ડીઝલ સંકટ ! જસદણ યાર્ડમાં જણસીના ઢગ, લાખોના નુકસાનનો ભય, ગુજરાતમાં કૃષિ બજાર પ્રભાવિત

ગુજરાતના જસદણ APMC (એગ્રીકલ્ચરલ પ્રોડ્યુસ માર્કેટ કમિટી) માં ડીઝલની ગંભીર અછતને કારણે સમગ્ર પરિવહન વ્યવસ્થા સંપૂર્ણપણે ઠપ થઈ ગઈ છે. આ સંકટ હવે માત્ર વાહનવ્યવહાર પૂરતું સીમિત નથી રહ્યું, પરંતુ કૃષિ બજારો પર પણ તેની વ્યાપક અને ગંભીર અસરો જોવા મળી રહી છે. જસદણ માર્કેટિંગ યાર્ડમાં ડીઝલની અછતને કારણે ટ્રાન્સપોર્ટ વ્યવસ્થા ખોરવાઈ જતાં કપાસ, મગફળી, તલ, મગ અને ચણા જેવી અનેક જણસીઓના મોટા થપ્પા લાગી ગયા છે.

આ સ્થિતિને કારણે વેપારીઓનો માલ યાર્ડના શેડમાં જ અટવાઈ પડ્યો છે. તેનાથી ખેડૂતોને પોતાનો માલ યાર્ડમાં ઉતારવામાં ભારે મુશ્કેલીઓનો સામનો કરવો પડી રહ્યો છે. ટ્રાન્સપોર્ટના ભાડામાં પણ અસાધારણ વધારો થયો છે. જે ભાડું પહેલા 6,000 રૂપિયા હતું, તે હવે 10,000 રૂપિયા સુધી પહોંચી ગયું છે, જે વેપારીઓને પરવડી રહ્યું નથી. ભાડાના વધારા ઉપરાંત, અગાઉથી ખરીદેલ માલનો નિકાલ ન થવાથી વેપારીઓ નવો માલ ખરીદવામાં અસમર્થ બન્યા છે. માલ યાર્ડમાંથી બહાર ન નીકળી શકવાનું મુખ્ય કારણ ડીઝલની અછત છે. ટ્રક ચાલકો ડીઝલ પુરાવવા પેટ્રોલ પંપ પર જાય છે, ત્યારે તેમને ડીઝલ ઉપલબ્ધ ન હોવાનું જણાવાય છે.

આ સંકટ ખેડૂતો પર પણ સીધી અસર કરી રહ્યું છે. ખેડૂતો ટ્રેક્ટર દ્વારા પોતાનો માલ યાર્ડ સુધી લાવે છે, પરંતુ ડીઝલની અછતને કારણે તેઓ તેમ કરી શકતા નથી. ઘણા ખેડૂતો કેરબામાં ડીઝલ લેવા જાય છે, પરંતુ તેમને ડીઝલ આપવાનો ઇનકાર કરવામાં આવે છે. આના પરિણામે, યાર્ડમાં જૂનો માલ ઉપડતો નથી અને નવા માલની આવક પણ મોટા પાયે પ્રભાવિત થઈ રહી છે. વેપારીઓ અને ખેડૂતો બંનેમાં આ ગંભીર પરિસ્થિતિને કારણે ચિંતાનો માહોલ છે.

સૌથી મોટી ચિંતાનો વિષય એ છે કે જો અચાનક વરસાદ વરસે તો ખુલ્લામાં પડેલો હજારો ટન કૃષિ જણસનો માલ પલળી જવાની શક્યતા છે. આવા કિસ્સામાં ખેડૂતો અને વેપારીઓને લાખો રૂપિયાનું મોટું નુકસાન ભોગવવાનો વારો આવી શકે છે. સામાન્ય રીતે, માલ બહાર કાઢવા અને ફેક્ટરીઓ સુધી પહોંચાડવા માટે દરરોજ 70 થી 80 ટ્રક કે નાના-મોટા વાહનોની અવરજવર થતી હોય છે. પરંતુ હાલ ડીઝલની અછતને કારણે આ સંખ્યા ઘટીને માત્ર 15 થી 20 વાહનો પર આવી ગઈ છે, જે 70% ના ઘટાડાને સૂચવે છે.

ડીઝલ ન મળવું એ એક મોટો પ્રશ્ન છે, અને તેની સાથે ભાવ વધારો અને બ્લેક માર્કેટિંગ પણ એક મોટી સમસ્યા બની ગઈ છે. પેટ્રોલ પંપ પર ફક્ત જાણીતા કે નજીકના લોકોને જ ડીઝલ આપવામાં આવે છે, જ્યારે અન્ય વાહનચાલકોને બે-ત્રણ કિલોમીટર લાંબી લાઈનોમાં ઊભા રહેવું પડે છે, છતાં પણ ડીઝલ મળતું નથી. હાલ સૌની નજર ડીઝલ સપ્લાય ક્યારે સામાન્ય થાય છે તેના પર ટકેલી છે.

અમદાવાદની મેડિકલ કોલેજ હોસ્ટેલમાં દારૂ પાર્ટી ! વિદ્યાર્થીઓના શોષણના આરોપો, જુઓ Video