સુરતીઓની માનવતા, સેવાભાવ અને મુશ્કેલીના સમયે મદદે દોડી જવાની ભાવના દેશભરમાં જાણીતી છે. ત્યારે સુરતનાં મહિલા તબીબ ડૉ. કલ્પના સવાણીના માનવતાભર્યા કાર્યએ આ ભાવનાને વધુ એક વખત ઉજાગર કરી છે. નવરાત્રિ દરમિયાન ગરબાની રમઝટમાં સામેલ થવાને બદલે તેમણે એક ગંભીર દર્દીનો જીવ બચાવવાને પ્રાથમિકતા આપી હતી. મોડી રાત્રે હોસ્પિટલમાંથી ઇમરજન્સી કોલ મળતાં જ તેઓ તાત્કાલિક હોસ્પિટલ પહોંચી ગયાં હતાં.

મળતી માહિતી મુજબ, બારડોલીથી આવેલા એક દર્દીની સ્થિતિ અત્યંત નાજુક હતી. દર્દીને વેન્ટિલેટર સપોર્ટ પર રાખવામાં આવ્યો હતો અને તાત્કાલિક તબીબી સારવારની જરૂરિયાત હતી. આવી ગંભીર પરિસ્થિતિમાં હોસ્પિટલમાંથી ડૉ. કલ્પના સવાણીને ઇમરજન્સી કોલ કરવામાં આવ્યો હતો.

ગરબાની રમઝટ છોડીને ફરજના માર્ગે દોડી ગયાં

નવરાત્રિ એટલે ભક્તિ, શક્તિની આરાધના અને ગરબાના રંગમાં રંગાવાનો ઉત્સવ. જોકે, ડૉ. કલ્પના સવાણી માટે તે સમયે એક દર્દીનો જીવ બચાવવો સૌથી મહત્ત્વનો હતો. ઇમરજન્સી કોલ મળતાં જ તેમણે વિલંબ કર્યા વિના હોસ્પિટલ પહોંચવાનો નિર્ણય લીધો અને દર્દીની સારવાર શરૂ કરી.

વેન્ટિલેટર પર રહેલા દર્દીની ગંભીર સ્થિતિને ધ્યાનમાં રાખીને તાત્કાલિક સારવાર કરવામાં આવી હતી. સમયસર તબીબી મદદ મળતાં દર્દીનો જીવ બચી ગયો હતો. ડૉક્ટરની સમયસૂચકતા, ફરજ પ્રત્યેની નિષ્ઠા અને દર્દી પ્રત્યેની સંવેદનશીલતાએ માનવતાનું પ્રેરણાદાયી ઉદાહરણ પૂરું પાડ્યું છે.

દર્દીનો જીવ બચાવવો એ જ માતાજીના સાચા આશીર્વાદ

ડૉ. કલ્પના સવાણીએ દર્દીનો જીવ બચાવવાના આ અનુભવને માતાજીના સાચા આશીર્વાદ ગણાવ્યા હતા. તેમના આ અભિગમમાં તબીબી વ્યવસાયની જવાબદારી સાથે માનવસેવા અને કરુણાની ભાવના પણ સ્પષ્ટ જોવા મળે છે. તબીબ માટે દર્દીની સારવાર માત્ર વ્યવસાયિક ફરજ જ નહીં, પરંતુ કોઈના જીવનને બચાવવાની મહત્ત્વપૂર્ણ જવાબદારી પણ છે. નવરાત્રિ જેવા પર્વમાં ગરબાની મોજ કરતાં દર્દીના જીવનને પ્રાથમિકતા આપીને ડૉ. કલ્પના સવાણીએ આ વાતને સાર્થક કરી બતાવી છે.

આ ઘટના માત્ર એક મહિલા તબીબની ફરજનિષ્ઠાની વાત નથી, પરંતુ મુશ્કેલીના સમયે માનવતા અને સેવાભાવને સૌથી ઉપર રાખવાની પ્રેરણા પણ આપે છે. દર્દીનો જીવ બચાવવાના આ કાર્યથી સુરતની માનવતાભરી પરંપરા ફરી એક વખત ચર્ચામાં આવી છે.

Breaking News : એક, બે નહીં 16 બોગસ ડોક્ટર ઝડપાયા, સુરતના પાંડેસરામાં SOG અને આરોગ્ય વિભાગનો દરોડો, જુઓ Video