Breaking News : અમદાવાદની મેડિકલ કોલેજ હોસ્ટેલમાં દારૂ પાર્ટી ! વિદ્યાર્થીઓના શોષણના આરોપો, જુઓ Video

અમદાવાદની જાણીતી એએમસી સંચાલિત એનએચએલ મેડિકલ કોલેજ ફરી એકવાર વિવાદના વમળમાં ફસાઈ છે. અખિલ ભારતીય વિદ્યાર્થી પરિષદ (ABVP) દ્વારા કોલેજની હોસ્ટેલમાં દારૂની મહેફિલ અને નશીલા પદાર્થોના સપ્લાય અંગે ગંભીર આક્ષેપો કરવામાં આવ્યા છે, જેના પગલે ખળભળાટ મચી ગયો છે. ABVPએ આ અંગેનો એક વીડિયો પણ જાહેર કર્યો છે, જેમાં હોસ્ટેલ પરિસરમાં દારૂની ખાલી બોટલો અને મહેફિલનો માહોલ દેખાય છે.

ABVPના આક્ષેપો અનુસાર, હોસ્ટેલના રેક્ટર દારૂના સપ્લાયમાં સીધી રીતે સંકળાયેલા છે. આ ઉપરાંત, બહારના વિદ્યાર્થીઓને હોસ્ટેલના રૂમમાં ગેરકાયદેસર રીતે રહેવા દેવા માટે પૈસા લેવામાં આવે છે. સિક્યોરિટી એજન્સી પર પણ પ્રતિબંધિત વસ્તુઓ જેવી કે માદક દ્રવ્યો અને દારૂ હોસ્ટેલમાં લઈ જવા માટે દબાણ કરવામાં આવતું હોવાનો દાવો કરવામાં આવ્યો છે. ABVPએ એવો પણ આક્ષેપ કર્યો છે કે હોસ્ટેલમાં રહેતા જૂના વિદ્યાર્થીઓ દ્વારા જુનિયર વિદ્યાર્થીઓનું નિયમિતપણે રેગિંગ કરવામાં આવે છે, જેના કારણે જુનિયર વિદ્યાર્થીઓ ભયના ઓથાર હેઠળ જીવી રહ્યા છે.

આ સમગ્ર મામલાને પગલે ABVPના કાર્યકર્તાઓ NHL મેડિકલ કોલેજ ખાતે રજૂઆત કરવા પહોંચ્યા હતા. તેમણે જણાવ્યું હતું કે સામાન્ય વિદ્યાર્થીઓના ભવિષ્યને બરબાદ કરવાનું કામ અહીંના રેક્ટર અને વોર્ડન દ્વારા કરવામાં આવી રહ્યું છે. ABVPએ સ્પષ્ટપણે માંગ કરી છે કે આ સમગ્ર કૌભાંડમાં સંકળાયેલા તમામ જવાબદારો, જેમાં રેક્ટર, વોર્ડન અને ડીનનો સમાવેશ થાય છે, તેમની સામે કડકમાં કડક કાર્યવાહી કરવામાં આવે.

બીજી તરફ, NHL મેડિકલ કોલેજ તંત્ર દ્વારા આ મામલે તાત્કાલિક તપાસ શરૂ કરવામાં આવી છે. કોલેજના અધિકારીએ મીડિયાને જણાવ્યું હતું કે, તેમને અત્યાર સુધી દારૂની મહેફિલ કે અન્ય ગેરરીતિઓ અંગે કોઈ લેખિત, મૌખિક કે ડિજિટલ સિસ્ટમ દ્વારા ફરિયાદ મળેલી નથી. અધિકારીએ ખાલી બોટલો કે ક્યાંથી મળી તે અંગે કોઈ ચોક્કસ માહિતી ન હોવાનું પણ જણાવ્યું હતું અને રેક્ટર કે સિક્યુરિટી અંગે કોઈ ટિપ્પણી કરવાનો ઇનકાર કર્યો હતો. જોકે, કોલેજે સ્વીકાર્યું છે કે તેમણે આ સંદર્ભમાં એક તપાસ સમિતિની રચના કરી છે અને તેની કાર્યવાહી પ્રગતિમાં છે.

ABVPએ તપાસ સમિતિને નક્કર પુરાવા, જેમાં વીડિયો ફૂટેજ અને અન્ય દસ્તાવેજોનો સમાવેશ થાય છે, સુપરત કર્યા હોવાનો દાવો કર્યો છે. આ ગંભીર આક્ષેપોને કારણે કોલેજની પ્રતિષ્ઠા દાવ પર લાગી છે અને તપાસના અંતે શું બહાર આવે છે તે જોવું રહ્યું.