Weather Breaking News : સુરત જિલ્લામાં ભારે વરસાદથી જનજીવન અસ્તવ્યસ્ત, નદીઓમાં પૂર, અનેક લોકોનું રેસ્ક્યુ, જુઓ Video

સુરત જિલ્લામાં સતત વરસી રહ્યો છે. ધોધમાર વરસાદને કારણે અનેક વિસ્તારોમાં પૂર જેવી સ્થિતિ છે. ઓલપાડ, કીમ, ઝંખવા, માંડવી અને માંગરોળ સહિતના વિસ્તારોમાં પાણી ભરાઈ જતાં જનજીવન પર અસર પડી છે. કીમ નદીના જળસ્તરમાં સતત વધારો થયો છે. અનેક ગામો અને રહેણાંક વિસ્તારો પાણીમાં ઘેરાઈ ગયા છે. જિલ્લા તંત્ર, પોલીસ અને SDRFની ટીમો રાહત કામગીરીમાં લાગી છે.

આર્મીની પણ લેવામાં આવશે મદદ

સુરત જિલ્લાના પોલીસ અધિક્ષક (SP)એ જણાવ્યું કે, સ્થિતિને ધ્યાનમાં રાખીને આર્મીની એક ટીમની મદદ પણ લેવામાં આવશે. જ્યાં રસ્તાઓ પર પાણી ભરાઈ ગયા છે તેવા તમામ માર્ગોને સલામતીના હેતુથી બંધ કરવાની કાર્યવાહી કરવામાં આવી છે. લોકોને બિનજરૂરી બહાર ન નીકળવા અને તંત્રની સૂચનાઓનું પાલન કરવા અપીલ કરવામાં આવી છે. કીમ નદીમાં પાણીનું સ્તર સતત વધી રહ્યું છે. પાણીના વધતા સ્તરના કારણે નરોલી ગામ બેટમાં ફેરવાઈ ગયું છે. અનેક ઘરોમાં પાણી ઘૂસી ગયા છે. સાથે લોકો ફસાઈ ગયા છે. પોલીસ અને SDRFની ટીમે સમયસર પહોંચીને લોકોને સુરક્ષિત સ્થળે ખસેડવાની કામગીરી શરૂ કરી છે.

GIDC વિસ્તારમાં ફસાયા લોકો

માંગરોળ વિસ્તાર અને કીમ ચાર રસ્તા નજીક આવેલા GIDC વિસ્તારમાં પણ મોટાભાગે લોકો પાણીમાં ફસાયા હતા. બચાવ ટીમે તેમનું સફળ રેસ્ક્યુ ઓપરેશન હાથ ધરી તમામ લોકોને સલામત રીતે બહાર કાઢ્યું છે. બચાવાયેલા લોકોએ પોલીસ અને SDRFની સમયસરની કામગીરી બદલ આભાર વ્યક્ત કર્યો છે.

સુરતના અનેક વિસ્તારોમાં ભારે પવન સાથે વરસાદ

સુરત શહેરમાં પણ ફરી એકવાર ભારે વરસાદ છે. પીપલોદ, ઉધના, અથવાલાઇન્સ, રાંદેર, અડાજણ સહિતના અનેક વિસ્તારોમાં ભારે પવન સાથે વરસાદ વરસી રહ્યો છે. નીચાણવાળા વિસ્તારોમાં પાણી ભરાવાની સમસ્યા થઈ છે. છેલ્લા 24 કલાક દરમિયાન જિલ્લામાં સરેરાશ આશરે 8 ઇંચ જેટલો વરસાદ નોંધાયો છે. જ્યારે સુરત શહેરમાં લગભગ 5 ઇંચ વરસાદ પડ્યો છે. જિલ્લામાં સૌથી વધુ વરસાદ માંગરોળ વિસ્તારમાં નોંધાયો હોવાનું તંત્રએ જણાવ્યું.

આ પણ વાંચો, Weather Breaking News : અડધા ઇંચ વરસાદમાં ભૂજ બેટમાં ફેરવાયું! સ્ટેશન વિસ્તારમાં ઘૂંટણસમા પાણી ભરાયા, જુઓ Video