Surat : ફિટનેસ પ્રિય સુરતીઓ માટે આનંદના સમાચાર, ફરી શરૂ થશે સાઇકલ શેરિંગ યોજના
એપ્રિલ મહિનામાં સુરતમાં કોરોનાના કેસમાં ધરખમ વધારો થયો હતો. જેના કારણે કોરોના સંક્રમણ અટકાવવા સુરત મહાનગરપાલિકાએ (Surat Municipal Corporation) સમગ્ર શહેરમાં સાયકલ શેરીંગ (Cycle Sharing) યોજના બંધ કરી દીધી હતી.
Surat : એપ્રિલ મહિનામાં સુરતમાં કોરોનાના કેસમાં ધરખમ વધારો થયો હતો. જેના કારણે કોરોના સંક્રમણ અટકાવવા સુરત મહાનગરપાલિકાએ (Surat Municipal Corporation) સમગ્ર શહેરમાં સાયકલ શેરીંગ (Cycle Sharing) યોજના બંધ કરી દીધી હતી. પરંતુ હવે કોરોનાના કેસો ઘટવા લાગતા પહેલી જૂનથી મહાનગરપાલિકા સાયકલ શેરીંગ યોજના ફરી શરૂ કરવા જઇ રહી છે.
સમગ્ર સુરતમાં મહાનગર પાલિકા 1160 સાયકલ શહેરીજનો માટે ઉપલબ્ધ કરાવે છે. હવે જ્યારે કોરોનાના કેસો ઘટવા લાગ્યા છે ત્યારે લોકોએ સાયકલ શેરીંગ શરૂ કરવા માટે રજૂઆતો કરી હતી. જેથી મનપાએ હવે તમામ તકેદારી સાથે જૂન મહિનાથી સાયકલ શેરીંગ પ્રોજેક્ટ શરૂ કરવાનો નિર્ણય કર્યો છે.
સુરત મહાનગરપાલિકાએ પહેલા તબક્કામાં સેન્ટ્રલ ઝોન અને અઠવા ઝોનમાં સાયકલ યોજના શરૂ કરી હતી. સેન્ટ્રલ ઝોનમાં જુદા જુદા 24 સ્થળે 408 ડોક પર 274 સાયકલ મૂકવામાં આવી હતી. જ્યારે અઠવા ઝોનમાં જુદા જુદા 18 લોકેશન પર 204 ડોક પર 136 સાયકલ મૂકવામાં આવી હતી. આ બે ઝોનમાં લોકોએ સાઇકલ શેરિંગ યોજનામાં ખૂબ સારો પ્રતિસાદ બતાવ્યો હતો.
જેથી અન્ય વિસ્તારોમાં 500થી વધુ સાયકલો તબક્કાવાર મૂકીને આ યોજના આગળ વધારવામાં આવી હતી. કોરોનાની પહેલી લહેરમાં માર્ચ 2020 થી સાયકલ શેરિંગ યોજના બંધ કરવામાં આવી હતી. તબક્કાવાર અનલોક થતાં 10 મી સપ્ટેમ્બર 2020 થી સાયકલ સેવા શરૂ કરવામાં આવી હતી. પરંતુ બીજો તબક્કો શરૂ થતાં પાલિકાએ એપ્રિલ 2021 સાયકલ શેરીંગ બંધ કર્યું હતું અને દરેક ઝોનમાં મૂકવામાં આવેલી સાયકલો ઉઠાવી લેવામાં આવી હતી.
છેલ્લા ત્રણ અઠવાડિયાથી કોરોનાના કેસ ઘટી રહ્યા છે, જેથી લોકોએ ફરી એકવાર સાયકલ શેરીંગ પ્રોજેક્ટ શરૂ કરવા માગણી કરી હતી. આ યોજના અંતર્ગત 63 હજારથી વધુ લોકોએ રજિસ્ટ્રેશન કરાવ્યું છે. જે પૈકી દરરોજ 17 હજારથી વધુ લોકો સાયકલ શેરીંગનો લાભ લે છે. 17 હજારથી વધુ એક્ટિવ સભ્યો હોવાથી સુરત મનપાએ પહેલી જૂનથી તમામ વિસ્તાર સાયકલ શેરીંગ યોજના ફરી શરૂ કરવાનો નિર્ણય કર્યો છે.