03 જાન્યુઆરીના મહત્વના સમાચાર : BZ પોન્ઝી સ્કીમ કેસમાં એક વર્ષ બાદ ભૂપેન્દ્ર ઝાલાના પિતાની ધરપકડ, સાબરમતી જેલમાં મોકલાયા, મળતિયાઓમાં ફફડાટ

ભાવનગર: બગદાણા આશ્રમના સેવક પર હુમલાની ઘટનાના ઘેરા પ્રત્યાઘાત પડ્યા છે. કેન્દ્રીય મંત્રી નિમુબેન બાંભણિયાએ પીડિત સાથે મુલાકાત કરી.
મહુવાની હનુમંત હોસ્પિટલે જઈ પીડિત યુવકના સાંસદે હાલચાલ જાણ્યા હતા. આ તકે સાંસદે જણાવ્યુ કે કોળી સમાજના યુવકને ચોક્કસ ન્યાય મળશે.
સમાજના આગેવાનો CMને રજૂઆત કરશે.

અમદાવાદના શીલજમાં પ્રધાનમંત્રી આવાસ યોજનાની નવી બનતી બિલ્ડીંગમાં કલર કામ કરતા શ્રમિક પરિવારમાં ભાઈએ ભાઈની હત્યા કર્યાની ચોંકાવનારી ઘટના સામે આવી છે અને એનાથી પણ વધુ ચોંકાવનારું છે.  હત્યા પાછળ જવાબદાર હતો ચીકનનો એક પીસ.  એક મામુલી ચીકનના પીસ માટે ભાઈ ભાઈનો દુશ્મન બની ગયો.પોલીસ કસ્ટડીમાં જોવા મળતા આરોપી વિષ્ણુ કુશવાહને જમવા બાબતે પિતરાઈ ભાઈ રામુ સાથે ઝઘડો થયો હતો. ઝઘડમાં વિષ્ણુ એટલો ઉશ્કેરાઈ ગયો કે. રસોડામાં વપરાતા ચપ્પુ વડે ભાઈ પર હુમલો કરી દીધોઅને આ હુમલામાં રામુનું મોત નિપજ્યું. ઘટનાની જાણ થતા બોપલ પોલીસે આરોપીની ધરપકડ કરી.

રૂપિયા ડબલ કરી આપવાની લાલચ આપી રૂપિયા પડાવનાર ઠગબાજોનો પર્દાફાશ, તાંત્રિકવિધિના નામે પડાવ્યા લાખો રૂપિયા.  જો કોઈ તમને રૂપિયા ડબલ કરી આપવાની લાલાચ આપે તો સાવધાન કચ્છના નખત્રાણામાં રૂપિયા ડબલ કરવાના નામે 7.5 લાખની ઠગાઈનો ચોકાવનારો કિસ્સો સામે આવ્યો છે. વેસલપર ગામના નરોતમ પટેલે 2 શખ્સઓ સામે ફરિયાદ નોંધાવી કે ફીરોઝ ફકીર અને લતીફ ફકીર બંને આરોપી ભાઈઓએ ફરિયાદીને વિશ્વાસમાં લઈ વર્ષ 2019થી 2025 દરમિયાન અલગ અલગ સમયે રૂપિયા મેળવ્યા. 6 વર્ષ સુધી જુદી જુદી તાંત્રિક વિધિના નામે 7.5 લાખ રૂપિયા પડાવ્યા હતા. છેવટે ફરિવાદીને છેતરાયા હોવાનું અનુભવ થતા પોલીસ ફરિયાદ નોંધાવી

શિયાળાની ઠંડી વચ્ચે પોરબંદરમાં અનોખી સ્વિમિંગ સ્પર્ધાનું આયોજન કરવામાં આવ્યું. શ્રી રામ સી સ્વિમિંગ ક્લબ દ્વારા યોજાયેલી સ્વિમિંગની આ સ્પર્ધાનું આયોજન સ્વિમિંગ પુલમાં નહીં પરંતું સમુદ્રની લહેરો વચ્ચે કરવામાં આવ્યું છે. જેમાં 16 રાજ્યોના 1500થી વધુ તરવૈયાઓએ ભાગ લીધો. આ સ્પર્ધામાં 500 મીટરથી 15 કિલોમીટર સુધીની સ્પર્ધામાં 18 વર્ષના યુવાઓથી લઈને 80 વર્ષ સુધીના વૃદ્ધોએ પણ ભાગ લીધો. મહત્વનું છે કે પહેલા માત્ર રાજ્ય કક્ષાએ આ સ્પર્ધાનું આયોજન થતું હતું. પરંતું સારો પ્રતિસાદ મળતા રાષ્ટ્રીય કક્ષાએ આ સ્પર્ધાનું આયોજન કરવામાં આવે છે. સમુદ્રમાં તરવું તે ખૂબ જ કપરું કામ છે, પરંતું સમય જતાં આ સ્પર્ધામાં ભાગ લેવાનો પણ ક્રેઝ વધી રહ્યો છે.

