Heavy Rain in Gujarat : ગુજરાતમાં ચોમાસું હવે સંપૂર્ણ રીતે જામ્યું છે. છેલ્લા 24 કલાક દરમિયાન રાજ્યના અનેક જિલ્લાઓમાં ભારેથી અતિભારે વરસાદ નોંધાતા જનજીવન પર અસર જોવા મળી છે. હવામાન વિભાગ (IMD) દ્વારા જાહેર કરાયેલા તાજા અહેવાલ મુજબ 24 જુલાઈ 2026ના રોજ સવારે 8:30 વાગ્યા સુધીના 24 કલાકમાં ગુજરાત અને સૌરાષ્ટ્ર-કચ્છમાં ચોમાસું જોરદાર સક્રિય રહ્યું હતું.

અહેવાલ અનુસાર રાજ્યના મોટાભાગના વિસ્તારોમાં વરસાદ નોંધાયો છે, જ્યારે કેટલાક જિલ્લાઓમાં 30 સેન્ટીમીટરથી વધુ વરસાદ વરસતા પૂર જેવી સ્થિતિ સર્જાઈ છે.

અમદાવાદ સહિત અનેક જિલ્લામાં અતિભારે વરસાદ

હવામાન વિભાગના જણાવ્યા મુજબ ખેડા, અમદાવાદ, નવસારી, ડાંગ, આણંદ અને સુરત જિલ્લામાં અલગ-અલગ સ્થળોએ 30 સેમીથી વધુ વરસાદ નોંધાયો છે. ઉપરાંત કેન્દ્રશાસિત પ્રદેશ દાદરા અને નગર હવેલીમાં પણ અતિભારે વરસાદ વરસ્યો છે.

તે ઉપરાંત અમદાવાદ, આણંદ, ડાંગ, મહેસાણા, તાપી, વલસાડ, ભરૂચ અને ગાંધીનગર જિલ્લામાં 21 સેમીથી વધુ વરસાદ નોંધાયો છે. જ્યારે સૌરાષ્ટ્રમાં અમરેલી જિલ્લામાં પણ અતિભારે વરસાદ પડ્યો છે.

અનેક જિલ્લાઓમાં ભારે વરસાદ

હવામાન વિભાગના અહેવાલ મુજબ બનાસકાંઠા, ગાંધીનગર, વડોદરા, નર્મદા, સુરત, ડાંગ, તાપી અને વલસાડ સહિતના વિસ્તારોમાં 12થી 20 સેમી સુધીનો ભારે વરસાદ નોંધાયો છે.

આ ઉપરાંત પાટણ, મહેસાણા, સાબરકાંઠા, પંચમહાલ, મહીસાગર, છોટાઉદેપુર, ભરૂચ, નવસારી સહિતના જિલ્લાઓમાં પણ 7થી 11 સેમી સુધી વરસાદ વરસ્યો છે. સૌરાષ્ટ્ર-કચ્છના રાજકોટ, ભાવનગર, સુરેન્દ્રનગર, બોટાદ, જામનગર, મોરબી, જૂનાગઢ અને કચ્છ જિલ્લામાં પણ સારો વરસાદ નોંધાયો છે.

હજુ પણ વરસાદનો દોર યથાવત રહેશે

હવામાન વિભાગે જણાવ્યું છે કે, હાલમાં દક્ષિણ-પૂર્વ રાજસ્થાન અને આસપાસના વિસ્તારમાં સર્જાયેલા લો-પ્રેશર એરિયા તથા તેની સાથે જોડાયેલી સાયક્લોનિક સર્ક્યુલેશન સક્રિય છે. આ સિસ્ટમની અસર હેઠળ ગુજરાતમાં આગામી દિવસોમાં પણ વરસાદી માહોલ યથાવત રહેવાની શક્યતા છે.

સાથે જ મોન્સૂન ટ્રફ હાલ જેસલમેરથી શરૂ થઈ રાજસ્થાન, મધ્યપ્રદેશ અને પશ્ચિમ બંગાળ તરફ વિસ્તરી રહી છે. આ ઉપરાંત પશ્ચિમી વિક્ષેપ (Western Disturbance) પણ સક્રિય હોવાથી ભેજનું પ્રમાણ વધ્યું છે, જેના કારણે આગામી દિવસોમાં પણ રાજ્યના અનેક વિસ્તારોમાં ભારેથી અતિભારે વરસાદની સંભાવના વ્યક્ત કરવામાં આવી છે.

નાગરિકો અને ખેડૂતોને સાવચેત રહેવાની સલાહ

ભારે વરસાદને પગલે નીચાણવાળા વિસ્તારોમાં પાણી ભરાવા, નદી-નાળા અને તળાવોમાં પાણીની આવક વધવા તેમજ સ્થાનિક સ્તરે પૂર જેવી સ્થિતિ સર્જાવાની શક્યતા છે. હવામાન વિભાગે નાગરિકોને બિનજરૂરી મુસાફરી ટાળવા અને સ્થાનિક તંત્ર દ્વારા જારી કરવામાં આવતી સૂચનાઓનું પાલન કરવાની સલાહ આપી છે. ખેડૂતોને પણ ખેતરોમાં પાણીના નિકાલની યોગ્ય વ્યવસ્થા રાખવા સૂચના આપવામાં આવી છે.

Rain Breaking News : હવે ઉત્તર ગુજરાત અને સૌરાષ્ટ્રનો વારો : અંબાલાલ પટેલે કરી આગાહી, જુઓ Video