01 ઓક્ટોબરના મહત્વના સમાચાર : જ્ઞાનેશ કુમારના રાજીનામાની માંગ સાથે ગાંધી જયંતિએ મુંબઈમાં CJP દ્વારા CEC વિરુદ્ધ વિરોધ પ્રદર્શન, વિપક્ષે આપ્યું સમર્થન

ડ્રગ્સ કેસમાં પકડાયેલા આરોપીઓના રિમાન્ડ મંજૂર. ડ્રગ્સ કેસમાં આરોપીઓના 12 દિવસના રિમાન્ડ મંજૂર. ATS દ્વારા 14 દિવસના રિમાન્ડની કરાઈ હતી માંગણી. આરોપીઓના 13 ઓક્ટોબર સુધીના રિમાન્ડ મંજૂર કર્યા. પાકિસ્તાન સાથે જોડાયેલી લિંક અંગે ATS કરશે તપાસ. બોટ ઈરાનમાંથી લોડ કરી હોવા અંગે તપાસ હાથ ધરાશે. અન્ય કાવતરાખોર બે વ્યક્તિઓની ભૂમિકા અંગે પણ તપાસ. નાણાકીય વ્યવહારો અને હવાલા કાંડ અંગે ATS કરશે તપાસ. તમિલનાડુની થેલાપતિ બોટને કન્સાઇનમેન્ટ આપવાનું હોવા અંગે તપાસ.

GSECL અને NPCIL વચ્ચે ન્યુક્લિયર પાવર પ્રોજેક્ટ માટે સમજૂતી કરાર કરવામાં આવ્યો છે. આ કરાર સાથે ગુજરાત સ્ટેટ ઇલેક્ટ્રિસિટી કોર્પોરેશન લિમિટેડ (GSECL) પ્રથમવાર ન્યુક્લિયર પાવર ક્ષેત્રે પ્રવેશ કરશે. આ પ્રોજેક્ટ ધુવારણ ખાતે આશરે 4,000 મેગાવોટ ક્ષમતા સાથે વિકસાવવાની દિશામાં મહત્વપૂર્ણ પગલું છે. પ્રોજેક્ટ પાછળ આશરે ₹1 લાખ કરોડના રોકાણની દિશામાં આ કરારને મહત્વપૂર્ણ માનવામાં આવી રહ્યો છે.
આ પ્રોજેક્ટ સાકાર થયા બાદ ગુજરાતના વીજ ઉત્પાદન ક્ષેત્રે નવો અધ્યાય શરૂ થવાની સાથે રાજ્યની લાંબા ગાળાની ઊર્જા જરૂરિયાતો પૂરી કરવામાં પણ મહત્વની ભૂમિકા ભજવી શકે છે.

અભિજીત દીપકે આજે મુખ્ય ચૂંટણી કમિશનર જ્ઞાનેશ કુમારના રાજીનામાની માંગ કરી હતી અને ચેતવણી આપી હતી કે જો તેમની માંગણીઓ સ્વીકારવામાં નહીં આવે તો દેશવ્યાપી વિરોધ પ્રદર્શનો શરૂ કરવામાં આવશે, જેમાં દિલ્હીના જંતર-મંતર ખાતેના આંદોલનનો પણ સમાવેશ થશે. આવતીકાલે શુક્રવારે, ગાંધી જયંતિના અવસરે મુંબઈમાં મહત્વપૂર્ણ ગતિવિધિઓ જોવા મળી શકે છે. ‘કોકરોચ જનતા પાર્ટી’ (CJP) એ 2 ઓક્ટોબરે મુંબઈમાં મુખ્ય ચૂંટણી કમિશનર જ્ઞાનેશ કુમાર વિરુદ્ધ વિરોધ પ્રદર્શન કરવાની જાહેરાત કરી છે. જોકે પાર્ટીએ શરૂઆતમાં બપોરે 3 વાગ્યે શિવાજી પાર્ક ખાતે પ્રદર્શન કરવાનું આયોજન કર્યું હતું, પરંતુ મુંબઈ પોલીસે આ કાર્યક્રમ માટે પરવાનગી આપી ન હતી. પરિણામે, પાર્ટીએ ‘જેલ ભરો’ આંદોલનની જાહેરાત કરી છે.

