અમદાવાદ અને ગાંધીનગરમાં સામાન્ય વરસાદ વરસશે, હવામાન વિભાગે આગામી પાંચ દિવસની કરી આગાહી

ગુજરાતમાં વરસાદે થોડા દિવસથી વિરામ લીધો છે. રાજયમાં કેટલાક વિસ્તારમાં છુટો છવાયો વરસાદ (Rain) વરસી રહ્યો છે. જેના કારણે વાતાવરણમાં બફારાનો પણ અનુભવ થઇ રહ્યો છે. અમદાવાદ (Ahmedabad) અને ગાંધીનગરમાં વાતાવરણમાં ભેજનું પ્રમાણ ખૂબ જ વધ્યુ છે. ત્યારે હવે હવામાન વિભાગ દ્વારા વરસાદને લઇને પાંચ દિવસની આગાહી કરવામાં આવી છે. હવામાન વિભાગના જણાવ્યા અનુસાર આગામી પાંચ દિવસમાં રાજ્યમાં વરસાદ પડશે. અમદાવાદ અને ગાંધીનગરમાં પાંચ દિવસ સામાન્ય વરસાદ વરસવાની આગાહી છે.

6 ઓગસ્ટથી વરસાદનું જોર વધશે

રાજ્યમાં ફરીથી વરસાદી માહોલ જામશે. થોડા દિવસ વિરામ લીધા બાદ હવે આગામી પાંચ દિવસ રાજ્યમાં વરસાદ પડવાની આગાહી છે. ખાસ કરીને સૌરાષ્ટ્ર (Saurashtra)અને કચ્છમાં વરસાદનું જોર વધુ રહેશે. સૌરાષ્ટ્ર અને કચ્છમાં આવતીકાલથી વરસાદ પડશે. 6 ઓગસ્ટથી વરસાદનું જોર વધવાની આગાહી પણ કરવામાં આવી છે. વરસાદી સિસ્ટમ સક્રિય થતાં હળવાથી મધ્યમ વરસાદની આગાહી કરવામાં આવી છે. આખો મહિનો વરસાદી માહોલ છવાયેલો રહેશે. અમદાવાદ અને ગાંધીનગરમાં સામાન્ય વરસાદ રહેવાની આગાહી છે. જેના પગલે લોકોને ગરમી અને બફારામાંથી રાહત મળશે.

કેવુ રહેશે હવામાન ?

હવામાન વિભાગની માહિતી પ્રમાણે આજે દક્ષિણ ગુજરાત અને મધ્ય ગુજરાતમાં છૂટોછવાયો વરસાદ પડશે જ્યારે સૌરાષ્ટ્રના કેટલાક શહેરોમાં પણ હળવા વરસાદની આગાહી કરવામાં આવી છે. જ્યારે અમુક શહેરોમાં એક થી બે ડિગ્રી તાપમાન પણ વધવાની શક્યતા છે.જો આજના હવામાનની વિગતવાર વાત કરીએ તો 2 ઓગસ્ટ એ અમદાવાદમાંન્યૂનતમ તાપમાન 27 અને મહતમ તાપમાન 34 રહેશે. તેમજ દિવસ દરમિયાન વાદળછાયુ વાતાવરણ રહેશે.તો અમરેલીમાં ન્યૂનતમ તાપમાન 26 અને મહતમ તાપમાન 33 રહેશે.તેમજ 72 ટકા ભેજવાળુ વાતાવરણ રહેશે.