Breaking News : સાબરમાં બાબુરાજ! સાબર ડેરીના વહીવટ સામે ગંભીર સવાલો! કાચા માલની ખરીદીમાં ગેરરીતિના આક્ષેપ, જુઓ પુરાવા

સાબર ડેરીમાં કાચા માલની ખરીદીમાં ગંભીર ગેરરીતિઓ સામે આવી છે. TV9ના દસ્તાવેજો મુજબ, ડેરી અન્ય ડેરીઓ કરતાં ઊંચા ભાવે બાયપાસ ફેટ અને અન્ય સામગ્રી ખરીદે છે, જેના કારણે પશુપાલકોને આર્થિક નુકસાન થવાનો ભય છે.

Breaking News : સાબરમાં બાબુરાજ! સાબર ડેરીના વહીવટ સામે ગંભીર સવાલો! કાચા માલની ખરીદીમાં ગેરરીતિના આક્ષેપ, જુઓ પુરાવા
| Edited By: | Updated on: Nov 18, 2026 | 7:12 PM

સાબર ડેરીના વહીવટ અને ખરીદી પ્રક્રિયાને લઈને TV9ના હાથમાં કેટલાક ચોંકાવનારા દસ્તાવેજો આવ્યા છે. આ દસ્તાવેજોના આધારે ડેરીમાં કાચા માલની ખરીદી ઊંચા ભાવે કરવામાં આવતી હોવાના અને ટેન્ડર પ્રક્રિયામાં ગેરરીતિઓ થઈ હોવાના ગંભીર સવાલો ઊભા થયા છે. આ સમગ્ર મામલે સૌથી મોટો પ્રશ્ન એ છે કે જો એક જ પ્રકારના ઉત્પાદનની ખરીદી સાબર ડેરી અન્ય ડેરીઓની સરખામણીએ ઊંચા ભાવે કરી રહી હોય, તો તેના કારણે થતી આર્થિક અસર આખરે કોણ ભોગવી રહ્યું છે? દૂધ ઉત્પાદક પશુપાલકોના હિતોનું રક્ષણ કરવાની જવાબદારી કોની છે?

કેસ 1: બાયપાસ ફેટની ખરીદીમાં ભાવનો મોટો તફાવત

TV9ને મળેલા દસ્તાવેજો મુજબ, સાબર ડેરી દ્વારા પશુદાણના ઉત્પાદનમાં ઉપયોગમાં લેવાતા બાયપાસ ફેટ (99%)ની ખરીદી ઊંચા ભાવે કરવામાં આવી હોવાનો દાવો કરવામાં આવ્યો છે. દસ્તાવેજોમાં દર્શાવેલા ભાવ મુજબ, સાબર ડેરીએ આ પ્રોડક્ટની ખરીદી પ્રતિ લાખ 66 હજાર રૂપિયાના ભાવે કરી હોવાનું સામે આવ્યું છે, જ્યારે આ જ પ્રોડક્ટની ખરીદી દૂધસાગર ડેરી દ્વારા પ્રતિ લાખ 28 હજાર રૂપિયાના ભાવે કરવામાં આવી હોવાનું દસ્તાવેજોમાં દર્શાવવામાં આવ્યું છે. આમ, એક જ પ્રોડક્ટની ખરીદીમાં બંને ડેરીઓ વચ્ચે નોંધપાત્ર ભાવનો તફાવત જોવા મળે છે.

ખાસ વાત એ છે કે બાયપાસ ફેટ જેવી પ્રોડક્ટની ખરીદી ડેરીઓ દ્વારા નિયમિત ધોરણે કરવામાં આવે છે. આવી સ્થિતિમાં ખરીદીના ભાવમાં મોટો તફાવત હોય તો તેની કુલ આર્થિક અસર કેટલી મોટી હોઈ શકે તે તપાસનો વિષય છે. TV9ના અહેવાલમાં આ ભાવના તફાવતને કારણે પશુપાલકોને થનારા સંભવિત આર્થિક નુકસાન અંગે પણ સવાલો ઉઠાવવામાં આવ્યા છે. જોકે, આ ખરીદીની કુલ માત્રા અને સમયગાળાના આધારે જ ચોક્કસ નુકસાનનો આંકડો નક્કી થઈ શકે છે.

આ ખરીદી પાછળની કંપની અંગે પણ TV9ને દસ્તાવેજો મળ્યા છે. અહેવાલ મુજબ, સાબર ડેરી આ પ્રોડક્ટની ખરીદી જે કંપની પાસેથી કરી રહી છે તેનું નામ સનરાઇઝ ટ્રેડવર્લ્ડ છે. કંપનીનો GST નંબર પણ દસ્તાવેજોમાં દર્શાવવામાં આવ્યો હોવાનું કહેવાય છે. વધુમાં, આ કંપની અંકિતાબેન પુરોહિતના નામે રજિસ્ટર્ડ હોવાનો દાવો કરવામાં આવ્યો છે. આ કંપની અને સાબર ડેરીના વહીવટ સાથે સંકળાયેલા લોકો વચ્ચે કોઈ સંબંધ છે કે કેમ, તે અંગે પણ સવાલો ઊભા થયા છે.

