29 ઓક્ટોબરના મહત્વના સમાચાર : ગુજરાતમાં આગામી 3 દિવસ હળવા વરસાદની આગાહી, દક્ષિણ ગુજરાત અને સૌરાષ્ટ્રમાં વરસી શકે છે વરસાદ

સાબર ડેરીના ચેરમેન અને વાઇસ ચેરમેન પદ માટે ચૂંટણી જાહેર થતાં ડેરીમાં રાજકીય ગરમાવો જોવા મળી રહ્યો છે. આગામી 6 નવેમ્બરના રોજ બંને પદ માટે ચૂંટણી યોજાશે. સાબર ડેરીમાં ચેરમેન અને વાઇસ ચેરમેનની મુદત અઢી વર્ષની હોય છે. હાલમાં શામળ પટેલ ચેરમેન અને ઋતુરાજ પટેલ વાઇસ ચેરમેન તરીકે કાર્યરત છે. હવે અઢી વર્ષની મુદત પૂર્ણ થવાની પ્રક્રિયા વચ્ચે બંને પદ પર ફરીથી આ જ નેતાઓને જવાબદારી સોંપવામાં આવશે કે નવા ચહેરાઓને તક મળશે તે અંગે ચર્ચાઓ તેજ બની છે. ચૂંટણીની જાહેરાત થતાં જ ડેરીના રાજકારણમાં હલચલ વધી છે અને 6 નવેમ્બરે યોજાનારી ચૂંટણીમાં શું પરિણામ આવશે તેના પર સૌની નજર મંડાઈ છે.

વડોદરાના નરસિંહજીની પોળ વિસ્તારમાં સામૂહિક આપઘાતની ચોંકાવનારી ઘટના સામે આવી છે. અહીં એક માતાએ પોતાના પુત્ર અને પુત્રી સાથે ગળેફાંસો ખાઈ જીવન ટૂંકાવ્યું હોવાનું સામે આવ્યું છે. મૃતક માતા અને બંને સંતાન ‘ઝેપ્સ હેલ્થ કેર’ કંપનીના માલિક પરિવારનાં સભ્યો હોવાનું જાણવા મળ્યું છે. એક જ પરિવારના ત્રણ સભ્યોનાં મોતથી વિસ્તારમાં શોકનો માહોલ છવાયો છે. ઘટનાની જાણ થતાં પોલીસ અને FSLની ટીમ ઘટનાસ્થળે પહોંચી હતી અને તપાસ શરૂ કરી હતી. ત્રણેય મૃતદેહોને પોસ્ટમોર્ટમ માટે મોકલી આપવામાં આવ્યા છે. પરિવારના ત્રણેય સભ્યોએ આ પગલું કયા કારણોસર ભર્યું તે અંગે હાલ તપાસ ચાલી રહી છે. પોલીસ દ્વારા ઘટનાના વિવિધ પાસાઓની તપાસ કરી આપઘાત પાછળનું કારણ જાણવા પ્રયાસ હાથ ધરવામાં આવ્યો છે.

ગુજરાતમાં આગામી ત્રણ દિવસ દરમિયાન કેટલાક વિસ્તારોમાં હળવા વરસાદની શક્યતા છે. હવામાનની આગાહી મુજબ, 29 અને 30 ઓક્ટોબરે દક્ષિણ ગુજરાતના નવસારી, વલસાડ, ડાંગ, દમણ અને દાદરા નગર હવેલીમાં હળવો વરસાદ પડી શકે છે. જ્યારે 30 ઓક્ટોબરે તાપી સહિત દક્ષિણ ગુજરાતના વિવિધ વિસ્તારોમાં વરસાદની શક્યતા છે. આ ઉપરાંત, 30 અને 31 ઓક્ટોબરે સૌરાષ્ટ્રના અમરેલી અને ભાવનગર જિલ્લામાં પણ હળવો વરસાદ વરસી શકે છે. બીજી તરફ, રાજ્યમાં લઘુત્તમ તાપમાનમાં મોટો ફેરફાર થવાની શક્યતા નથી, જોકે મહત્તમ તાપમાનમાં ઘટાડો થઈ શકે છે. त्यामुळे આગામી દિવસોમાં રાજ્યના કેટલાક વિસ્તારોમાં ગરમીથી આંશિક રાહત મળવાની શક્યતા છે.