દિવાળીના તહેવારમાં કાંકરીયાની રોનક ઝાંખી પડી! મીની ટ્રેન અને બલૂન સેવાઓ ઠપ

કાંકરિયામાં એમ્યુઝમેન્ટ પાર્ક 2માં આવેલી ડિસ્કવરી રાઈડ તૂટી પડ્યા બાદ બંને એમ્યુઝમેન્ટ પાર્ક બંધ કરી દેવામાં આવ્યા છે. 2010માં કાંકરિયામાં સ્વર્ણિમ જયંતિ અટલ એક્સપ્રેસ ટ્રેન શરૂ કરવામાં આવી હતી. જે બાળકો અને લોકોના આકર્ષણનું કેન્દ્ર બની હતી. સ્વર્ણિમ જયંતિ ટ્રેનમાં કાંકરિયાની સફર માણવા સહેલાણીઓ આવતા હતા. પરંતુ મેન્ટેનન્સના અભાવે ટ્રેન બંધ છે. ટ્રેનના પાટા ઘસાયા હોવાથી છેલ્લા પાંચ મહિનાથી ટ્રેનને તાળા મારી દેવામાં આવ્યા છે.

કાંકરિયામાં સહેલાણીઓ માટે બલૂન સફારી માટે આવતા હોય છે. પરંતુ હાલ બલૂન સફારી પણ બંધ છે. જેના કારણે કાંકરિયાની મુલાકાતે આવતા મુલાકાતીઓ બલૂન સફારીની મજા પણ માણી શકતા નથી. કોર્પોરેશન દ્વારા કાંકરિયાની જોખમી ન હોય તેવી રાઈડ્સ, બલૂન અને મીની ટ્રેન શરૂ કરવા માટે રાજ્ય સરકારને રજૂઆત કરી છે. દિવાળી વેકેશન પૂર્ણ થાય તે પહેલા કેટલીક રાઈડ્સ અને ટ્રેન શરૂ થાય તે માટે અધિકારીઓને સૂચના આપવામાં આવી છે. પરંતુ વેકેશનમાં રાઈડ્સ અને ટ્રેન શરૂ થાય તેવું લાગતું નથી.

કાંકરીયામાં દિવાળીના તહેવારમાં જ મહત્વના આકર્ષણો બંધ હોવાથી સહેલાણીઓ ઘટ્યાં છે. તહેવારમાં પણ સહેલાણીઓની સંખ્યા ઓછી જોવા મળી રહી છે. દિવાળીના તહેવારમાં દરરોજ અહીંયા 25થી 30 હજાર સહેલાણીઓ કાંકરીયા લેક ફ્રન્ટ ખાતે આવતાં હોય છે. પરંતુ આ વર્ષે દિવાળીના તહેવારમાં સહેલાણીની સંખ્યા ઘટીને 12થી 15 હજાર થઈ ગઈ છે. જેના કારણે કાંકરીયામાં આવેલા ફૂડ કોર્ટની રોન પણ ઝાંખી પડી ગઈ છે.