25 ઓક્ટોબરના મહત્વના સમાચાર : સુરતમાં 2 વર્ષીય બાળકીને સ્કૂલ બસ ચાલકે અડફેટે લેતા મોત

અમદાવાદ: 50 જેટલા બાંગ્લાદેશીઓની અટકાયત કરાઈ. તપાસ દરમિયાન અનેક દસ્તાવેજો નકલી હોવાનો ખુલાસો થયો છે. 200થી વધુ શંકાસ્પદ લોકોની ક્રાઈમ બ્રાન્ચે પૂછપરછ કરી. બનાવટી અને નકલી દસ્તાવેજો અંગે હજુ પણ તપાસ યથાવત છે. અનેક લોકો વિરૂદ્ધ કાયદેસરની કાર્યવાહી કરવામાં આવશે.

સુરત: સરથાણામાં સ્કૂલ બસ ચાલકની બેદરકારી સામે આવી છે. 2 વર્ષીય બાળકીને સ્કૂલ બસ ચાલકે અડફેટે લેતા બાળકીનું સારવાર દરમિયાન મોત થયું છે. સરથાણા પોલીસમાં અકસ્માત ફરિયાદ નોંધાઈ છે.

મહારાષ્ટ્ર વિધાનસભા ચૂંટણી પહેલા મહારાષ્ટ્રમાં કોંગ્રેસને મોટો ઝટકો લાગ્યો છે. બાબા સિદ્દીકીના પુત્ર અને બાંદ્રા પૂર્વના ધારાસભ્ય જીશાન સિદ્દીકીએ કોંગ્રેસ છોડી દીધી છે. તેઓ અજિત પવારની એનસીપીમાં જોડાયા હતા. ઝીશાન અજિત પવાર અને સુનીલ તટકરેની હાજરીમાં NCPમાં જોડાયા હતા. એનસીપીએ બાંદ્રા પૂર્વ વિધાનસભાથી ઝીશાન સિદ્દીકીને પોતાના ઉમેદવાર જાહેર કર્યા છે.

વાવ બેઠક પર કોંગ્રેસે ગુલાબસિંહ રાજપુતને ટિકિટ આપી. અનેક ચર્ચાઓ બાદ આખરે કોંગ્રેસે ઉમેદવારનું નામ જાહેર કર્યુ.  વિજય મુહૂર્તમાં ગુલાબસિંહ ઉમેદવારી નોંધાવશે.

બનાસકાંઠાઃ ઉમેદવારી ભરવાના અંતિમ દિવસે પણ કોંગ્રેસમાં ડખા સામે આવ્યા. કોંગ્રેસના નેતા ઠાકરશી રબારીનો કોંગ્રેસ સામે બળાપો કાઢ્યો. બે મહિનાથી ઉમેદવાર ફિક્સ હોવા છતાં અન્ય લોકોને રમાડે છે. કોંગ્રેસમાં  ફિક્સિંગ ચાલી રહ્યું હોવાનો આક્ષેપ કર્યો. જણાવ્યુ કે ઉમેદવાર ફિક્સ હોવા છતાં કોંગ્રેસના નેતાઓ લાગણીઓ સાથે રમ્યા. ઉમેદવાર ફિક્સ છે જેથી હવે ડમી ફોર્મ ભરવાની જરૂર નથી.

દિવાળી વેકેશન પહેલા રાજ્ય સરકારે બોટિંગ પોલિસી જાહેર કરી છે. ગુજરાત ઇનલેન્ડ વેસેલ્સ નોંધણી, સર્વેક્ષણ અને સંચાલન નિયમો 2024ને મુખ્યમંત્રીએ મંજૂરી આપી. 10 મીટરથી ઓછી લંબાઈના પ્લેઝર ક્રાફ્ટ-બોટ-હોડીની નોંધણી-સર્વેક્ષણ અને સલામતીના પગલાંઓ વ્યાપક બનાવવામાં આવ્યા. વોટર સ્પોર્ટ્સ એક્ટિવિટી કે બોટિંગના રજિસ્ટ્રેશન માટે સંબંધિત જિલ્લા મેજિસ્ટ્રેટને અરજી કરવાની રહેશે. વોટરસાઇડ સેફ્ટી કમિટી સમયાંતરે બોટ સંચાલન અને વોટર સ્પોર્ટ્સ એક્ટિવિટીનું ઇન્સ્પેક્શન કરશે નિયમોના ભંગ બદલ દંડરૂપી શિક્ષાત્મક પગલાં લેવાશે. જૂન 2024માં પ્રસિદ્ધ કરાયેલા ડ્રાફ્ટ નિયમો અંગે નાગરિકોના મળેલા વાંધા સૂચનોનો કાળજીપૂર્વક અભ્યાસ પછી નિયમોને આખરી સ્વરૂપ અપાયું.

