14 મેના મહત્વના સમાચાર : વૈશ્વિક સંકટ વચ્ચે ચીનમાં બે મહારથીઓની મુલાકાત, બીઇજિંગમાં રાષ્ટ્રપતિ ડોનાલ્ડ ટ્રમ્પ અને શી જિનપિંગ વચ્ચે થશે બેઠક

મોરબી જિલ્લામાં વાંકાનેરના સીરામીક ઉદ્યોગ વિસ્તારમાં આવેલી એક ફેક્ટરીમાં ભીષણ આગ લાગી હતી. સરતાનપર રોડ પર આવેલી લેમઝોન નામની ફેક્ટરીના પ્રેસ વિભાગમાં અચાનક આગ ભભૂકી ઉઠતા સમગ્ર વિસ્તારમાં અફરાતફરી મચી ગઈ હતી. આગ લાગતા કામદારોમાં નાસભાગ મચી ગઈ હતી અને તાત્કાલિક સુરક્ષા માટે બહાર દોડી આવ્યા હતા. ઘટનાની જાણ થતા ફાયર વિભાગની ત્રણ ટીમો ઘટનાસ્થળે પહોંચી હતી અને ભારે જહેમત બાદ આગ પર કાબૂ મેળવ્યો હતો. સદભાગ્યે આ ઘટનામાં કોઈ જાનહાનિના સમાચાર મળ્યા નથી. હાલ આગ લાગવાનું ચોક્કસ કારણ હજુ અકબંધ છે અને તંત્ર દ્વારા વધુ તપાસ હાથ ધરવામાં આવી છે.

Mehsana જિલ્લાના વિજાપુર તાલુકાના જૂના ફુદેડા ગામમાં પ્રાથમિક શાળા નજીક ખુલ્લેઆમ દારૂનું વેચાણ થતું હોવાના આક્ષેપોને લઈને ગ્રામજનોમાં ભારે રોષ ફેલાયો હતો. પોલીસ દ્વારા યોગ્ય કાર્યવાહી ન થતાં મહિલાઓ, યુવાનો, સરપંચ અને આગેવાનો સહિત મોટી સંખ્યામાં લોકો એકઠા થઈ જનતા રેડમાં જોડાયા હતા. ગ્રામજનોએ ગેરકાયદે દારૂના વેચાણનો ઉગ્ર વિરોધ કરી પોલીસ અને કલેક્ટર સમક્ષ દારૂબંધીનો કડક અમલ કરવાની માંગ ઉઠાવી હતી. સાથે જ ગામ સંપૂર્ણ દારૂમુક્ત નહીં બને ત્યાં સુધી આંદોલન ચાલુ રાખવાની ચીમકી પણ ઉચ્ચારી હતી.

વૈશ્વિક આર્થિક અને રાજકીય સંકટ વચ્ચે બેઇજિંગમાં અમેરિકાના રાષ્ટ્રપતિ Donald Trump અને ચીનના રાષ્ટ્રપતિ Xi Jinping વચ્ચે મહત્વપૂર્ણ મુલાકાત યોજાઈ હતી. શી જિનપિંગે ટ્રમ્પનું ભવ્ય સ્વાગત કરી તેમને ગાર્ડ ઓફ ઓનર આપવામાં આવ્યું હતું. બંને મહારથીઓ વચ્ચે વેપાર, ટેરિફ, સેમિ કન્ડક્ટર, આર્ટિફિશિયલ ઇન્ટેલિજન્સ અને તાઇવાન સહિતના મુદ્દાઓ પર વિસ્તૃત ચર્ચા થઈ હતી. આ બેઠક દરમિયાન સમગ્ર વિશ્વની નજર ખાસ કરીને Boeing વિમાન ડીલ પર ટકેલી છે, કારણ કે ચીન બોઇંગ સાથે આશરે 9 લાખ કરોડ રૂપિયાની વિમાન ખરીદીનો મોટો કરાર કરી શકે તેવી અટકળો તેજ બની છે.