આ સમગ્ર મામલે બાબુ બરદાનની ભૂમિકા અને સંબંધિત કંપનીઓ સાથેના તેમના કથિત જોડાણ અંગે પણ તપાસની જરૂરિયાત જણાઈ રહી છે. જો ખરીદી પ્રક્રિયામાં કોઈ પ્રકારની ગેરરીતિ થઈ હોય, તો તેની જવાબદારી નક્કી થવી જોઈએ. સાથે જ ડેરીના વહીવટમાં પારદર્શિતા જળવાઈ રહી છે કે નહીં અને પશુપાલકોના નાણાકીય હિતોનું રક્ષણ થઈ રહ્યું છે કે નહીં તે અંગે પણ સ્પષ્ટતા થવી જરૂરી છે.

કેસ 2: એક જ કોન્ટ્રાક્ટર, પરંતુ ખરીદીના ભાવ અલગ-અલગ!

સાબર ડેરીની ખરીદી પ્રક્રિયા અંગેનો બીજો મુદ્દો પણ એટલો જ ગંભીર છે. TV9ને મળેલા દસ્તાવેજો મુજબ, સાબર ડેરી અને દૂધસાગર ડેરીમાં પશુદાણના ઉત્પાદનમાં ઉપયોગમાં લેવાતા વિવિધ કાચા માલની ખરીદી અલગ-અલગ કોન્ટ્રાક્ટરો પાસેથી કરવામાં આવે છે. જોકે, આ મામલે એક જ કોન્ટ્રાક્ટર દ્વારા બંને ડેરીઓને અલગ-અલગ ભાવે પ્રોડક્ટ સપ્લાય કરવામાં આવી હોવાનો મુદ્દો સામે આવ્યો છે.

TV9ના હાથમાં આવેલા ચાર્ટમાં ડેરીમાં ઉપયોગમાં લેવાતી વિવિધ પ્રોડક્ટ્સ અને તેમની ખરીદીના ભાવ દર્શાવવામાં આવ્યા છે. આ ભાવની સરખામણી કરતાં બંને ડેરીઓ વચ્ચે સ્પષ્ટ તફાવત જોવા મળતો હોવાનો દાવો કરવામાં આવ્યો છે. ખાસ કરીને એક જ કોન્ટ્રાક્ટર પાસેથી ખરીદી થતી હોવા છતાં ભાવમાં આટલો તફાવત કેમ છે, તે મોટો પ્રશ્ન છે.

આ મામલે જે કંપનીનું નામ સામે આવ્યું છે તે મહાકાળી એગ્રો હોવાનું જણાવવામાં આવ્યું છે. અહેવાલમાં આ કંપનીનો બાબુ બરદાન સાથે કથિત સંબંધ હોવાનો દાવો પણ કરવામાં આવ્યો છે. જો એક જ સપ્લાયર પાસેથી એક જ પ્રકારની પ્રોડક્ટની ખરીદી અલગ-અલગ ભાવે થતી હોય, તો તેની પાછળનું કારણ શું છે? શું ટેન્ડર પ્રક્રિયામાં યોગ્ય સ્પર્ધા અને પારદર્શિતા જાળવવામાં આવી હતી? આ તમામ સવાલોના જવાબ મળવા જરૂરી છે.

પશુપાલકોના હિતોનું શું?

સાબર ડેરી અને દૂધસાગર ડેરીની ખરીદીના ભાવમાં જોવા મળતા તફાવત અને સંબંધિત કંપનીઓ અંગે સામે આવેલા દસ્તાવેજોએ ડેરીના વહીવટ સામે અનેક સવાલો ઊભા કર્યા છે. ડેરીનો મુખ્ય હેતુ પશુપાલકોના હિતોનું રક્ષણ કરવાનો અને તેમને યોગ્ય આર્થિક લાભ પહોંચાડવાનો હોવો જોઈએ. પરંતુ જો કાચા માલની ખરીદીમાં બિનજરૂરી ઊંચા ભાવ ચૂકવવામાં આવતા હોય, તો તેની અસર અંતે ડેરીની આર્થિક સ્થિતિ અને પશુપાલકોના હિતો પર પડી શકે છે.

આ સમગ્ર મામલે સાબર ડેરીના સત્તાધીશો અને સંબંધિત કંપનીઓએ ખરીદીના ભાવમાં તફાવત, ટેન્ડર પ્રક્રિયા અને કંપનીઓ સાથેના કથિત સંબંધો અંગે સ્પષ્ટતા કરવી જરૂરી છે. સાથે જ સંબંધિત દસ્તાવેજોની સ્વતંત્ર તપાસ કરવામાં આવે અને જો કોઈ ગેરરીતિ સાબિત થાય તો જવાબદારો સામે કાર્યવાહી કરવામાં આવે તેવી માગ ઊઠી રહી છે.

નોંધ : અહીં આપવામાં આવેલા દસ્તાવેજ સોશિયલ મીડિયા પર વાયરલ થયેલ છે. 

અમદાવાદ નિર્ણયનગર અંડરપાસ નજીક AMC પ્લોટમાં આગ, વિજય ઇન્ફ્રાના મટિરિયલનો નાશ

Published On - 6:56 pm, Wed, 18 November 26

Follow Us
Loading...
Unable to load recommendations.