સુરેન્દ્રનગરમાં માનવ સેવા સંઘ સંચાલિત મૂક-બધિર શાળામાં ગેરરીતિ અને શોષણનો પર્દાફાશ, ગૃહમાતાની અટકાયત કરવામાં આવી છે. સુરેન્દ્રનગર ની માનવ સેવા સંઘ સંચાલિત મૂક-બધિર શાળા (ગ્રાન્ટેડ શાળા) માં ગુપ્ત માહિતીના આધારે વઢવાણ પ્રાંત અધિકારી તેમજ તેમની ટીમ દ્વારા તપાસ હાથ ધરવામાં આવી. શાળામાં 15 કન્યાઓ અને 27 કુમારો અભ્યાસ કરે છે. તપાસ દરમિયાન માનસિક ત્રાસ આપવો, માર મારવો, ભૂખ્યા રાખવા, રાત્રે 12 વાગ્યા સુધી માલિશ કરાવવી, અને ઘરકામ કરાવવા જેવા ગંભીર અત્યાચારના પુરાવા મળ્યા છે. દાનની સામગ્રીમાં ભ્રષ્ટાચાર અંગે તપાસ કરતા, દાતાઓ દ્વારા આપવામાં આવતી દાનની રકમ અને વસ્તુઓ બારોબાર વેચી મારવામાં આવતી હોવાના પ્રાથમિક પુરાવા પણ સામે આવ્યા છે. ગૃહમાતા (સોનલબેન) વિરુદ્ધ ગંભીર ફરિયાદો મળતાં તેમની અટકાયત કરવામાં આવી છે. સંસ્થાના ટ્રસ્ટી સિદ્ધેશભાઈ મહેતાએ જણાવ્યું કે કલેક્ટર અને એસડીએમની તપાસમાં ગેરરીતિની વાત સામે આવી છે તે અંગે યોગ્ય તપાસ હાથ ધરાશે.

સમગ્ર દેશમાં આવતીકાલ 2 ઓક્ટોબરે ‘નો UPI ડે’ પાળવાનું આહ્વાન કરવામાં આવ્યું છે. વેપારીઓના વ્યવહારો પર ‘મર્ચન્ટ ડિસ્કાઉન્ટ રેટ’ (MDR) લાદવાના પ્રસ્તાવના વિરોધમાં અમુક વેપારી સંગઠનો આ પહેલનું નેતૃત્વ કરી રહ્યા છે. આ પગલાની અસર મુંબઈમાં પણ જોવા મળશે, જ્યાં ‘રિટેલર્સ એસોસિએશને’ વેપારીઓને આવતીકાલે શુક્રવાર, 2 ઓક્ટોબરે ગ્રાહકો પાસેથી કોઈપણ પ્રકારના ડિજિટલ પેમેન્ટ્સ સ્વીકાર નહીં કરવાની અપીલ કરી છે.

સુરત મેટ્રો જંકશનના નામ બદલવાની દરખાસ્ત મહાનગરપાલિકામાં આવી છે. શહેરના નાનપુરા કાદરશાહ નાળ જંકશનને બદલે ક્ષેત્રપાલ જંક્શન કરવાની માંગ કરાઈ છે. BJP કોર્પોરેટર વ્રજેશ ઉનડકરે સામાન્ય સભામાં માંગ કરી. અગાવ પણ મનપાના બિલ્ડીંગ મુગલસરાયને તાપી ભવન નામ આપવામાં આવ્યું હતું.  તેને ધ્યનમાં રાખી આ માંગ કરવામાં આવી છે. રજુઆતને ધ્યાને રાખી નામકરણ કરવા માટે માંગ કોર્પોરેટર કરી.