પંચમહાલ: પાવાગઢમાં ભક્તોનું ઘોડાપુર ઉમટ્યું છે. પોષી પૂનમના પાવન પર્વે મંદિર પરિસરમાં ભક્તોનો જમાવડો જોવા મળ્યો. માઈ ભક્તો મા મહાકાળીના દર્શનાર્થે પહોંચ્યા. ભારે ભીડ ઉમટી પડતા ભક્તોની લાંબી કતાર જોવા મળી. મા મહાકાળીને ધજા ચઢાવી ધન્યતાની અનુભૂતિ કરી. મંદિર ટ્રસ્ટે પૂનમને લઈને જગત જનનીને અન્નકૂટ ધરાવ્યો. ભારે ભીડ હોવાના લીધે સુરક્ષા વ્યવસ્થામાં વધારો કરાયો હતો. આજે પોષી પૂનમના પાવન પર્વે મોટી સંખ્યામાં ભક્તો માં મહાકાળીના દર્શને પહોંચ્યા.. શાકંભરી નવરાત્રીની પૂર્ણાહૂતીની પણ પાવાગઢમાં ઉજવણી કરવામાં આવી.. મોટી સંખ્યામાં માઈ ભક્તોએ મંદિરના શીખર પર ધજા પણ ચઢાવી. સાથે જ મંદિર ટ્રસ્ટ દ્વારા આયોજીત પોષી પૂનમના અન્નકૂટમાં ભક્તોનો જમાવડો જોવા મળ્યો.. શ્રદ્ધાળુઓએ માતાજીના ચરણે શીશ નમાવીને ધન્યતાની અનુભૂતિ કરી.

અમદાવાદ: કાલુપુર રેલવે સ્ટેશન પર થઈ પોલીસ અને રીક્ષા ચાલકો વચ્ચે ઉગ્ર બબાલ થઈ હતી. આ બબાલનો વીડિયો સામે આવ્યો છે. RPFના જવાનો અને રીક્ષા ચાલકો વચ્ચે ઉગ્ર બોલાચાલી થઈ હતી. પેસેન્જરને ભરવા બાબતે રીક્ષા ચાલકોને માર મરાયાનો આરોપ લાગ્યો છે. વીડિયોમાં RPF જવાનો રીક્ષા ચાલકો પર લાઠી ચાર્જ કરતા દેખાયા હતા. સમગ્ર ઘટનાનો વીડિયો સોશિયલ મીડિયા પર વાયરલ થયો હતો.

અમદાવાદના કાલુપુર રેલ્વે સ્ટેશન પર RPFના જવાનો અને રીક્ષા ચાલકો વચ્ચે ઉગ્ર વિવાદ થયો હતો. વહેલી સવારે જ પેસેન્જર ભરવાની બાબતે પોલીસ કર્મીઓ અને રીક્ષા ચાલકો આમને-સામને આવ્યા હતા. જે બાદ બોલાચાલી ઉગ્ર બનતા RPFના જવાનોએ લાઠી ચાર્જ પણ કર્યો હતો. જે બાદ રેલ્વે સ્ટેશન પર નાસભાગ મચી હતી. આ સમગ્ર ઘટનામાં એક વ્યક્તિને RPFના કર્મીઓ દ્વારા જોરદાર ફટકા મારવામાં આવતા તે ઘાયલ થયો હોય તેવું પણ જોવા મળી રહ્યું છે. સમગ્ર ઘટનાનો વીડિયો હાલ સોશિયલ મીડિયા પર વાયરલ થતાં ચર્ચાનો વિષય બન્યો છે.

