કોરોનાથી રક્ષણ આપતા હેન્ડ સેનિટાઈઝરથી પણ કેન્સરનું જોખમ! ઘણી બ્રાન્ડ્સે બજારમાંથી પાછી ખેંચી પ્રોડક્ટ

માર્કેટમાંથી કુલ 21 બ્રાન્ડના હેન્ડ સેનિટાઈઝર પાછા ખેંચી લેવામાં આવ્યા છે, જેમાં ધી ક્રીમ શોપ અને અલ્ટા બ્યુટી દ્વારા બનાવવામાં આવેલ તેમજ ટીજે મેક્સ, માર્શલ્સ અને ઓનલાઈન પર વેચાતા સેનિટાઈઝરનો સમાવેશ થાય છે. જ્યારે હાથ પર સેનિટાઈઝર લગાવવામાં આવે છે, ત્યારે તેમાં હાજર ખતરનાક બેન્ઝીન ત્વચા દ્વારા શરીરમાં જાય છે, કારણ કે તેમાં બેન્ઝીનનું ઉચ્ચ સ્તર જોવા મળે છે. આવી સ્થિતિમાં લોકોને કેન્સરનો ખતરો હોઈ શકે છે.

કેટલીક બ્રાન્ડ્સ પર સંપૂર્ણ પ્રતિબંધ મૂક્યો છે

કેટલાક વિદેશી ઉત્પાદનો પર સંપૂર્ણ પ્રતિબંધ મૂકવામાં આવ્યો છે. ઘણા હેન્ડ સેનિટાઈઝર બેન્ઝીનના પ્રતિ મિલિયન (ppm) બે ભાગની વચગાળાની મર્યાદાને વટાવે છે. કોરોના રોગચાળા દરમિયાન, સમગ્ર વિશ્વમાં સેનિટાઈઝરનો ઘણો ઉપયોગ કરવામાં આવ્યો હતો. હવે લગભગ ત્રણ વર્ષ પછી જાણવા મળ્યું છે કે તેમાં બેન્ઝીનનું સ્તર ઊંચું છે. નિષ્ણાંતોનું કહેવું છે કે સેનિટાઈઝરમાં બેન્ઝીનમાંથી બનેલા રસાયણનો ઉપયોગ કરવામાં આવે છે, જેમાં કેટલીકવાર ઓછી માત્રામાં કાર્સિનોજેન્સ હોઈ શકે છે.

ડ્રાય શેમ્પૂમાં પણ બેન્ઝીન જોવા મળે છે

ભૂતકાળમાં, ઘણી કંપનીઓ દ્વારા વેચવામાં આવતા ડ્રાય શેમ્પૂમાં બેન્ઝીનનું સ્તર ખૂબ ઊંચું જોવા મળ્યું હતું. આ કારણે યુનિલિવરે ઓક્ટોબરમાં બજારોમાંથી તેની પ્રોડક્ટ પરત મંગાવી હતી. કનેક્ટિકટની એક લેબમાં, 34 બ્રાન્ડના ડ્રાય શેમ્પૂના 148 બેચનો અભ્યાસ કરવામાં આવ્યો, જેમાં જાણવા મળ્યું કે તેમાંથી 70%માં બેન્ઝીન છે. આ રસાયણ લ્યુકેમિયા જેવા કેન્સરનું કારણ બની શકે છે. રિસર્ચમાં જણાવવામાં આવ્યું હતું કે ડ્રાય શેમ્પૂમાં બેન્ઝીનનો ઉપયોગ વાળને તાજગી આપવા માટે કરવામાં આવે છે. જો કે, તેની ઘણી આડઅસરો પણ છે.