અમદાવાદના નવા મકરબા બ્રિજ પરથી યુવકે પડતુ મૂક્યું. 30 વર્ષીય પાર્થ નામનાં યુવકે નવા બનેલા બ્રિજ પરથી પડતૂ મુક્યુ. યુવકે બિમારીથી કંટાળીને આપઘાત કર્યો હોવાની આશંકા. માતા સાથે રહેતો મૃતક યુવક પાર્થ સોયતર. સરખેજ પોલીસે ઘટનાસ્થળે પહોંચીને શરુ કરી તપાસ.

ગુજરાત સરકારે સુરેન્દ્રનગરના પૂર્વ જિલ્લા કલેકટર કે. રાજેશ બાદ વધુ એક આઈએએસ અધિકારીને ઘર ભેગા કર્યા છે. સરકારે IAS અધિકારી ગૌરવ દહિયાને પણ ફરજીયાત વય નિવૃત કરી દેવાયા છે. ગુજરાતમાંથી એક જ દિવસ માં 2 IAS અધિકારીઓની સરકારમાંથી exit થવા પામી છે. ​સેવા સમીક્ષાના અંતે લેવાયું પગલું. આમ ભૂપેન્દ્ર પટેલની સરકારે, એક જ દિવસમાં બે અધિકારી ઘરે બેસાડી દીધા છે.

ભાવનગર પ્રધાનમંત્રી આવાસ યોજનામા નજીવી બાબતે બે જૂથ વચ્ચે અથડામણ થવા પામી છે. ભાવનગર શહેરના સુભાષનગર વિસ્તારમાં આવેલ પ્રધાનમંત્રી આવાસ યોજનામા સ્વાનને પાટુ મારવા જેવી નજેવી બાબતે બે જૂથ વચ્ચે અથડામણ થઈ. એકબીજાને માર મારતા હોય તેવા સીસીટીવી ફૂટેજ પણ સામે આવ્યા. અથડામણની ઘટનામાં 5 લોકો થયા ઈજાગ્રસ્ત. તમામને ભાવનગરની સિવિલ હોસ્પિટલમાં ખસેડવામાં આવ્યા છે. પોલીસે બન્ને પક્ષો વિરુદ્ધ ગુનો નોંધી વધુતપાસ હાથ ધરી છે.

સુરતમાં હોટલ-રેસ્ટોરન્ટ અને ઢાબા ધારકો માટે SMCનો મોટો આદેશ. સુરત મનપાના આરોગ્ય વિભાગે હોટલ રેસ્ટોરન્ટો માટે જાહેર કર્યું જાહેરનામું. જ્યાં પણ જમવાનું બનાવીને પીરસવામાં આવે છે તે તમામ સંસ્થાઓએ રસોડામાં ફરજિયાત કેમેરા લગાવવાના રહેશે. રસોડામાં ચાલતી તમામ કામગીરીનું લાઈવ ફૂટેજ ગ્રાહકો જોઈ શકે તે માટે અલાયદી વ્યવસ્થા કરવી પડશે. કાઉન્ટર પર રાખેલા ટીવી (ઓન-સ્ક્રીન) પર કિચનનું લાઈવ વીડિયો ટેલિકાસ્ટ દર્શાવવું હવેથી ફરજિયાત બનશે. ગ્રાહકો પોતાના ખોરાકની શુદ્ધતા અને સ્વચ્છતા જાતે જ લાઈવ સ્ક્રીન પર નિહાળી શકવા જોઈએ. ખાદ્યપદાર્થો બનાવવામાં સ્વચ્છતા અને પારદર્શકતા જાળવવાના હેતુથી આ કડક આદેશ આપવામાં આવ્યો. જાહેરનામું પ્રસિદ્ધ થતાની સાથે જ શહેરના તમામ હોટલ – રેસ્ટોરન્ટો માલિકોએ આ નિયમનો તાત્કાલિક અમલ કરવાનો રહેશે. નિયમનું પાલન નહીં કરનાર એકમો સામે SMC દ્વારા કડક કાનૂની અને દંડાત્મક કાર્યવાહી કરવામાં આવશે. આદેશનું પાલન નહીં કરનાર સંસ્થાઓ સામે ફૂડ લાયસન્સ સ્થગિત કરવા સુધીના પગલાં ભરવામાં આવશે

