02 મેના મહત્વના સમાચાર : પશ્ચિમ બંગાળમાં બે વિધાનસભા બેઠકો પર ફેર મતદાન, 15 બૂથ પર ગેરરીતિના આરોપ બાદ ફરી મતદાન પ્રક્રિયા

સુરત જિલ્લા પોલીસ માટે શોકજનક સમાચાર સામે આવ્યા છે. પાદરા નજીક એક્સપ્રેસ વે પર ST બસના પાછળ કાર અથડાતા ભીષણ અકસ્માત સર્જાયો હતો, જેમાં ગ્રામ્ય SOGના હેડ કોન્સ્ટેબલને ગંભીર ઇજાઓ પહોંચી હતી. ઇજાઓ એટલી ગંભીર હતી કે તેમનું ઘટના સ્થળે જ મોત નિપજ્યું. નોંધનીય છે કે માત્ર બે મહિના પહેલા જ તેમના પિતાનું પણ અવસાન થયું હતું, જેના કારણે પરિવાર અને પોલીસ વિભાગમાં વધુ શોક છવાયો છે. ઘટનાને પગલે સમગ્ર સુરત જિલ્લા પોલીસમાં શોકનો માહોલ વ્યાપી ગયો છે.

અમદાવાદના વટવા વિસ્તારમાં બનેલા હત્યાકાંડની તપાસ હવે ધોળકા સુધી પહોંચી છે. કેસમાં મહત્વપૂર્ણ કડી તરીકે ફરઝાનાના ભાઈ લિયાકત અલીને ક્રાઇમ બ્રાંચ દ્વારા DNA ટેસ્ટ માટે લઈ જવાયો છે. ધોળકામાં રહેતા લિયાકતનો DNA સેમ્પલ લઈને મળેલા માનવ કંકાલ સાથે મેળવણી કરવામાં આવશે, જેથી આ કંકાલ ફરઝાનાનો છે કે નહીં તેની ચોક્કસ ઓળખ થઈ શકે. પોલીસે વધુ તપાસ તેજ બનાવી છે.

પશ્ચિમ બંગાળમાં ગેરરીતિના આરોપોને પગલે બે વિધાનસભા બેઠકો પર ફરી મતદાન યોજાયું છે. ડાયમંડ હાર્બરના 4 અને મગરાહાટ પશ્ચિમના 11 બૂથ સહિત કુલ 15 કેન્દ્રો પર પુનઃ મતદાન પ્રક્રિયા હાથ ધરાઈ છે. તમામ બૂથ પર કડક પોલીસ બંદોબસ્ત વચ્ચે મતદાન શાંતિપૂર્ણ માહોલમાં ચાલી રહ્યું છે, અને મતદારો ઉત્સાહપૂર્વક પોતાના મતાધિકારનો ઉપયોગ કરી રહ્યા છે.