પહેલો વરસાદ અને ખૂલી ગઈ પોલ, નવસારી મનપાના પ્રિ-મોન્સૂન કામગીરીના દાવા પોકળ! જુઓ Video
નવસારી જિલ્લામાં વરસાદ 15 દિવસ મોડો વરસ્યો છે, જેના કારણે ડાંગરની વાવણી પર અસર થઈ છે. ખેડૂતો હજુ પણ યોગ્ય વરસાદની રાહ જોઈ રહ્યા છે. ત્યારે અહીં બીજી તરફ પહલ જ વરસાદે ઠેર ઠેર પાણી ફરી વળ્યા છે.
ગુજરાતના દક્ષિણ ભાગમાં આવેલા નવસારી જિલ્લામાં આ વર્ષે ચોમાસાના આગમનમાં નોંધપાત્ર વિલંબ જોવા મળ્યો છે. જૂન મહિનાના અંત સુધીમાં પણ વાવણીલાયક વરસાદ ન વરસતા ખેડૂતોમાં ભારે ચિંતા વ્યાપી છે. ખાસ કરીને ડાંગર જેવા મુખ્ય પાકની રોપણી માટે યોગ્ય વરસાદની ખેડૂતો કાગડોળે રાહ જોઈ રહ્યા છે, કારણ કે આ પ્રદેશમાં મોટાભાગની ખેતી વરસાદી પાણી પર આધારિત છે.
દક્ષિણ ગુજરાતમાં 1 લાખ હેક્ટરથી વધુ જમીનમાં ડાંગરની વાવણી થાય છે, જેમાં નવસારી જિલ્લાનો મોટો ફાળો છે. વરસાદ 15 દિવસ મોડો શરૂ થતા ખેડૂતોની ચિંતા વધી હતી, પરંતુ હવે ધીમી ધારે વરસાદની શરૂઆત થઈ છે, જેનાથી વાવણીની આશા જીવંત બની છે.
15 દિવસ મોડો વરસાદ
નવસારી શહેર અને જિલ્લામાં સવારથી જ વાદળછાયું વાતાવરણ અને વરસાદી માહોલ છવાયો છે, જેના કારણે વાતાવરણમાં ઠંડક પ્રસરી છે. નવસારી શહેરમાં અત્યાર સુધીમાં અંદાજે 1 ઇંચ જેટલો વરસાદ નોંધાયો છે. જોકે, આ વરસાદ ડાંગરની રોપણી માટે હજુ પણ અપૂરતો હોવાનું ખેડૂતો જણાવી રહ્યા છે. જો આ રીતે જ ધીમી ધારે વરસાદ ચાલુ રહેશે, તો ખેડૂતો વાવણી શરૂ કરી શકશે. પરંતુ, 15 દિવસ મોડો વરસાદ થવાના કારણે ડાંગરનો પાક પણ 15 દિવસ મોડો પાકશે, જે કૃષિ ઉત્પાદન ચક્ર અને સંબંધિત ઉદ્યોગો પર સીધી અસર કરશે. ખેડૂતો હજુ પણ વરસાદની ગતિ અને સાતત્ય અંગે અવઢવમાં છે. તેમને ભય છે કે વાવણી માટે યોગ્ય સમય નહીં મળે તો પાકને નુકસાન થશે.
ચોમાસાના વિલંબ અને વરસાદની અનિશ્ચિતતા વચ્ચે, નવસારી શહેરમાં વરસાદની શરૂઆત સાથે જ માળખાકીય સુવિધાઓની પોલ પણ ખુલી ગઈ છે. નવસારી શહેરના વિવિધ વિસ્તારોમાં, ખાસ કરીને વિજલપોર જેવા વિસ્તારોમાં, સામાન્ય વરસાદમાં પણ પાણી ભરાવાના બનાવો બન્યા છે.
પાણી ભરાવાના કારણે ભારે હાલાકીનો સામનો
મહાનગરપાલિકા દ્વારા પ્રિ-મોન્સૂન કામગીરી અંગે કરવામાં આવેલા મોટા દાવાઓ આ સાથે જ પોકળ સાબિત થયા છે. વન ગંગા સોસાયટી જેવા વિસ્તારોમાં તો 1000થી વધુ લોકોને પાણી ભરાવાના કારણે ભારે હાલાકીનો સામનો કરવો પડ્યો છે. આ સ્થિતિ નાગરિકો માટે મુશ્કેલી ઊભી કરે છે અને સ્થાનિક પ્રશાસનની વરસાદ પૂર્વેની તૈયારીઓ પર ગંભીર સવાલો ઊભા કરે છે.
સમગ્ર દક્ષિણ ગુજરાત, જેમાં સુરત, વલસાડ અને ડાંગ જેવા જિલ્લાઓ પણ સામેલ છે, ત્યાં ડાંગરની ખેતી મુખ્ય છે. આ તમામ વિસ્તારોમાં વરસાદના વિલંબથી ખેતી પર નકારાત્મક અસર પડી રહી છે. ખેડૂતોને આશા છે કે સારો અને નિયમિત વરસાદ થશે તો જ તેમનો પાક બચાવી શકાશે. જોકે, હાલની સ્થિતિ જોતા, નવસારી અને આસપાસના વિસ્તારોમાં વરસાદ માત્ર ઠંડક લાવવા પૂરતો જ રહ્યો છે, વાવણી અને કૃષિ ઉત્પાદન માટે હજુ પણ ઘણું બાકી છે. શહેરી વિસ્તારોમાં પાણી ભરાવાની સમસ્યા સ્થાનિક પ્રશાસન માટે તાત્કાલિક કાર્યવાહીનો સંકેત આપે છે, જેથી ભવિષ્યમાં આવી સ્થિતિ ટાળી શકાય.
(ઈનપુટ – નીલેશ ગામીત, નવસારી)
વિદ્યાર્થીના કાનનો પડદો તૂટવા મામલે હવે CCTV આવ્યા સામે!
Published On - 3:43 pm, Tue, 30 June 26
