા-પિતા ચિંતિત થઈ જાય છે. પિડિયાટ્રિશિયનના મતે આ મોટાભાગે 'ગ્રોઇંગ પેન' હોય છે. જાણો ઘરે જ તેને મટાડવાના અસરકારક રસ્તાઓ.
ઘણીવાર માતા-પિતા ફરિયાદ કરે છે કે તેમનું બાળક આખો દિવસ તો ખૂબ એક્ટિવ રહે છે, પણ સાંજ પડતા જ પગમાં દુખાવાની બૂમો પાડે છે. જો તમારી સાથે પણ આવું થતું હોય તો ગભરાવાની જરૂર નથી. ડોક્ટરોના મતે આ એક સામાન્ય પ્રક્રિયા છે, જેને મેડિકલ ભાષામાં ‘ગ્રોઇંગ પેન’ કહેવામાં આવે છે.
શું છે ગ્રોઇંગ પેન?
ગ્રોઇંગ પેન સામાન્ય રીતે 3 થી 12 વર્ષ ના બાળકોમાં જોવા મળે છે. આ દુખાવો ખાસ કરીને સાથળના પાછળના ભાગમાં, પિંડીઓમાં (Calves) અથવા ઘૂંટણની આસપાસ અનુભવાય છે. તે મોટેભાગે સાંજે કે રાત્રે જ વધે છે.
દુખાવો થવાના મુખ્ય કારણો:
જોકે આનું કોઈ સચોટ કારણ સ્પષ્ટ નથી, પણ નિષ્ણાતો નીચે મુજબની બાબતોને જવાબદાર ગણે છે:
- શારીરિક થાક: આખો દિવસ દોડધામ અને રમતગમતને કારણે સ્નાયુઓ થાકી જાય છે, જે રાત્રે દુખાવાનું રૂપ લે છે.
- પાણીની ઉણપ (Dehydration): શરીરમાં પાણી અને ઇલેક્ટ્રોલાઇટ્સ ઓછા થવાથી સ્નાયુઓમાં ખેંચાણ અને ક્રૅમ્પ્સ આવે છે.
- પોષણનો અભાવ: વિટામિન D અને કેલ્શિયમની ઉણપને કારણે હાડકાં અને સ્નાયુઓ નબળા પડે છે.
- સ્ટ્રેચિંગનો અભાવ: રમત પછી સ્નાયુઓને આરામ કે સ્ટ્રેચિંગ ન મળવાથી દુખાવો લાંબો સમય રહી શકે છે.
ઘરે જ કરો આ સરળ ઉપાયો:
- પૂરતું પાણી: બાળકને દિવસ દરમિયાન પૂરતું પાણી પીવડાવો. વધુ રમતગમત કરી હોય તો ORS આપવું હિતાવહ છે.
- માલિશ અને શેક: સૂતા પહેલા હૂંફાળા તેલથી હળવા હાથે માલિશ કરો અથવા ગરમ પાણીના નેપકિનથી શેક કરો.
- પૌષ્ટિક આહાર: આહારમાં દૂધ, દહીં, લીલા શાકભાજી અને ફળોનો સમાવેશ કરો. ડોક્ટરની સલાહ મુજબ વિટામિન D ના ચેકઅપ કરાવો.
- હળવી કસરત: રમતા પહેલા અને રમીને આવ્યા પછી હળવું સ્ટ્રેચિંગ કરવાની આદત પાડો.
ક્યારે ડોક્ટરને બતાવવું?
જો નીચે મુજબના લક્ષણો દેખાય તો તેને ગંભીરતાથી લો:
- જો દુખાવો સતત એક જ જગ્યાએ રહેતો હોય.
- પગમાં સોજો કે લાલાશ દેખાય.
- બાળકને ચાલવામાં તકલીફ પડતી હોય.
- દુખાવો દિવસના સમયે પણ ચાલુ રહેતો હોય.
મોટાભાગના કિસ્સામાં ગ્રોઇંગ પેન સામાન્ય હોય છે. યોગ્ય હાઇડ્રેશન, પોષણ અને થોડી માલિશથી બાળક ફરીથી એક્ટિવ અને ખુશખુશાલ બની શકે છે.
Disclaimer: આ સમાચાર સામાન્ય માહિતી પર આધારિત છે. વધુ માહિતી માટે તમારા ડૉક્ટરની સલાહ લો.