સુરતઃ લિંબાયતમાં હત્યાના આરોપીઓને પોલીસે કાયદાનું ભાન કરાવ્યું છે. પોલીસે આરોપીને સાથે રાખી ઘટનાનું રિકન્સ્ટ્રક્શન કર્યુ. પોલીસે આરોપીઓ પાસે જાહેરમાં માફી મગાવી. 31 ડિસેમ્બરે આરોપીએ હત્યાને અંજામ આપ્યો હતો. મિત્રની હત્યાનું વેર વાળવા આરોપીઓએ હત્યા કરી હતી. પોલીસે પૂછપરછ કરતા આરોપીઓએ કબૂલાત કરી હતી.

અમદાવાદઃ NDPSના કેસમાં સ્પેશિયલ કોર્ટે મહત્વનો ચુકાદો આપ્યો છે. MD ડ્રગ્સ વેચતી મહિલા સહિત ત્રણેય આરોપીને સજા સહિત દંડ ફટકાર્યો છે. એક આરોપીને 10 વર્ષની કેજ અને 2 લાખનો દંડ ફટકાર્યો છે. તો અન્ય 2 આરોપીને 5 વર્ષની કેદ અને 1 લાખનો દંડ ફટકાર્યો છે. ત્રણેય આરોપીઓ પાસેથી MD ડ્રગ્સનો જથ્થો ઝડપાયો હતો. આરોપીઓ ફતેવાડી વિસ્તારમાં MD ડ્રગ્સનું છૂટક વેચાણ કરતા હતા.

અમદાવાદ: G Swan ખોટવાતા સરકારી કામો અટવાયા છે. BSNLની મેન્ટેનન્સની કામગીરીના લીધે G Swan પર અસર પડી છે. સાબરમતી, પાલડી સહિતના વિસ્તારોમાં G Swanમાં સમસ્યા આવી. G Swanમાં ખામીના લીધે અરજદારોને મુશ્કેલી આવી રહી છે. અરજદારો કચેરીના ધક્કા ખાવા મજબૂર બન્યા છે. જો કે ટૂંક સમયમાં  G Swan શરૂ થશે તેવી ડેપ્યુટી કલેક્ટરે ખાતરી આપી છે.

વડોદરાઃ ડિલિવરી બોયના સ્વાંગમાં આવેલો ગઠીયો સોનાની ચેઈન ખેંચી ફરાર થયો. પાર્સલ આપવાના બહાને વૃદ્ધે પહેરેલી ચેઈન ખેંચી નાસી છૂટ્યો. ચોરની કરતૂત CCTVમાં કેદ થઈ. અકોટા વિસ્તારમાં આવેલી રાધાકૃષ્ણ પાર્ક સોસાયટીમાં ઘટના બની હતી.

CCTV ફૂટેજમાં સામે આવ્યુ કે એક ડિલીવરી બોય ટૂ-વ્હીલર પર સોસાયટીમાં આવે છે અને તકનો લાભ લઈ એક વૃદ્ધને તમારું પાર્સલ છે, સહી કરી આપો એમ કહી વાતોમાં ભોળવે છે. આ દરમ્યાન વૃદ્ધને પેકેટ પકડાવી સહી કરાવવાના બહાને તેમણે ગળામાં પહેરેલી સોનાની ચેઈન ખેંચી ફરાર થઈ જાય છે.

છોટાઉદેપુર: ગુરૂકૃપા સોસાયટીમાં બીજા માળેથી પટકાતા મજૂરનું મોત થયુ છે. નવા મકાનના સ્લેબ પર સેન્ટ્રિંગ બાંધતી વખતે મજૂર નીચે પટકાયો હતો. કામ કરતાં સમયે ટેકો ખસી જતાં મજૂર નીચે પટકાયો અને તેનુ મૃત્યુ નિપજ્યુ હતુ. મૃતક શ્રમિક મોટી કનાસ ગામનો રહેવાસી છે. પોલીસે  મૃતદેહ પીએમ અર્થે ખસેડ્યો છે.

