04 એપ્રિલના મહત્વના સમાચાર : હવામાન વિભાગે કરી કમોસમી વરસાદની આગાહી,વીજળીના કડાકાભડાકા સાથે વરસાદ વરસી શકે

ઇરાનમાં અમેરિકા દ્વારા યુદ્ધ દરમિયાન પ્રથમ વખત ગ્રાઉન્ડ ઓપરેશન હાથ ધરવામાં આવ્યું હોવાનું જણાવવામાં આવ્યું છે. આ ઓપરેશનમાં અમેરિકી કમાન્ડો જમીન પર ઉતરી કાર્યવાહી કરી હતી. લાપતા બનેલા પાયલોટને શોધવા માટે આ ખાસ મિશન ચલાવવામાં આવ્યું હતું, જેમાં એક પાયલોટનું સફળતાપૂર્વક રેસ્ક્યૂ કરવામાં આવ્યું છે, જ્યારે બીજા પાયલોટની શોધખોળ હજુ પણ ચાલુ છે.

ઇરાને અમેરિકાના 48 કલાકના યુદ્ધવિરામના પ્રસ્તાવને ફગાવતાં તણાવ વધુ વધ્યો હતો. ત્યારબાદ ઇરાન પર અમેરિકા અને ઇઝરાયલ દ્વારા ઘાતક પ્રહાર કરવામાં આવ્યા હોવાનું જણાવવામાં આવ્યું છે. ઇરાનની રાજધાની તહેરાનમાં જોરદાર મિસાઇલ સ્ટ્રાઇક થતાં શહેર હચમચી ગયું હતું. આ હુમલાઓ બાદ લોકોને ભારે ભય ફેલાયો અને નાસભાગ મચી ગઈ હતી. દૂર દૂર સુધી આગના ગોટેગોટા જોવા મળતાં પરિસ્થિતિ ગંભીર બની ગઈ હોવાનું જણાય છે.

અમેરિકન રાષ્ટ્રપતિ ડોનાલ્ડ ટ્રમ્પે 2027 માટે કાયદા ઘડનારાઓને ૧.૫ ટ્રિલિયન ડોલરના સંરક્ષણ બજેટ માટે વિનંતી કરી છે. આ 40% નો વધારો હશે, જે બીજા વિશ્વયુદ્ધ પછી પેન્ટાગોનના ખર્ચમાં સૌથી મોટો વધારો હશે.

હવામાન વિભાગે આગામી 12 કલાક દરમિયાન રાજ્યમાં કમોસમી વરસાદની આગાહી કરી છે. સૌરાષ્ટ્ર સહિત મધ્ય ગુજરાતના વિસ્તારોમાં સામાન્યથી મધ્યમ વરસાદ વરસી શકે તેવી શક્યતા વ્યક્ત કરવામાં આવી છે. આ દરમિયાન વીજળીના કડાકાભડાકા સાથે વરસાદ પડવાની સંભાવના છે અને 35થી 45 કિલોમીટર પ્રતિ કલાકની ઝડપે પવન ફૂંકાઈ શકે છે. આ બદલાતા હવામાન પાછળ વેસ્ટર્ન ડિસ્ટર્બન્સ અને સાયક્લોનિક સર્ક્યુલેશન જવાબદાર હોવાનું જણાવાયું છે.