28 ઓક્ટોબરના મહત્વના સમાચાર : દરિયાકાંઠે ટકરાયું વર્ષ 2026નું પ્રથમ શક્તિશાળી વાવાઝોડું, વાવાઝોડાની અસરને પગલે 50 ટ્રેનો અને 21 ફ્લાઇટ્સ રદ

રાજકોટ સહિત સૌરાષ્ટ્રના રાજકારણમાં વિધાનસભાની ચૂંટણી પહેલાં નવા સમીકરણો રચાઈ રહ્યાં હોવાની ચર્ચા તેજ બની છે. રાજકોટના નેતાઓ ભરત બોઘરા અને નીતિન ભારદ્વાજ દિલ્હીમાં ભાજપના પ્રદેશ નેતા સી.આર. પાટીલ સાથે મુલાકાત દરમિયાન એકસાથે જોવા મળ્યા હતા. એક સમયે એકબીજાની સામે હોવાનું મનાતા બંને નેતાઓની આ મુલાકાત રાજકીય વર્તુળોમાં ચર્ચાનો વિષય બની છે. નીતિન ભારદ્વાજને પૂર્વ મુખ્યમંત્રી વિજય રૂપાણીના નજીકના માનવામાં આવે છે. વિજય રૂપાણીએ મુખ્યમંત્રી પદ છોડ્યા બાદ ભારદ્વાજ રાજકીય રીતે સાઇડલાઇન થયા હોવાની ચર્ચા હતી. આ ઉપરાંત સી.આર. પાટીલ જૂથ સાથે પણ તેમના કોલ્ડવોરની ચર્ચાઓ સામે આવી હતી. જોકે, મહાનગરપાલિકાની ચૂંટણીના સમયથી નીતિન ભારદ્વાજ ફરી સક્રિય થયા હોવાનું જોવા મળ્યું છે. હવે દિલ્હીમાં સી.આર. પાટીલ સાથેની મુલાકાત અને ભરત બોઘરા સાથેની હાજરીને પગલે રાજકોટના રાજકારણમાં નવા સમીકરણો રચાઈ રહ્યાં હોવાની અટકળો શરૂ થઈ છે. આગામી વિધાનસભાની ચૂંટણી પહેલાં આ મુલાકાતની રાજકીય અસરો શું રહેશે, તેના પર સૌની નજર રહેશે.

ગુજરાતના વાતાવરણમાં આગામી 24 કલાક બાદ પલટો આવવાની હવામાન વિભાગે આગાહી કરી છે. રાજ્યના કેટલાક વિસ્તારોમાં વરસાદી ઝાપટાં પડી શકે છે. આગાહી મુજબ, 29 ઓક્ટોબરે દક્ષિણ ગુજરાતના નવસારી, વલસાડ, દમણ અને દાદરા નગર હવેલીમાં હળવો વરસાદ થવાની સંભાવના છે. જ્યારે 30 ઓક્ટોબરે દક્ષિણ ગુજરાત અને દક્ષિણ સૌરાષ્ટ્રના વિસ્તારોમાં વાદળછાયું વાતાવરણ છવાઈ શકે છે. હવામાનમાં થનારા આ ફેરફારને પગલે રાજ્યના કેટલાક વિસ્તારોમાં છૂટાછવાયા વરસાદી ઝાપટાં જોવા મળી શકે છે. જોકે, વરસાદની તીવ્રતા અને અસર અંગે હવામાન વિભાગની આગામી આગાહી પર નજર રહેશે.

જૂનાગઢ શહેરમાં શંકાસ્પદ ઘીના જથ્થા ઝડપાવાનો સિલસિલો યથાવત રહ્યો છે. ઝાંઝરડાની ચિત્રકૂટ સોસાયટીમાં આવેલા પૂજા એપાર્ટમેન્ટની એક દુકાનમાંથી SOG પોલીસે બાતમીના આધારે દરોડો પાડી 55 કિલો શંકાસ્પદ ઘીનો જથ્થો ઝડપી પાડ્યો હતો. પોલીસે સ્થળ પરથી શ્રી કાઠ્યાવાડ, વ્રજ મટુકી અને કેશવ નામની બ્રાન્ડના ઘી સહિત કુલ રૂ. 13 હજારનો મુદ્દામાલ કબજે કર્યો હતો. આ મામલે પોલીસે ફૂડ એન્ડ ડ્રગ્સ વિભાગને જાણ કરી છે અને શંકાસ્પદ ઘીના નમૂનાઓ FSLમાં તપાસ માટે મોકલવામાં આવ્યા છે. મહત્વનું છે કે, જૂનાગઢમાં સતત ત્રીજા દિવસે શંકાસ્પદ ઘીનો જથ્થો ઝડપાયો છે. બે દિવસ અગાઉ દોલતપરા નજીકથી પણ 500 કિલો શંકાસ્પદ ઘીનો જથ્થો મળી આવ્યો હતો. પ્રાથમિક તારણ મુજબ, બંને સ્થળેથી ઝડપાયેલા શંકાસ્પદ ઘીનો જથ્થો એક જ માલિકનો હોવાની આશંકા છે. હવે તપાસમાં ઘીની ગુણવત્તા અને તેના સ્રોત અંગે વધુ વિગતો સામે આવે તેવી શક્યતા છે.

વર્ષ 2026નું પ્રથમ શક્તિશાળી વાવાઝોડું ‘અર્નબ’ દરિયાકાંઠે ટકરાતાં જ ભારે પવન અને વરસાદે તબાહી મચાવી હતી. લેન્ડફોલ દરમિયાન 135 કિમી પ્રતિ કલાકની ઝડપે પવન ફૂંકાતાં આંધ્રપ્રદેશના અનેક જિલ્લાઓમાં ધોધમાર વરસાદ વરસ્યો હતો. વાવાઝોડાની ગંભીર અસરને પગલે મુસાફરોની સુરક્ષાને ધ્યાનમાં રાખીને 50 ટ્રેનો અને 21 ફ્લાઇટ્સ રદ કરવામાં આવી હતી. બીજી તરફ, ‘અર્નબ’ વાવાઝોડાની અસર મધ્યપ્રદેશથી લઈને ઉત્તરપ્રદેશ સુધી જોવા મળી રહી છે. વાવાઝોડાને કારણે અનેક વિસ્તારોમાં હવામાનમાં પલટો આવતાં જનજીવન અને વાહનવ્યવહારને અસર પહોંચી છે.