અમરેલી જિલ્લા ભાજપ ઉપાધ્યક્ષના પુત્રના ગુમ થવા મામલે ગોધરાના દિક્ષિત પટેલ પર આરોપ લાગ્યો છે. ગુમ થનાર રવિ પાનસુરિયાએ દિક્ષિત પચેલ પર આરોપ લગાવ્યો હતો.  દીક્ષિત પટેલ સહિત 15 વ્યાજખોર પઠાણી ઉઘરાણી કરતા હોવાનો આરોપ હતો. આ મામલે  દીક્ષિત પટેલે ચોંકાવનારો ઘટસ્ફોટ કર્યો છે.
મને ફસાવવા માટે અંતિમ ચીઠ્ઠીમાં મારું નામ લખ્યુ. રવિ અને તેના પિતા સહિતની ટોળકીએ મારી સાથે કરોડોની છેતરપિંડી કરી. છેતરપિંડી મામલે મેં હરણી પોલીસ મથકમાં કરી અરજી કરી હતી. FIR થવાના ડરથી આયોજનબદ્ધ રીતે રવિ પનાસુરીયા ગુમ થયો હતો. રવિ પાસેથી એક પણ રૂપિયો વ્યાજ ન લીધાનો દીક્ષિત પટેલે  દાવો કર્યો છે.

દીક્ષિત પટેલનો આરોપ છે કે તેણે અમરેલી જિલ્લા ભાજપ ઉપાધ્યક્ષ અને બિલ્ડર તેવા સુરેશ પાનસુરીયા અને તેમના પુત્ર રવિની વડોદરાની સાઈટમાં ₹6.83 કરોડનું રોકાણ કર્યું હતું. સિદ્ધાર્થ પેરેડાઈઝ અને સિદ્ધેશ્વર પેરેડાઈઝમાં મિલકત ખરીદી હતી.

ગાંધીનગરઃ ફરાર આરોપીને પકડવા પોલીસે ઓપરેશન હાથ ધર્યુ.  વેશપલટો કરી ફિલ્મી ઢબે આરોપીને મહેસાણાથી ઝડપ્યો. પોક્સોના કેસમાં જામીન મળતા આરોપી ફરાર હતો. પોલીસે ફુગ્ગાવાળા તેમજ શાકભાજી વિક્રેતાઓનો વેશ ધારણ કર્યો હતો. દહેગામ પોલીસે આરોપીને ઝડપી જેલ હવાલે કર્યો છે.

રાજ્યમાં હજુ વધુ ઠંડી પડવાની હવામાન વિભાગે આગાહી કરી છે. આગામી ત્રણ દિવસ પછી તાપમાનમાં  2 થી 3 ડિગ્રીનો વધારો થશે. આવનારા ત્રણ દિવસ તાપમાન વધતા ઠંડીનું જોર વધશે. આજે સિઝનનું સૌથી નીચુ તાપમાન નલિયામાં નોંધયુ છે. નલિયામાં લઘુતમ તાપમાન 7 ડિગ્રી ડ્યારે રાજકોટમાં 9.4 ડિગ્રી તાપમાન નોંધાયુ છે. જો કે ગત વર્ષે નલિયામાં 3 ડિગ્રી તાપમાન નોંધાયુ હતુ. ગત વર્ષની સરખામણીએ ચાલુ વર્ષે ઠંડીનું પ્રમાણ ઓછુ છે. જો કે હાલ માવઠાની શક્યતા નહિવત છે.

ગાંધીનગરઃ ટાઈફોઈડના કેસ મામલે તંત્ર થયું દોડતું થયુ છે. TV9ના અહેવાલ બાદ સરકાર એકશનમાં આવી છે. ડિપ્ટી સીએમ હર્ષ સંઘવી સિવિલ હોસ્પિટલની મુલાકાતે પહોંચ્યા. હોસ્પિટલની મુલાકાત લઈ પરિસ્થિતિનો તાગ મેળવવાનો પ્રયાસ કર્યો. સચિવાલયમાં અધિકારીઓ સાથે પણ નાયબ મુખ્યમંત્રીની બેઠક મળી હતી. કલેક્ટર, મનપા કમિશનર, આરોગ્ય અધિકારી સાથે હર્ષ સંઘવીએ બેઠક કરી અને વધતા કેસ અંગે માહિતી મેળવી. ઝડપથી કેસ ઓછા થાય તે દિશામાં કાર્ય કરવા માટે સૂચના આપી.

