Valsad : બલીઠામાં હિટ એન્ડ રનની ઘટના, NH48 પર રાહદારીનું મોત, 20 મિનિટ મદદ વગર રસ્તા પર પડી રહ્યો, જુઓ Video

વલસાડ જિલ્લાના નેશનલ હાઈવે 48 પર બલીઠા નજીક હિટ એન્ડ રનની એક દિલ દહોળી દેતી ઘટના સામે આવી છે. મળતી માહિતી મુજબ, એક અજાણ્યો રાહદારી રસ્તો ઓળંગી રહ્યો હતો ત્યારે કોઈ અજાણ્યા વાહનચાલકે તેને જોરદાર ટક્કર મારી હતી. આ ભયાનક અથડામણ બાદ રાહદારી ફંગોળાઈને રોડના ડિવાઈડર પર પટકાયો હતો, જ્યાં તે ગંભીર રીતે ઘાયલ હાલતમાં સેફ્ટી વોલ પર લટકતો રહ્યો હતો.

ઘટનાના ચોંકાવનારા દ્રશ્યો કેમેરામાં કેદ થયા છે, જેમાં સ્પષ્ટ દેખાઈ રહ્યું છે કે રાહદારી લગભગ 20 મિનિટ સુધી ડિવાઈડર પર લટકતો રહ્યો, પરંતુ વાહનોની અવરજવર વચ્ચે કોઈપણ વ્યક્તિ તેની મદદ માટે આગળ આવી ન હતી. અંતે, તે નીચે રોડ પર પટકાઈ ગયો, જ્યાં તેની હાલત વધુ ગંભીર બની ગઈ હતી.

રાહદારી જમીન પર પડ્યા બાદ પણ સ્થિતિમાં કોઈ ફેરફાર આવ્યો નહોતો. હાઈવે પરથી પસાર થતા વાહનોએ ગતિ ધીમી કરવાની કે મદદ કરવાની તસ્દી લીધી ન હતી. ગંભીર માથાની ઈજાઓને કારણે રાહદારીનું ઘટનાસ્થળે જ મોત નીપજ્યું હતું. સૌથી હચમચાવી મુકે તેવી વાત એ છે કે, તેના મૃતદેહ પરથી પણ એક પછી એક વાહનો પસાર થતા રહ્યા, જે માનવતાને શરમાવે તેવી ઘટના ગણાઈ રહી છે.

આ સમગ્ર બનાવે સમાજમાં માનવ સંવેદનાની સ્થિતિ અંગે ગંભીર પ્રશ્નો ઊભા કર્યા છે. “શું લોકોની સંવેદના મરી ગઈ છે?” એવો સવાલ હવે ઉઠી રહ્યો છે, કારણ કે અકસ્માત જેવી ગંભીર સ્થિતિમાં પણ કોઈએ માનવતાના નાતે મદદ કરવી જરૂરી સમજી ન હતી.

ઘટના બાદ ઘણાં સમય પછી એક જાગૃત કારચાલકે પોતાની ગાડી રોકી અને તરત જ 108 એમ્બ્યુલન્સ તથા પોલીસને જાણ કરી હતી. બાદમાં મૃતદેહને પોસ્ટમોર્ટમ માટે નજીકના CHC ખાતે ખસેડવામાં આવ્યો હતો. હાલમાં પોલીસે અજાણ્યા વાહનચાલકની શોધખોળ શરૂ કરી છે અને આગળની કાર્યવાહી હાથ ધરાઈ રહી છે.