26 ઓક્ટોબરના મહત્વના સમાચાર : દેશ પર ફરી વાવાઝોડાનો ખતરો, બંગાળની ખાડીમાં સર્જાયેલું લો-પ્રેશરડિપ્રેશનમાં ફેરવાયું

ચોમાસું પૂરું થતાં જ શહેરમાં હવાની ગુણવત્તા બગડવા લાગી છે. એર ક્વોલિટી ઇન્ડેક્સ (AQI) 187 પર પહોંચતાં નાગરિકોમાં ચિંતા વધી છે. શહેરના હેબતપુર, ખોડિયાર, સોલા અને વસંતનગર સહિતના અનેક વિસ્તારોમાં AQI 200ને પાર થયો છે. જ્યારે રાયખડ અને સેટેલાઈટ વિસ્તારમાં હવાની ગુણવત્તા ચિંતાજનક બની છે. પ્રદૂષિત હવાને કારણે અસ્થમાના દર્દીઓને ઘરની બહાર ન નીકળવાની સલાહ આપવામાં આવી છે. આ ઉપરાંત બાળકો અને વૃદ્ધોને પણ શક્ય હોય ત્યાં સુધી ઘરમાં રહેવા અને પ્રદૂષિત હવાના સંપર્કથી બચવા સૂચના આપવામાં આવી છે.

અમેરિકાના રાષ્ટ્રપ્રમુખ ડોનાલ્ડ ટ્રમ્પના બીજા કાર્યકાળ દરમિયાન ઇમિગ્રન્ટ્સ સામેની કાર્યવાહી તેજ બની છે. અહેવાલો અનુસાર, છેલ્લા 18 મહિનામાં 9.8 લાખથી વધુ ઇમિગ્રન્ટ્સને અમેરિકાની બહાર મોકલવામાં આવ્યા છે. આ કાર્યવાહીમાં ઓછામાં ઓછા બે વર્ષથી અમેરિકામાં રહેતા લોકોનો પણ સમાવેશ થયો છે. દાવા અનુસાર, દેશમાંથી હકાલપટ્ટી કરાયેલા 71 ટકા લોકોનો કોઈ ગુનાહિત રેકોર્ડ નહોતો. આ ઉપરાંત, આશરે 1.7 લાખ લોકોએ સ્વૈચ્છિક રીતે અમેરિકા છોડવાનો નિર્ણય લીધો હતો. ટ્રમ્પ સરકારની આ નીતિને કારણે અમેરિકામાં વસતા ઇમિગ્રન્ટ્સમાં ચિંતા વધી છે.

ભાજપના પ્રદેશ પ્રભારી તરુણ ચુગ એક દિવસના ગુજરાત પ્રવાસે આવી રહ્યા છે. આ દરમિયાન તેઓ સંગઠનને લગતી વિવિધ બેઠકોમાં હાજરી આપશે. બપોરે અઢી વાગ્યે મુખ્યમંત્રીના નિવાસસ્થાને રાજ્ય સરકારના મંત્રીઓ સાથે બેઠક યોજાશે. ત્યારબાદ સાંજે સવા પાંચ વાગ્યે કમલમ્ ખાતે યુવા મોરચાની ટીમ અને સેવાયાત્રીઓ સાથે બેઠક યોજાશે. આ બેઠકોમાં સંગઠનને લગતા વિવિધ મુદ્દાઓ પર ચર્ચા થવાની શક્યતા છે.

યુરોપના ફ્રાંસ, ઇટલી અને સ્પેન સહિત પાંચ દેશોમાં મોંઘવારીના વિરોધમાં શરૂ થયેલું આંદોલન હિંસક બન્યું છે. સરકાર સામે વિરોધ નોંધાવવા આશરે 8 લાખ લોકો રસ્તા પર ઉતર્યા હતા. પ્રદર્શન દરમિયાન પથ્થરમારો અને આગચંપીની ઘટનાઓ બની હતી. સ્થિતિને કાબૂમાં લેવા સુરક્ષા દળોએ પ્રદર્શનકારીઓ પર લાઠીચાર્જ કર્યો હતો. કાયદો હાથમાં લેનારા 2 હજારથી વધુ લોકોની અટકાયત કરવામાં આવી હોવાના અહેવાલ છે.

બંગાળની ખાડીમાં સર્જાયેલી સિસ્ટમ વધુ મજબૂત બની રહી છે. 26 ઑક્ટોબર સુધીમાં તે ચક્રવાતી વાવાઝોડામાં ફેરવાય તેવી શક્યતા છે. 28 ઑક્ટોબરની સવારે આંધ્રપ્રદેશમાં બાપટલા અને વિશાખાપટ્ટનમ વચ્ચે વાવાઝોડું ત્રાટકી શકે છે. પવનની ઝડપ 125 કિલોમીટર પ્રતિ કલાક સુધી પહોંચવાની શક્યતા છે. ઓડિશામાં રેડ એલર્ટ જાહેર કરાયું છે, જ્યારે તમિલનાડુ અને પુડુચેરીમાં ભારે વરસાદથી મુશ્કેલીઓ વધી છે.