વડોદરાઃ સોમા તળાવ વિસ્તારમાં બે જૂથ વચ્ચે મારામારી થઇ. જાહેર માર્ગ પર થઈ છુટ્ટા હાથની મારામારી થઈ. લાકડી દ્વારા એકબીજા પર હુમલો કરી ઇજા પહોંચાડી. રસ્તા પરથી પસાર થતાં વાહનચાલકે વીડિયો ઉતારી વાયરલ કર્યો.

કેરળના ભૂતપૂર્વ પરિવહન મંત્રી એન્ટની રાજુને 1990ના ડ્રગ્સ જપ્તીના કેસમાં પુરાવા સાથે છેડછાડ કરવાનો દોષી ઠેરવવામાં આવ્યા હતા.

વેનેઝુએલા પર અમેરિકાના હુમલા બાદ ક્યુબાએ હવે એક નિવેદન બહાર પાડ્યું છે. ક્યુબાના રાષ્ટ્રપતિ મિગુએલ ડિયાઝ-કેનલ બર્મુડેઝે વેનેઝુએલા પરના હુમલાઓને અમેરિકા દ્વારા ગુનાહિત હુમલો ગણાવ્યો હતો. સોશિયલ મીડિયા પર પોસ્ટ કરાયેલા એક નિવેદનમાં તેમણે કહ્યું કે ક્યુબા અમેરિકા દ્વારા આ કથિત હુમલાની સખત નિંદા કરે છે અને આંતરરાષ્ટ્રીય સમુદાયને તાત્કાલિક તેની નિંદા કરવા હાકલ કરે છે.

વેનેઝુએલા પર અમેરિકાના હુમલા બાદ, કોલંબિયા હવે વેનેઝુએલાનું સમર્થન કરવા માટે બહાર આવ્યું છે. કોલંબિયાના રાષ્ટ્રપતિ તરફથી એક નિવેદન બહાર પાડવામાં આવ્યું છે, જેમાં કહેવામાં આવ્યું છે કે અમેરિકા મિસાઇલોથી હુમલો કરી રહ્યું છે. કોલંબિયાએ એવી પણ જાહેરાત કરી છે કે તે સંયુક્ત રાષ્ટ્ર સુરક્ષા પરિષદની કટોકટી બેઠક બોલાવશે. કોલંબિયા હાલમાં UNSC નો અસ્થાયી સભ્ય છે.

વેનેઝુએલા સ્થિત યુએસ દૂતાવાસે લેવલ 4 ની મુસાફરી ચેતવણી જાહેર કરી છે, જેમાં યુએસ નાગરિકોને તાત્કાલિક દેશ છોડવા વિનંતી કરવામાં આવી છે.

સાબરકાંઠાઃ BZ પોન્ઝી સ્કીમ કેસમાં વધુ એક આરોપીની ધરપકડ થઇ. એક વર્ષ બાદ CID ક્રાઇમે ભૂપેન્દ્ર ઝાલાના પિતાને ઝડપી પાડ્યો. CID ક્રાઈમે મુખ્ય આરોપી ભૂપેન્દ્ર ઝાલાના પિતાની ધરપકડ કરી. પરબતસિંહ ઝાલાની ધરપકડ કરી કોર્ટમાં રજૂ કરાયો હતો. ધરપકડ બાદ પરબતસિંહ ઝાલાને સાબરમતી જેલમાં મોકલાયો. પરબતસિંહ ઝાલાએ ધરપકડ બાદ જામીન માટે કોર્ટમાં અરજી કરી. CIDએ વધુ એક વખત આરોપીઓની ધરપકડનો દોર શરૂ કર્યો. ધરપકડથી ભાગતા ફરતા BZના એજન્ટો અને મળતિયાઓમાં ફફડાટ ફેલાયો. પ્રાંતિજનો નિકેશ પટેલ અને હિંમતનગરનો ધવલ પટેલ હજુ ભૂગર્ભમાં છે. બંનેને ઝડપવા CID ક્રાઈમે કાર્યવાહી તેજ કરી.

યુએસ ફેડરલ એવિએશન એડમિનિસ્ટ્રેશન (FAA) એ વેનેઝુએલાના હવાઈ ક્ષેત્રમાં યુએસ વાણિજ્યિક વિમાનોના ઉડાન પર પ્રતિબંધ મૂક્યો છે. FAA એ તેનું કારણ ત્યાં ચાલી રહેલી લશ્કરી પ્રવૃત્તિઓનો ઉલ્લેખ કર્યો છે.