વિદ્યાર્થી સંગઠનોના ભારે વિરોધ બાદ આખરે ગુજરાત યુનિવર્સિટીએ દ્રોણાચાર્ય શુટિંગ એકેડમી સાથેનો કરાર પડતો મૂક્યો છે. દ્રોણાચાર્ય શુટિંગ એકેડમી સાથેનું MOU કર્યુ રદ્દ. પૂર્વ સિન્ડિકેટ સભ્યને શૂટિંગ એકેડેમીનો કોન્ટ્રાક્ટ અપાતાં વિરોધ કરાયો હતો. પૂર્વ સિન્ડિકેટ સભ્ય આશિષ અમીનને ટેન્ડરિંગ વગર કોન્ટ્રાક્ટ અપાયો હોવાનો આક્ષેપ કરવામાં આવ્યો હતો. કુલપતિએ ABVP ની રજૂઆત બાદ તાત્કાલિક અસરથી રદ્દ કર્યો કોન્ટ્રાક્ટ.

ગુજરાતના પૂર્વ IAS કે. રાજેશને ફરજિયાત નિવૃત્ત કરાયા. ​કે. રાજેશ સુરેન્દ્રનગરના પૂર્વ કલેક્ટર હતા. ​લાંબા સમયથી સસ્પેન્ડ કે. રાજેશને ઘરે બેસાડી દેવાયા. ​ખાતાકીય તપાસ બાદ સરકારનું મોટું પગલું લેવામાં આવ્યું

વડોદરાના શિનોર સાધલી ગામે રખડતા શ્વાનનો આતંક સામે આવ્યો છે. અલગ અલગ વિસ્તારોમાં હાલ સુધી 20 થી 21 બાળકોને રખડતાં શ્વાને બચકા ભર્યા. બચકાં ભરનારાઓમાં નાના બાળકોની સંખ્યા વધુ. તમામ ઇજાગ્રસ્તોને સાધલી આરોગ્ય કેન્દ્ર લઈ જવાયા. ARV અને TT વેક્સિન આપી તાત્કાલિક સારવાર કરાઈ. પંચવટી ગાર્ડન પાસે બે વર્ષના બાળકને બચકું ભર્યું. મુખ્ય બજારમાં ત્રણ વર્ષની બાળકી પર શ્વાનનો હુમલો. પાંચ વર્ષના બાળક અને બાળકી પર પણ હુમલો. ગઈકાલ સાંજથી આજ સવાર સુધી શ્વાનના હુમલા. રખડતા શ્વાનના આતંકથી ગ્રામજનોમાં ફફડાટ વ્યાપી ગયો છે. સરપંચને જાણ કરી રખડતા શ્વાનને પાંજરે પૂરવાની માંગ.

જામનગરમાં ખાણ ખનીજ વિભાગની આકસ્મિક તપાસમાં રોયલ્ટી ચોરીનો કિસ્સો સામે આવ્યો છે. ઝાંખર પાટીયાથી પડાણા રોડ પર તપાસ હાથ ધરાઈ હતી. બ્લેકટ્રેપ ખનિજ વહન કરતા 3 ડમ્પર અટકાવાયા. 1 ડમ્પર બિનઅધિકૃત રીતે બ્લેકટ્રેપ વહન કરતો ઝડપાયો. 2 ડમ્પરમાં રોયલ્ટી પાસ કરતા વધુ ઓવરલોડ માલ મળ્યો. આશરે રૂ.85 લાખનો મુદ્દામાલ જપ્ત કરાયો છે. ખાણ ખનીજ વિભાગે નિયમોનુસાર કાર્યવાહી હાથ ધરી.

વડોદરાના કરજણ નેશનલ હાઇવે-48 પર CNG કારમાં લાગી આગ. જિંદાલ કંપની પાસે પેટ્રોલ પંપ પર ઘટના બની. CNG ભરાવતી વખતે કારમાં બ્લાસ્ટ થતાં અફરાતફરી મચી ગઈ હતી. બ્લાસ્ટથી અન્ય બે કારને પણ નુકસાન. સદનસીબે ઘટનામાં કોઈ જાનહાનિ નહીં. ઘટનાની જાણ થતાં કરજણ ફાયર ફાયટર સ્થળે પહોંચ્યું.

