Surat Rain Update : વાદળોની સંતાકૂકડી વચ્ચે ક્યારેક વરસાદ તો ક્યારેક તડકો, શહેરીજનોને ધમાકેદાર વરસાદની રાહ
જોકે વાદળોની(Clouds ) સંતાકૂકડી વચ્ચે શહેરમાં માત્ર વરસાદી ઝાપટા જ નોંધાઈ રહ્યા છે. જેના કારણે વરસાદ બાદ શહેરીજનો ફરી વાર બફારા અને ઉકળાટનો અનુભવ કરતા જોવા મળી રહ્યા છે.
હવામાન વિભાગ દ્વારા સુરત (Surat ) સહિત સમગ્ર દક્ષિણ ગુજરાતમાં (South Gujarat ) આગામી ચાર દિવસમાં હળવાથી ભારે વરસાદની (Rain ) આગાહી વચ્ચે આજે સતત બીજા દિવસે સુરત શહેરના અલગ – અલગ વિસ્તારોમાં છુટ્ટોછવાયો વરસાદ નોંધાયો હતો. કાળા ડિબાંગ વાદળોની સંતાકુકડી વચ્ચે તાપમાનનો પારો ગગડી જતાં શહેરીજનોએ પણ આહ્લાદક વાતાવરણનો લ્હાવો લીધો હતો. જોકે, આજે સવારથી છુટ્ટાછવાયા વરસાદને પગલે નોકરી – ધંધે જનારા વાહન ચાલકોએ નાછૂટકે ભીંજાવાનો વારો આવ્યો હતો.
આજે વહેલી સવારથી જ વાદળોના આગમન સાથે શહેરના અલગ – અલગ ઝોન વિસ્તારમાં હળવા વરસાદી ઝાપટા નોંધાયા હતા. સુરતના અઠવા, વેસુ, સિટીલાઈટ, ઉધના, લિંબાયત, ડિંડોલી, વરાછા અને કતારગામ, અડાજણ અને રાંદેર સહિતના વિસ્તારોમાં સામાન્ય હળવા વરસાદી ઝાપટાને લીધે વાતાવરણમાં થોડા સમય માટે ઠંડક પ્રસરી જવા પામી હતી. હવામાન વિભાગ દ્વારા આવનારા ચાર દિવસ સુધી સુરત સહિત સમગ્ર દક્ષિણ ગુજરાતમાં વરસાદની આગાહી વચ્ચે આજે સવારથી વાતાવરણમાં પલ્ટો આવતાં તાપમાનનો પારો પણ એકદમ ગગડી જવા પામ્યો હતો.
ગઈકાલથી શહેરમાં બદલાયેલા વાતાવરણ વચ્ચે આજે સવારથી વરસાદના આગમનને પગલે સુરતીઓએ ડુમસ તરફ દોટ લગાવી હતી. જો કે, નોકરી – ધંધા માટે નીકળેલા વાહન ચાલકોએ નાછૂટકે વરસાદમાં ભીંજાવાનો વારો આવ્યો હતો. સુરત શહેરની સાથે સાથે સુરત જિલ્લામાં પણ હળવો વરસાદ નોંધાયો છે. જ્યારે ઉકાઈ ડેમના કેચમેન્ટમાં પણ સારો વરસાદ નોંધાયો છે. હાલ ઉકાઈ ડેમની સપાટી 316.18 ફૂટ જેટલી નોંધાઈ છે. ઉકાઈ ડેમમાંથી 1000 ક્યુસેક પાણી સતત છોડવામાં આવી રહ્યું છે. જ્યારે ગઈકાલે રાત્રે 8 વાગ્યે 13 હજાર ક્યુસેક પાણી તાપી નદીમાં છોડાયું હતું. હાલ કોઝવેની સપાટી વધીને 4.95 મીટર પર પહોંચી છે.
જોકે વાદળોની સંતાકૂકડી વચ્ચે શહેરમાં માત્ર વરસાદી ઝાપટા જ નોંધાઈ રહ્યા છે. જેના કારણે વરસાદ બાદ શહેરીજનો ફરી વાર બફારા અને ઉકળાટનો અનુભવ કરતા જોવા મળી રહ્યા છે. હજી વરસાદ મન ભરીને વરસ્યો નથી. શહેરીજનો પણ ચોમાસાના પહેલા ધમાકેદાર વરસાદની કાગડોળે રાહ જોઈ રહ્યા છે. જોકે આગામી થોડા દિવસોમાં હવે ચોમાસુ વિધિવત જામશે તેવી આગાહી હવામાન વિભાગ દ્વારા કરવામાં આવી છે.
Latest News Updates