વેનેઝુએલાની રાજધાની કારાકાસમાં થયેલા હુમલા બાદ, રાષ્ટ્રપતિ નિકોલસ માદુરોએ દેશમાં રાષ્ટ્રીય કટોકટી જાહેર કરી છે. કોલંબિયાના રાષ્ટ્રપતિ ગુસ્તાવો પેટ્રોએ હુમલાની પુષ્ટિ કરી અને ઓર્ગેનાઇઝેશન ઓફ ધ અમેરિકાઝ (OAS) અને સંયુક્ત રાષ્ટ્રની કટોકટી બેઠક બોલાવી.

દ્વારકા: ખંભાળિયા-જામનગર હાઈવે પર ગોઝારો અકસ્માત થયો. દાંતા ગામ નજીક ફૂલ સ્પીડે દોડતી અજાણી કારે ટક્કર મારી. બાઈકને અડફેટે લેતા બે યુવાનો રોડ પર ફંગોળાયા. અકસ્માતને કારણે બે યુવકોના મોત નિપજ્યા.

વડોદરા: SMCએ બિશ્નોઈ ગેંગના સૂત્રધાર અશોક બિશ્નોઈને ધરપકડ કરી. આરોપી દારૂના કેસમાં સંડોવાયેલો હતો અને આસામથી પકડાયા પછી પોલીસ પર ફાયરિંગ કર્યું હતું. પોલીસે અશોક બિશ્નોઈને 16 જાન્યુઆરી સુધીના રિમાન્ડ પર લીધા છે. તપાસમાં જાણવા મળ્યું છે કે આરોપીએ ગોવામાં મેન્યુફેક્ચરિંગ અને એક્સપાયરી ડેટ વગરના દારૂનું ઉત્પાદન કરાવ્યું હતું. ફરિયાદ મુજબ, આરોપી પોલીસની નજરથી બચવા માટે ઈન્ટરનેશનલ ફોન કોલ્સ પણ કરતો હતો.

નવસારીઃ નેશનલ હાઇવે નંબર 48 પર અકસ્માત થયો. બુલેટ ટ્રેનના મજૂરોને લઈ જતી બસ અને કન્ટેનર વચ્ચે અકસ્માત થયો. ઓવરટેક કરતી વખતે કન્ટેનરનો પાછળનો ભાગ બસ સાથે અથડાયો. અકસ્માતમાં 10થી વધુ લોકોને ઈજા પહોંચી. અકસ્માતના કારણે હાઇવે પર લાંબો ટ્રાફિકજામ સર્જાયો.

પોષ માસની પૂર્ણિમા એ માતા અંબાનો પ્રાગટ્ય દિવસ મનાય છે. તો સાથે જ આજે ગુપ્ત નવરાત્રી એવી “શાકંભરી નવરાત્રી”ની પૂર્ણાહુતિ પણ થતી હોય છે. ત્યારે વહેલી સવારથી જ પ્રથમ શક્તિપીઠ એવા અંબાજી ધામમાં મોટી સંખ્યામાં શ્રદ્ધાળુઓ ઉમટી પડ્યા અને માતાની મંગળા આરતીના દર્શનનો લાભ લીધો. પોષી પૂર્ણિમાએ અંબાજી ધામમાં ભવ્ય શોભાયાત્રાનું આયોજન થતું હોય છે. સૌ પ્રથમ ગબ્બર પરથી મા અંબાની જ્યોત લાવી. તેને અંબાજી મંદિરમાં સ્થાપિત જ્યોત સાથે એકરૂપ કરાય છે. અને ત્યારબાદ તે જ્યોતને સાથે રાખી. ભવ્ય શોભાયાત્રાનું આયોજન કરાતું હોય છે. માતા અંબાની ચલિત પ્રતિમાને હાથી પર સવારી કરાવી નગર પરિભ્રમણ કરાવાય છે. ત્યારે મોટી સંખ્યામાં ભાવિકો. આ શોભાયાત્રામાં જોડાય તેવી શક્યતા છે.