ગાંધીનગર મહાનગરપાલિકાની ચૂંટણીને લઈને કોંગ્રેસે પોતાનો ચૂંટણી ઢંઢેરો જાહેર કર્યો છે. કોંગ્રેસે મનપામાં તમામ જગ્યાએ ફિક્સ પગાર પ્રથા બંધ કરીને કાયમી ભરતી કરવાનો વાયદો કર્યો છે. સાથે જ શિક્ષિત યુવકો માટે 10 હજાર રોજગારીની તકો ઊભી કરવાની જાહેરાત કરવામાં આવી છે. કોંગ્રેસે ચૂંટણી પ્રચાર દરમિયાન આમ આદમી પાર્ટી પર પણ આક્ષેપો કર્યા છે અને AAPને મત આપવો એટલે ભાજપને મત આપવા સમાન હોવાનો દાવો કર્યો છે. ગાંધીનગર મનપાની 44 બેઠકો માટે 11 ઓક્ટોબરે મતદાન યોજાવાનું છે.

અરવલ્લીના માલપુરના ઉભરાણ ખાતે આવેલા શૂલપાણેશ્વર મંદિરમાંથી લીલો અને સૂકો ગાંજો મળી આવતા પોલીસે કાર્યવાહી કરી છે. અરજીના આધારે માલપુર પોલીસે મંદિરમાં રેડ પાડતા 6 લીલા ગાંજાના છોડ તેમજ સૂકો ગાંજો મળી આવ્યો હતો. પોલીસે કુલ 11.397 કિલોગ્રામ ગાંજો સહિત રૂ.5.69 લાખનો મુદ્દામાલ જપ્ત કર્યો છે. સમગ્ર મામલે મંદિરના ત્રણ પૂજારીઓ સામે ગુનો નોંધવામાં આવ્યો છે, જેમાંથી એકને વોન્ટેડ જાહેર કરવામાં આવ્યો છે. પોલીસે ગાંજાનો જથ્થો ક્યાંથી લાવવામાં આવ્યો હતો અને તેની પાછળ અન્ય કોઈ વ્યક્તિ સંડોવાયેલી છે કે કેમ તે અંગે વધુ તપાસ હાથ ધરી છે.

સાબરકાંઠાના હિંમતનગરમાં બાયપાસ રોડ પર આવેલા સિલ્વર પ્લાઝા કોમ્પ્લેક્સમાં સ્પાની આડમાં ચાલતી દેહવ્યાપારની પ્રવૃત્તિનો AHTUએ પર્દાફાશ કર્યો છે. AHTUની ટીમે ડમી ગ્રાહક મોકલી કાર્યવાહી હાથ ધરી હતી. પ્રાથમિક તપાસમાં મસાજના નામે ગ્રાહકો પાસેથી રૂ.1 હજાર એન્ટ્રી ફી અને વધારાની સર્વિસના નામે રૂ.2થી 3 હજાર લેવામાં આવતા હોવાનું સામે આવ્યું છે. દરોડા દરમિયાન દેહવ્યાપારની પ્રવૃત્તિમાંથી ત્રણ યુવતીઓને મુક્ત કરાવવામાં આવી હતી. સમગ્ર મામલે હિંમતનગર ગ્રામ્ય પોલીસે બે આરોપીઓ સામે ગુનો નોંધી વધુ તપાસ હાથ ધરી છે.

સુરતમાં ફૂડ સેફ્ટી વિભાગ દ્વારા હોટલ અને રેસ્ટોરન્ટમાં સઘન તપાસ હાથ ધરવામાં આવી હતી. શહેરના કુલ 84 હોટલ અને રેસ્ટોરન્ટમાં તપાસ દરમિયાન 39 એકમોમાંથી ખાદ્ય પદાર્થોના સેમ્પલ લેવામાં આવ્યા હતા. તપાસ દરમિયાન હલકી ગુણવત્તાવાળો 193.5 કિલો અખાદ્ય ખોરાક મળી આવતા તેનો નાશ કરવામાં આવ્યો હતો. બેદરકારી બદલ 54 હોટલ અને રેસ્ટોરન્ટને નોટિસ ફટકારવામાં આવી છે, જ્યારે કુલ રૂ.2.77 લાખથી વધુનો દંડ વસૂલવામાં આવ્યો છે. ફૂડ સેફ્ટી વિભાગની કાર્યવાહીને પગલે હોટલ અને રેસ્ટોરન્ટ સંચાલકોમાં ફફડાટ ફેલાયો છે.

