ભારતમાં તબીબી વિજ્ઞાનનો અજીબોગરીબ કિસ્સો, મોં છોડીને આંખની ઉપર નીકળી આવ્યા 2 દાંત, જોઈને ખુદ ડૉક્ટરો પણ ચોંકી ગયા

મેડિકલ સાયન્સમાં સમયાંતરે અનેક પ્રકારના કેસો સામે આવતા રહે છે, પરંતુ કેટલીક ઘટનાઓ એવી હોય છે જેને જોઈને ખુદ નિષ્ણાત તબીબો પણ સ્તબ્ધ થઈ જાય છે. આવો જ એક અત્યંત અસાધારણ અને વિચિત્ર મામલો ભારતમાં સામે આવ્યો છે, જ્યાં એક કિશોરની આંખની પાંપણ ઉપર અચાનક દાંત ઊગવા લાગ્યા હતા. આ કેસની જટિલતા અને અનોખાપણાને કારણે તેને ‘અમેરિકન એકેડેમી ઓફ ઓપ્થેલ્મોલોજી‘ (AAO) માં પણ સત્તાવાર રીતે નોંધવામાં આવ્યો છે.

દાંત આપણા શરીરનું એક અત્યંત મહત્વપૂર્ણ અંગ છે, જે ખોરાકને ચાવવામાં મદદરૂપ બને છે જેથી પેટમાં તેનું પાચન યોગ્ય રીતે થઈ શકે. આ ઉપરાંત તે આપણા ચહેરાના હાસ્યને પણ આકર્ષક બનાવે છે. પરંતુ ક્યારેય એવું સાંભળ્યું છે કે દાંત મોંની અંદર પેઢા પર નહીં પણ આંખની પાંપણ પાસે ફૂટી નીકળે? 16 વર્ષના એક ભારતીય કિશોર સાથે આ પ્રકારની ચોંકાવનારી ઘટના બની હતી.

આ સ્થિતિને કહેવાય છે ‘એક્ટોપિક ટૂથ ઇરપ્શન’

નેશનલ સેન્ટર ફોર બાયોટેકનોલોજી ઇન્ફોર્મેશન (NCBI) ના અહેવાલ મુજબ, મોંના નિર્ધારિત પેઢા સિવાય શરીરના અન્ય કોઈ અસામાન્ય અંગ પર દાંત ઊગવાની તબીબી સ્થિતિને ‘એક્ટોપિક ટૂથ ઇરપ્શન’ (Ectopic Tooth Eruption) કહેવામાં આવે છે. ‘ન્યૂયોર્ક પોસ્ટ’ના રિપોર્ટ અનુસાર, આ 16 વર્ષીય ભારતીય કિશોરની પાંપણ અને ભ્રમર (Eyebrow) વચ્ચેના ભાગમાં બે દાંત ફૂટી નીકળ્યા હતા. તબીબોએ તેને વિશ્વની સૌથી અનોખી અને વિરલ ‘એટિપિકલ ઇવેન્ટ’ ગણાવી છે.

અગાઉ આવા કેસ ક્યાં નોંધાયા હતા?

સામાન્ય રીતે શરીરના અસામાન્ય ભાગોમાં દાંત ઊગવાના છૂટાછવાયા કિસ્સાઓ અગાઉ મેડિકલ સાહિત્યમાં નોંધાયેલા છે. AAO ના રિપોર્ટ મુજબ, અગાઉ કેટલાક દર્દીઓમાં નાકની કેવિટી (Nasal Cavity), નસકોરાની અંદર, આંખની નીચે અથવા મેક્સિલરી સાઇનસ (ગાલના હાડકાની અંદરનો ભાગ) માં દાંતનો વિકાસ જોવા મળ્યો છે. પરંતુ આંખના ઉપરના ભાગમાં દાંત ઊગ્યા હોય તેવો કિસ્સો તબીબી ઇતિહાસમાં ક્યારેય જોવા કે સાંભળવા મળ્યો નથી. આ અભ્યાસના કો-ઓથર ડૉ. મેઘના તંવરના જણાવ્યા મુજબ, આ કેસમાં દાંત ‘સુપિરિયર ઓર્બિટ’ માં હાજર હતા, જે અપર આઇ સોકેટ (આંખના ઉપરના ખાડા) નો ભાગ છે.

શરૂઆતમાં માત્ર હળવો સોજો રહ્યો

રિપોર્ટ અનુસાર, કિશોરને શરૂઆતના થોડા મહિનાઓ સુધી આંખની પાંપણના ઉપરના ભાગમાં કોઈ પણ પ્રકારના દુખાવા વગર માત્ર સોજો રહ્યો હતો. ત્યાર બાદ તે સોજાવાળી જગ્યા પરથી ધીમે-ધીમે બે તીક્ષ્ણ સફેદ અણીદાર વસ્તુઓ બહાર નીકળતી દેખાવા લાગી. થોડા જ સમયમાં પાંપણ અને ભ્રમર વચ્ચે બે સંપૂર્ણ કદના તીક્ષ્ણ દાંત સ્પષ્ટપણે બહાર આવી ગયા.

શરૂઆતમાં ડૉક્ટરોને આશંકા હતી કે કદાચ આ કોઈ દુર્લભ ‘ટેરાટોમા ટ્યુમર’ (એક પ્રકારની ગાંઠ જે હાડકા અને દાંતના પેશીઓને અસર કરે છે) હોઈ શકે છે. પરંતુ ત્યારબાદ સીટી સ્કેન કરવામાં આવતાં પુષ્ટિ થઈ કે આ ગાંઠ નહીં પરંતુ સંપૂર્ણ વિકસિત થયેલા મેચ્યોર કેનાઇન દાંત (તીક્ષ્ણ રાક્ષસી દાંત) હતા.

સર્જરી દ્વારા સફળતાપૂર્વક હટાવાયા દાંત

હોસ્પિટલના તબીબોની ટીમે જટિલ સર્જરી હાથ ધરીને કિશોરની આંખની પાંપણ પરથી બંને દાંત સુરક્ષિત રીતે દૂર કરી દીધા છે. મેડિકલ તપાસમાં એ પણ ખાતરી થઈ છે કે તેના શરીરમાં અન્ય કોઈ જગ્યાએ આવા અસામાન્ય દાંત ઊગવાની સંભાવના નથી. ડૉ. મેઘના તંવરે જણાવ્યું કે, “સમગ્ર વિશ્વમાં આ પ્રથમ એવો અતિ-દુર્લભ કેસ છે જ્યાં ડેન્ટલ આર્ક (મોંના કુદરતી જડબા) ની સંપૂર્ણ બહાર આ રીતે દાંત વિકસી રહ્યા હતા. આ અસામાન્ય નજારો જોઈને તબીબો તરીકે અમે પણ સંપૂર્ણપણે આશ્ચર્યચકિત થઈ ગયા હતા.”

પૃથ્વીથી માઇલો દૂર સ્પેસ સ્ટેશનમાં લંચ કેવી રીતે તૈયાર થાય છે ? ભારતીય એસ્ટ્રોનોટ શુભાંશુ શુક્લાએ ખોલ્યું અંતરિક્ષના કિચનનું રહસ્ય