વાવ વિધાનસભાની પેટા ચૂંટણીમાં આજે ફોર્મ ભરવાનો અંતિમ દિવસ છે. ભાજપ અને કોંગ્રેસના ઉમેદવાર આજે ઉમેદવારી નોંધાવશે. ભાજપ અને કોંગ્રેસે હજૂ ઉમેદવાર જાહેર નથી કર્યા. ભાજપમાંથી અમીરામ આંસલ, સ્વરૂપજી ઠાકોર, રજનીશ ચૌધરી કે પછી કોઈ નવા ચહેરાને ટિકિટ મળી શકે છે. કોંગ્રેસે ચારેય દાવેદારોને ફોર્મ ભરવાની સૂચના આપી છે. ગુલાબસિંહ રાજપૂત, ભાવાજી ઠાકોર, ઠાકરશી રબારી અને કે.પી. ગઢવીને ફોર્મ ભરવા સૂચના આપી છે.

બંગાળની ખાડીમાંથી ઉદભવેલું ચક્રવાત ‘દાના’ ઓડિશાના દરિયાકાંઠે ત્રાટક્યું છે. હાલમાં ઓડિશા અને પશ્ચિમ બંગાળમાં ભારે વરસાદ પડી રહ્યો છે. જોરદાર પવન ફૂંકાઈ રહ્યો છે. ભારતીય હવામાન વિભાગ (IMD) અનુસાર, ‘દાના’ ની લેન્ડફોલ શુક્રવારે સવાર સુધી ચાલુ રહેવાની સંભાવના છે. IMDએ જણાવ્યું હતું કે વાવાઝોડું છેલ્લા છ કલાકમાં 15 કિલોમીટર પ્રતિ કલાકની ઝડપે ઉત્તર-ઉત્તર-પશ્ચિમ તરફ આગળ વધ્યું હતું અને પછી કેન્દ્રપારા જિલ્લાના ભીતરકણિકા અને ભદ્રક જિલ્લાના ધમરા વચ્ચે પહોંચ્યું હતું. આ દરમિયાન પવનની ઝડપ 120 કિલોમીટર પ્રતિ કલાકની રહી હતી.

બનાસકાંઠા: અમીરગઢ પાસેની માવલ ચેકપોસ્ટ પરથી 7 કરોડથી વધુ રોકડ સાથે મહેસાણાનાં 2 શખ્સો ઝડપાયા છે. હવાલા નેટવર્કથી રોકડની હેરફેર થતી હોવાની આશંકા છે. આબુ રોડના રિકો પોલિસ સ્ટેશનની બાતમીને આધારે દિલ્લીથી અમદાવાદ જતી કારની ચેકપોસ્ટ પર તપાસ કરાતા રોકડ મળી છે. કારમાં સવાર શખ્સોની પુછપરછમાં સંતોષકારક જવાબ ન મળ્યો. કારમા સવાર શખ્સો રોકડ અંગેના કોઇ પુરાવા પણ રજૂ ન કરી શક્યા.

ડાંગ: લોક કલાકાર રાજભા ગઢવી સપડાયા વિવાદમાં સપડાયા છે. રાજભા ગઢવીએ ડાયરામાં આદિવાસી સમાજનું અપમાન કર્યાનો આક્ષેપ છે. ડાંગ-આહવામાં જંગલવાસીઓ લૂંટી લેતા હોવાના નિવેદન સામે રોષ ફેલાયો છે. રાજભા ગઢવીના શબ્દો સામે આદિવાસી સમાજ નારાજ છે. એટ્રોસિટી એક્ટ હેઠળ ગુનો નોંધવા આહવા મથકે અરજી થઇ છે. સામાજિક કાર્યકરે એટ્રોસિટીનો ગુનો નોંધવા અરજી કરી. આદિવાસી સમાજે રાજભા ગઢવીના શબ્દોને કલંક સમાન ગણાવ્યા છે. રાજભા સામે ફરિયાદ નહીં નોંધાય તો કલેક્ટર કચેરીએ ધરણાની ચીમકી છે.