અમદાવાદની ગુજરાત યુનિવર્સિટીમાં દ્રોણાચાર્ય એકેડમી ઓફ સ્પોર્ટ્સ એન્ડ આર્ટ્સ (DASA) સાથે થયેલા કરારને લઈને ABVP દ્વારા વિરોધ કરવામાં આવ્યો છે. DASAમાં થયેલી કથિત ગેરરીતિઓ અને વિદ્યાર્થીઓને મળતી સુવિધાઓ તથા વ્યવસ્થામાં ખામીઓના આક્ષેપો સાથે ABVPએ ગુજરાત યુનિવર્સિટીના કુલપતિને આવેદનપત્ર આપ્યું છે. ABVPએ DASA સાથે કરવામાં આવેલો MoU તાત્કાલિક રદ કરવાની તેમજ સમગ્ર મામલે તપાસ કરી જવાબદારો સામે કાર્યવાહી કરવાની માગ કરી છે. સાથે જ DASA સાથે થયેલા કરારના મૂળ દસ્તાવેજો જાહેર કરવાની પણ માંગ કરવામાં આવી છે. વિદ્યાર્થીઓના હિત સાથે ચેડાં થઈ રહ્યા હોવાનો આક્ષેપ કરીને ABVPએ યુનિવર્સિટી તંત્ર પાસે સમગ્ર મામલે સ્પષ્ટતા અને કાર્યવાહી કરવાની માગ કરી છે.

વડોદરાના નવલખી મેદાનમાં આ વર્ષે પણ નવરાત્રિ દરમિયાન ‘નો તિલક, નો એન્ટ્રી’નો નિયમ લાગુ કરવામાં આવ્યો છે. મેદાનની બોક્સ ઓફિસ બહાર ‘તિલક નહીં તો એન્ટ્રી નહીં’ના બોર્ડ લગાવવામાં આવ્યા છે. આયોજકોના આ નિર્ણય બાદ ગરબા રમવા આવતા ખેલૈયાઓમાં પણ ચર્ચા જોવા મળી હતી. કેટલાક ખેલૈયાઓએ આયોજકના નિર્ણયને આવકાર્યો હોવાનું સામે આવ્યું છે. નવરાત્રિ દરમિયાન મેદાનમાં પ્રવેશ માટે તિલકને લઈને આ નિયમ લાગુ કરવામાં આવ્યો હોવાનું આયોજકો દ્વારા જણાવાયું છે.

ગુજરાત યુનિવર્સિટીના પરીક્ષા વિભાગના ટાઈમટેબલને લઈને વિવાદ સર્જાયો છે. એક જ દિવસે અને સરખા સમયે રેગ્યુલર તથા બેકલોગની બે પરીક્ષા ગોઠવવામાં આવતા વિદ્યાર્થીઓ સામે એક સાથે બે પેપર આપવાની મુશ્કેલી ઊભી થઈ છે. જેના કારણે એક પરીક્ષા છોડવી પડે તો શૈક્ષણિક વર્ષ બગડવાની ભીતિ વિદ્યાર્થીઓમાં વ્યક્ત કરવામાં આવી છે. વિદ્યાર્થીઓ દ્વારા વારંવાર રજૂઆત કરવા છતાં પરીક્ષા વિભાગ દ્વારા કોઈ ઉકેલ નહીં લાવવામાં આવ્યો હોવાનો આક્ષેપ કરવામાં આવ્યો છે. વિદ્યાર્થીઓ અને વિદ્યાર્થી સંગઠનોએ સરખા સમયે ગોઠવાયેલી પરીક્ષાઓની તારીખમાં તાત્કાલિક ફેરફાર કરવાની માગ કરી છે. જો સમસ્યાનું નિરાકરણ નહીં આવે તો યુનિવર્સિટી પરિસરમાં ઉગ્ર આંદોલન અને ઘેરાવ કરવાની ચીમકી પણ આપવામાં આવી છે.

