Breaking News : ઇબોલા વાયરસને લઈ ગ્લોબલ હેલ્થ ઇમરજન્સી જાહેર, 300+ શંકાસ્પદ કેસ નોંધાતા WHO એ લીધો મોટો નિર્ણય

આફ્રિકાના બે દેશોમાં ફરી એકવાર ઇબોલા વાયરસના કેસોમાં વધારો જોવા મળતા વૈશ્વિક સ્તરે ચિંતા વધી છે. ડેમોક્રેટિક રિપબ્લિક ઓફ કોંગો અને યુગાન્ડામાં ઇબોલાના ફાટી નીકળેલા રોગચાળાને પગલે વિશ્વ આરોગ્ય સંગઠન (WHO) એ આંતરરાષ્ટ્રીય ચિંતાની જાહેર આરોગ્ય કટોકટી જાહેર કરી છે. અત્યાર સુધીમાં બંને દેશોમાં મળીને 88 લોકોના મોત થયા હોવાનું સામે આવ્યું છે, જ્યારે 300થી વધુ શંકાસ્પદ કેસ નોંધાયા છે.

વિશ્વ આરોગ્ય સંગઠનના ડાયરેક્ટર જનરલ Tedros Adhanom Ghebreyesus એ સોશિયલ મીડિયા પ્લેટફોર્મ X પર માહિતી આપતા જણાવ્યું હતું કે હાલનો ફાટી નીકળેલો રોગચાળો બુંદીબુગ્યો વેરિઅન્ટને કારણે થયો છે. આ Ebola Virus નો એક દુર્લભ પ્રકાર છે અને હાલમાં તેની સામે કોઈ અસરકારક રસી અથવા ચોક્કસ સારવાર ઉપલબ્ધ નથી.

WHO મુજબ, હાલની પરિસ્થિતિ હજુ વૈશ્વિક મહામારીના સ્તર સુધી પહોંચી નથી, પરંતુ પડોશી દેશોમાં વાયરસ વધુ ફેલાઈ શકે તેવો ખતરો ઊભો થયો છે. તેમ છતાં, સંગઠને દેશોને આંતરરાષ્ટ્રીય સરહદો બંધ ન કરવાની સલાહ આપી છે, જેથી અનાવશ્યક ગભરાટ અને અવરજવર પર અસર ન પડે.

આરોગ્ય અધિકારીઓએ પુષ્ટિ કરી છે કે હાલનો રોગચાળો બુંદીબુગ્યો વાયરસ ડિસીઝ (BVD) ના કારણે ફેલાયો છે. કોંગો અને યુગાન્ડામાં અગાઉ પણ અનેક વખત ઇબોલાના કેસો નોંધાયા છે, પરંતુ BVD પ્રકારનો આ ત્રીજો મોટો પ્રકોપ માનવામાં આવી રહ્યો છે. શરૂઆતના સેમ્પલમાં મળેલા ઊંચા પોઝિટિવિટી રેટને જોતા નિષ્ણાતો માને છે કે કેસોની વાસ્તવિક સંખ્યા વધુ મોટી હોઈ શકે છે.

કોંગોના પૂર્વી ઇટુરી પ્રાંતમાં સૌથી પહેલા વાયરસ ફેલાવાની માહિતી મળી હતી. આ વિસ્તાર યુગાન્ડા અને દક્ષિણ સુદાનની સરહદ નજીક આવેલો છે. ત્યારબાદ યુગાન્ડાની રાજધાની કમ્પાલામાં પણ બે કેસ નોંધાયા હતા. WHO એ જણાવ્યું છે કે બંને દર્દીઓ કોંગોથી આવ્યા હતા, પરંતુ બંને કેસ વચ્ચે સીધી કડી હોવાની પુષ્ટિ થઈ નથી.

આફ્રિકા સેન્ટર્સ ફોર ડિસીઝ કંટ્રોલ એન્ડ પ્રિવેન્શનના જણાવ્યા મુજબ, અત્યાર સુધીમાં 336 શંકાસ્પદ કેસ નોંધાયા છે. આરોગ્ય એજન્સીઓ હાલ ઝડપી તપાસ, સંપર્ક ટ્રેસિંગ અને સારવારની વ્યવસ્થા પર કામ કરી રહી છે, જેથી વાયરસને વધુ ફેલાતો અટકાવી શકાય.

Cancer Risk : આ 7 પરિબળો કેન્સર થવાનું જોખમ વધારે છે, જાણો કારણ