ઇન્ડિગો સંકટ વચ્ચે આજે પણ અનેક ફ્લાઇટ રદ, અમદાવાદ એરપોર્ટ પર અટવાયા અનેક મુસાફરો, Videoમાં જુઓ લાગણીસભર દ્રશ્યો

ઇન્ડિગો એરલાઇન્સના સંકટને કારણે આજે પણ અનેક ફ્લાઇટો રદ થતા અમદાવાદ એરપોર્ટ પર ભારે અફરાતફરી જોવા મળી હતી. ફ્લાઇટો રદ થવાને કારણે અનેક મુસાફરો અટવાઈ ગયા છે અને તેમને ભારે હાલાકીનો સામનો કરવો પડી રહ્યો છે. છેલ્લા ત્રણ દિવસથી ફ્લાઇટો રદ થવાનો આ સિલસિલો ચાલી રહ્યો છે, જેના પગલે એરપોર્ટ પર લાગણીસભર દ્રશ્યો પણ સર્જાયા છે. પોતાની ફ્લાઇટ રદ થતા કેટલાક હવાઈ મુસાફરો કેમેરા સામે રડી પડ્યા હતા.

આ પરિસ્થિતિથી અસરગ્રસ્ત મુસાફરોમાં વિવિધ વર્ગના લોકોનો સમાવેશ થાય છે. એક સૈનિક પોતાની ડ્યુટી પર સમયસર ન પહોંચી શકવાને કારણે પરેશાન હતા. તેમણે જણાવ્યું હતું કે, સૈનિકને સમયનો પાબંદ રહેવું પડે છે અને રજા પૂરી કરીને સમયસર ન પહોંચવાથી અધિકારીને જવાબ આપવો મુશ્કેલ બને છે. દૂરના સ્થળોએથી સીધી ટ્રેન મળતી નથી અને હવે ફ્લાઇટની પણ આવી જ સમસ્યા ઉભી થઈ છે. એક રમતવીર પોતાની મહત્વપૂર્ણ ટુર્નામેન્ટ ગુમાવી ચૂક્યા હતા.

અમદાવાદ એરપોર્ટ પર અટવાયા મુસાફરો

મુસાફરોએ તેમની આપવીતી વર્ણવતા કહ્યું કે, ફ્લાઇટ રદ થવાને કારણે તેમને મોંઘા ભાડા ચૂકવવા પડ્યા હતા, જે સામાન્ય ભાડા કરતાં ત્રણથી ચાર ગણા વધુ હતા. કેટલાક મુસાફરોએ બે વાર ટિકિટ કરાવી હતી અને લગભગ 30,000 થી 35,000 રૂપિયાનું આર્થિક નુકસાન વેઠ્યું હતું. એક મુસાફરે જણાવ્યું હતું કે, તેમણે ઇન્ડિગોમાંથી રીટર્ન અને જવાની બંને ફ્લાઇટો લીધી હતી. ફ્લાઇટ મોડી થવાને કારણે તેઓ પોતાના ગંતવ્ય સ્થાન સુધી પહોંચી શકશે નહીં, કારણ કે બીજું કોઈ પરિવહન ઉપલબ્ધ નથી અને ટ્રેનમાં ત્રણ-ત્રણ દિવસ લાગે છે. આના કારણે તેઓ જે પ્રોજેક્ટ પર 6-7 મહિનાથી મહેનત કરી રહ્યા હતા, તે બધી મહેનત વ્યર્થ ગઈ હતી. આવા અવસરો વારંવાર મળતા નથી.

જુઓ Video

બીજા એક મુસાફર, જે અમદાવાદથી લખનઉ જઈ રહ્યા હતા, તેમણે જણાવ્યું કે તેમની પાસે બોર્ડિંગ પાસ હોવા છતાં છેલ્લા બે દિવસથી તેઓ એરપોર્ટ પર ધક્કા ખાઈ રહ્યા છે. તેમને “ડીલે, ડીલે, ડીલે” સિવાય કોઈ જવાબ મળ્યો ન હતો. તેમને એરપોર્ટ પર મેનેજમેન્ટ તરફથી ભોજન કે પાણી જેવી કોઈ મદદ પણ મળી નહોતી. મેનેજમેન્ટ “કાલે જશે, કાલે જશે” કહીને ટાળી રહ્યું હતું, અને પછી અંતે ફ્લાઇટ રદ કરી દેવામાં આવી. મુસાફરોને આખી રાત એરપોર્ટ પર જાગીને અને સૂઈને વિતાવવી પડી હતી.