ગાંધીનગરઃ ટાઈફોઈડના કેસ મામલે તંત્ર થયું દોડતું. આરોગ્ય વિભાગની 40 ટીમના 80થી વધુ કર્મચારી સર્વેમાં લાગ્યા. અત્યાર સુધીમાં બીજા 67 શંકાસ્પદ કેસો મળી આવ્યા. TV9ના અહેવાલ બાદ મનપા કમિશનર એકશનમાં આવ્યા. તંત્રએ કામગીરી કરતા 10 જેટલા લીકેઝ શોધવામાં આવ્યા. સિટી ઈજનેરને ઝડપી કામગીરી માટે અપાઈ સૂચના.

સુરત: માંડવી ધર્માંતરણ મામલે એક શિક્ષિકાની ધરપકડ થઇ. માંડવીના ભાટખાઈ ગામના મીના ચૌધરીની ધરપકડ થઇ. મીના ચૌધરી મહુડીની પ્રા. શાળામાં શિક્ષિકા તરીકે ફરજ બજાવે છે. ધર્માંતરણના માસ્ટર માઈન્ડ રામજી ચૌધરીના મનાય છે ખૂબ જ ખાસ. યુવતીઓ, મહિલાઓની ધર્માંતરણમાં સંડોવણી સામે આવી. ફરિયાદી યુવતીનું ધર્માંતરણ કરાવવા મુદ્દે સક્રિય ભૂમિકા છે. આરોપીએ ધરપકડ અગાઉ તેમનો ફોન પર ફોર્મેટ કરી દીધો.

ભુજનાં માધાપરમાં વૉશિંગ મશીન બ્લાસ્ટ થવાથી ઘરમાં આગ લાગી. માધાપરની શિવમ પાર્ક સોસાયટીના મકાનમાં બનાવ બન્યો. ભુજ ફાયર વિભાગે ઘટનાસ્થળે દોડી જઈ આગ ઉપર કાબુ મેળવ્યો. સદભાગ્યે ઘટનામાં કોઈ જાનહાની થઇ નથી.

વડોદરાઃ SSG હોસ્પિટલની ઈમારતમાં પોપડા ખર્યા. SSG હોસ્પિટલની ન્યુ સર્જિકલ બિલ્ડિંગમાં  C-2 વોર્ડમાં છતના પોપડા ખર્યા. દુર્ઘટનામાં સદનસીબે કોઈ ઈજા કે જાનહાનિ થઈ નથી. ન્યુ સર્જિકલ બિલ્ડિંગની સ્ટ્રક્ચર સ્ટેબિલિટી સામે સવાલ ઊભા થયા છે. અગાઉ પણ આ જ વોર્ડમાં છતનાં પોપડા પડ્યાં હતાં.

મેક્સિકોમાં 6.5ની તીવ્રતાનો ભયાવહ ભૂકંપ આવ્યો. સૈન માર્કોસ શહેર પાસે 40 કિમીની ઊંડાઇએ ભૂકંપનું કેન્દ્રબિંદુ રહ્યુ. ભૂકંપને કારણે અનેક ઇમારતો ધણધણી ઉઠી. રાષ્ટ્રપતિની નવા વર્ષની પ્રથમ પ્રેસ કોન્ફરન્સમાં પણ ભૂકંપનું વિઘ્ન. ભૂકંપને કારણે રાષ્ટ્રપતિ ક્લાઉડિયા શિનબામે અધવચ્ચે પ્રેસ કોન્ફરન્સ અટકાવી પડી.

ઉત્તર પ્રદેશના પ્રયાગરાજમાં પોષ પૂર્ણિમા નિમિત્તે, જે પ્રથમ સ્નાન છે અને માઘ મેળા 2026નો પ્રથમ દિવસ પણ છે, લોકો ત્રિવેણી સંગમમાં પવિત્ર સ્નાન કરી રહ્યા છે. વિભાગીય કમિશનર સૌમ્યા અગ્રવાલે જણાવ્યું હતું કે, “અમે અહીં આવેલા તમામ ભક્તો સાથે વાત કરી હતી, અને તેઓએ કહ્યું હતું કે તેઓ વ્યવસ્થાથી સંતુષ્ટ છે અને આરામથી પૂજા અને સ્નાન કરી રહ્યા છે. અમે શક્ય તેટલી બધી વ્યવસ્થા કરી છે, અને અહીં પરિસ્થિતિ સામાન્ય છે.”