Breaking News : વડોદરા SSG હોસ્પિટલમાંથી દુષ્કર્મ કેસનો આરોપી પોલીસ જાપ્તામાંથી ફરાર, 6 ટીમો બનાવી શોધખોળ શરૂ

વડોદરાની SSG હોસ્પિટલમાં ગુરુવારે એક ચોંકાવનારી ઘટના સામે આવી હતી. સારવાર માટે લાવવામાં આવેલા પોલીસ જાપ્તાના એક 18 વર્ષીય આરોપીએ કોન્સ્ટેબલને ધક્કો મારીને ફરાર થઈ જતાં પોલીસ વિભાગમાં ભારે દોડધામ મચી ગઈ હતી. આરોપી કાચા કામનો હોવાનું અને તે દુષ્કર્મના કેસમાં સંડોવાયેલો હોવાનું પોલીસ સૂત્રોએ જણાવ્યું છે.

મળતી માહિતી મુજબ, આરોપીને સ્કિન સંબંધિત સારવાર માટે SSG હોસ્પિટલમાં લાવવામાં આવ્યો હતો. સારવાર દરમિયાન તકનો લાભ ઉઠાવી તેણે ફરજ પર રહેલા કોન્સ્ટેબલને ધક્કો માર્યો અને હોસ્પિટલ પરિસરમાંથી ભાગી છૂટ્યો. ફરાર થયા બાદ આરોપી હોસ્પિટલના નવા બની રહેલા બિલ્ડિંગમાં ઘૂસી ગયો હોવાનું સામે આવ્યું છે.

ઘટનાની જાણ થતાં જ ઉચ્ચ પોલીસ અધિકારીઓ સહિત પોલીસનો કાફલો SSG હોસ્પિટલ પહોંચી ગયો હતો. આરોપીની શોધખોળ માટે હોસ્પિટલ પરિસરમાં તાત્કાલિક સર્ચ ઓપરેશન શરૂ કરવામાં આવ્યું હતું. પોલીસ દ્વારા બાંધકામ ચાલી રહેલી સાઇટને ખાલી કરાવી દેવામાં આવી હતી, જેથી આરોપી છુપાયો હોય તો તેને ઝડપી શકાય.

આરોપીની શોધ માટે પોલીસે કુલ 6 અલગ-અલગ ટીમો બનાવી છે. ઉપરાંત, સમગ્ર હોસ્પિટલ અને આસપાસના વિસ્તારની તપાસ માટે ડ્રોન કેમેરાનો પણ ઉપયોગ કરવામાં આવી રહ્યો છે. પોલીસ દ્વારા બિલ્ડિંગના દરેક માળ અને ખૂણે-ખૂણે સર્ચ ઓપરેશન હાથ ધરવામાં આવ્યું છે.

હાલ પોલીસે આરોપીને ઝડપી પાડવા માટે તમામ શક્ય પ્રયાસો શરૂ કર્યા છે. ફરાર આરોપીની શોધખોળ સતત ચાલુ છે અને સમગ્ર મામલે વધુ તપાસ હાથ ધરવામાં આવી રહી છે.

અકસ્માત કરીને ભાગ્યા તો ગયા સમજજો, હિટ એન્ડ રન કેસ કેટલી સજા થઈ શકે? જાણી લો