30 નવેમ્બરના મહત્વના સમાચાર : મહેસાણામાં ચાઈનીઝ દોરીથી ગળું કપાઈ જતા 25 વર્ષીય યુવકનું મોત

સુરત: સચિનના પાલી ગામમાં ત્રણ બાળકીઓના શંકાસ્પદ મોત થયા છે. શુક્રવારે રાત્રે બાળકીઓએ આઈસ્ક્રીમ ખાધો હતો, જે પછી રાત્રે પાંચ જેટલી બાળકીઓ તાપણા પાસે બેઠી હતી. મોંમાં ધુમાડો જતા બાળકીઓને ઉલટી થવા લાગી હતી. જે પછી પહેલાં ખાનગી અને પછી સિવિલ હોસ્પિટલમાં બાળકીઓને ખસેડાઈ હતી. સારવાર દરમિયાન  8, 12 અને 14 વર્ષની બાળકીઓના મોત થયા છે. PM બાદ જ મોતનું સાચું કારણ સામે આવશે.

બંગાળની ખાડીમાં વાવાઝોડા ફેંગલે વિકરાળ રૂપ ધારણ કર્યું છે. દરિયામાં ભયાવહ મોજા ઉછળતા જોવા મળી રહ્યા છે. વાવાઝોડાની અસરને પગલે તમિલનાડુમાં ભારે વરસાદ વરસી રહ્યો છે. દક્ષિણ ભારતના અનેક રાજ્યોમાં ભારેથી અતિભારે વરસાદની શક્યતા છે. સાંજે પોંડિચેરી અને તમિલનાડુ વચ્ચે વાવાઝોડું  ટકરાઈ શકે છે. 90 કિ.મી. પ્રતિ કલાકની ઝડપે પવન ફૂંકાઈ શકે છે. તમિલનાડુમાં શાળા-કોલેજોમાં રજા જાહેર કરવામાં આવી છે. લોકોને કામ વગર ઘરની બહાર ન નીકળવાની સલાહ આપવામાં આવી છે. સતર્કતાના ભાગ રૂપે NDRF અને SDRFની ટીમો તૈનાત કરવામાં આવી છે.

મહેસાણા: ચાઈનીઝ દોરીથી ગળું કપાઈ જતા યુવકનું મોત થયુ છે. અંબલિયાસણ બ્રિજ પર બાઈક પર સવાર યુવકનું ગળું કપાયું. બલિયાસણના 25 વર્ષીય યુવકનું ચાઈનીઝ દોરીને કારણે મોત થયુ છે. યુવક પત્ની સાથે જઈ રહ્યો હતો તે દરમિયાન ઘટના બની.

રાજકોટ: યુવક અને સગીરાના લટકતી હાલતમાં મૃતદેહ મળ્યા છે. 16 વર્ષીય સગીરાનું 21 વર્ષીય યુવકે અપહરણ કર્યું હોવાની વિગત છે. મૃતક સગીરા વિંછીયાના મોટી માત્રા ગામની હોવાનું સામે આવ્યું.
બન્નેએ પ્રેમ પ્રકરણમાં આપઘાત કર્યો હોવાનું પોલીસનું અનુમાન છે. પોલીસે બન્નેના મૃતદેહને પોસ્ટમાર્ટમ અર્થે હોસ્પિટલ ખસેડાયા.

સાબરકાંઠા: હિંમતનગર પારસ કોર્પોરેશનમાં IT વિભાગનું સર્ચ ચાલી રહ્યુ છે. સતત 14 કલાકથી IT વિભાગની તપાસની કાર્યવાહી. કાર્યવાહી દરમિયાન જ એક શખ્સ ₹3.50 લાખનું આંગડિયું કરવા પહોંચ્યો. ITની ટીમ દ્વારા પૂછપરછ હાથ ધરવામાં આવી. છેલ્લાં ઘણાં સમયથી મોટી રકમના વ્યવહારો થયાનો ખુલાસો થયો. મોટા વ્યવહારોને ધ્યાનમાં લઈને સર્ચ હાથ ધરાયું.

અમદાવાદમાં છેલ્લા પાંચ દિવસથી રાત્રિ દરમિયાન કોમ્બિંગ આવી રહ્યું છે. જે રીતે છેલ્લા થોડા સમયથી શહેરમાં કાયદો વ્યવસ્થાની પરિસ્થિતિને લઈને સવાલો થયા હતા ત્યારે હવે પોલીસ પણ સતર્ક બની છે અને શહેરના તમામ વિસ્તારોમાં પેટ્રોલિંગ તેમજ વાહન ચેકિંગ કરવામાં આવી રહ્યું છે. આ ઉપરાંત કોઈ વ્યક્તિ નશાની હાલતમાં હોય, રીઢા ગુનેગારો અને અસામાજિક તત્વો વિરુદ્ધ કાર્યવાહી પણ કરવામાં આવી રહી છે.

ઠંડીને લઈ હવામાન નિષ્ણાત અંબાલાલ પટેલે આગાહી કરી કે ઉત્તર ગુજરાત સહિત મધ્ય ગુજરાતમાં તાપમાનનો પારો ગગડશે. કચ્છમાં પણ ઠંડીનો ચમકારો અનુભવાશે. પશ્ચિમ સૌરાષ્ટ્રમાં પણ તાપમાનનો પારો ગગડશે.

ભરૂચ, નર્મદા અને વડોદરા જિલ્લામાં બેફામ બનેલ ખનીજ માફિયા સામે કાર્યવાહી કરવા AAPના ધારાસભ્ય ચૈતર વસાવાએ માગણી કરી છે. ઉમલ્લા નજીક અજાણ્યા વાહનની અડફેટે જીવ ગુમાવનાર TRB જવાનના શ્રદ્ધાંજલિ કાર્યક્રમમાં ચૈતર વસાવાએ કહ્યું કે બેફામ ખનીજ વહન કરતા વાહનની અડફેટે લોકો જીવ ગુમાવે છે. ચૈતર વસાવાએ તંત્રના પાંચ દિવસનું એલ્ટીમેટમ આપ્યું છે. જો પાંચ દિવસમાં ઓવરલોડ વાહનો સામે કાર્યવાહી નહીં કરવામાં આવે તો પદયાત્રા યોજીને વિરોધ પ્રદર્શન કરશે.