અમદાવાદના વાડજ વિસ્તારમાં ઉસ્માનપુરા નાબાર્ડ બેંક નજીક જાહેર રોડ પર થયેલી લૂંટનો ભેદ LCB ઝોન-1ની ટીમે ઉકેલી બે આરોપીઓની ધરપકડ કરી છે. પોલીસે મોહમદઅરમાન શેખ અને સોહીલખાન પઠાણને ઝડપી લીધા છે. પ્રાથમિક તપાસમાં બંને આરોપીઓ દાણીલીમડા વિસ્તારમાં રહેતા હોવાનું સામે આવ્યું છે. પોલીસે આરોપીઓ પાસેથી લૂંટમાં ગયેલી સોનાની વીંટી, iPad અને રોકડ સહિતનો મુદ્દામાલ જપ્ત કરી વધુ કાર્યવાહી હાથ ધરી છે. ઘટનાને લઈને પોલીસે બંને આરોપીઓની પૂછપરછ શરૂ કરી લૂંટના ગુનામાં તેમની ભૂમિકા અંગે વધુ તપાસ હાથ ધરી છે.

સુરતમાં નાસ્તાની લારીની આડમાં MD ડ્રગ્સનું વેચાણ કરતા રેહાન અંસારીની પૂણા પોલીસે ધરપકડ કરી છે. રેહાન અંસારી ભાજપના લઘુમતી મોરચાના પૂર્વ ઉપપ્રમુખ જમીલ બિરીયાનીનો પુત્ર હોવાનું સામે આવ્યું છે. પોલીસે આરોપી પાસેથી 3.26 ગ્રામ MD ડ્રગ્સ સહિત ડિજિટલ વજનકાંટો, રોકડ અને મોપેડ મળી કુલ રૂ.70,180નો મુદ્દામાલ જપ્ત કર્યો છે. પ્રાથમિક તપાસમાં રેહાન મોપેડની ડીકીમાં ડિજિટલ વજનકાંટો રાખીને ગ્રાહકોને ડ્રગ્સ સપ્લાય કરતો હોવાનું સામે આવ્યું છે. પૂછપરછમાં તેણે નવસારી બજારના નદીમ પાસેથી ડ્રગ્સ લાવ્યું હોવાનું જણાવ્યું છે. નદીમ હાલ પોલીસ ચોપડે વોન્ટેડ જાહેર થયો છે અને 2024માં રાજસ્થાનથી મંગાવવામાં આવેલા રૂ.35 લાખના ડ્રગ્સના કેસમાં પણ ઝડપાઈ ચૂક્યો હોવાનું પોલીસ તપાસમાં સામે આવ્યું છે. પોલીસે ગુનો નોંધી ડ્રગ્સના નેટવર્ક અંગે વધુ તપાસ હાથ ધરી છે.

અમદાવાદમાં ફટાકડાના વેચાણ સામે AMC દ્વારા કાર્યવાહી કરવામાં આવી છે. કાલુપુર દરવાજાથી કાલુપુર ટાવર સુધી આવેલી ફટાકડાની 30 દુકાનોને સીલ કરી દેવામાં આવી છે. ફટાકડાના વેચાણ માટે જરૂરી મંજૂરી અને સંબંધિત દસ્તાવેજોના પૂરાવા રજૂ કરવા દુકાનદારોને સૂચના આપવામાં આવી છે. AMCના જણાવ્યા મુજબ, દુકાનદારો જરૂરી પૂરાવા રજૂ કરશે તો સીલ ખોલી આપવામાં આવશે. AMCને મળેલી ફરિયાદના આધારે આ કાર્યવાહી કરવામાં આવી હોવાનું જાણવા મળ્યું છે.