Breaking News: અમદાવાદની સમરસ ગર્લ્સ હોસ્ટેલના ભોજનમાં ફરી જીવાત નીકળતા હોબાળો, 14 માગ સાથે વિદ્યાર્થિનીઓનો વિરોધ, જુઓ Video

અમદાવાદની ગુજરાત યુનિવર્સિટી કેમ્પસમાં આવેલી સમરસ ગર્લ્સ હોસ્ટેલમાં ભોજનની ગુણવત્તાને લઈને ફરી વિવાદ સર્જાયો છે. હોસ્ટેલના ભોજનમાં વંદા જેવી જીવાત મળી આવતા વિદ્યાર્થિનીઓમાં રોષ ફેલાયો હતો. અગાઉ પણ ભોજનમાં જીવાત મળવા સહિતની ફરિયાદો સામે આવી ચૂકી છે.

મોડી રાત્રે વિદ્યાર્થિનીઓનો વિરોધ

ફરી એકવાર ભોજનમાં જીવાત નીકળતા મોડી રાત્રે વિદ્યાર્થિનીઓએ NSUIના કાર્યકરો સાથે મળીને વિરોધ નોંધાવ્યો હતો. વિદ્યાર્થિનીઓએ ભોજનની ગુણવત્તા સામે સવાલો ઉઠાવી હોસ્ટેલ તંત્ર સામે નારાજગી વ્યક્ત કરી હતી. અગાઉ પણ 100થી વધુ વિદ્યાર્થિનીઓએ ભોજન અને અન્ય સુવિધાઓને લઈને વિરોધ કર્યો હતો.

14 માગ સાથે રજૂઆત

ઘટના બાદ વિદ્યાર્થિનીઓ અને NSUI દ્વારા હોસ્ટેલ તંત્ર સમક્ષ કુલ 14 માગ રજૂ કરવામાં આવી છે. જેમાં ભોજનની ગુણવત્તા સુધારવા અને વારંવારની ફરિયાદોનું કાયમી નિરાકરણ લાવવાની માગનો સમાવેશ થાય છે. અગાઉ વિદ્યાર્થિનીઓએ ભોજન પૂરું પાડતી એજન્સી સામે પણ કાર્યવાહી કરવાની માગ કરી હતી.

માગ નહીં સંતોષાય તો ભૂખ હડતાળની ચીમકી

NSUI દ્વારા સ્પષ્ટ ચીમકી આપવામાં આવી છે કે વિદ્યાર્થિનીઓની માગ સંતોષવામાં નહીં આવે તો ભૂખ હડતાળ સહિત ઉગ્ર વિરોધ કરવામાં આવશે. વારંવાર ફરિયાદો છતાં સમસ્યાનો કાયમી ઉકેલ ન આવતો હોવાનો આક્ષેપ વિદ્યાર્થિનીઓ દ્વારા કરવામાં આવ્યો છે. અગાઉ ભોજન પૂરું પાડતી એજન્સીને નોટિસ આપવામાં આવી હોવા છતાં સ્થિતિમાં સુધારો ન થયો હોવાનો પણ દાવો સામે આવ્યો છે.

કોલેજ તંત્રની ખાતરી બાદ ધરણા મોકૂફ

વિદ્યાર્થિનીઓ અને NSUIના વિરોધ બાદ કોલેજ તંત્રએ રજૂ કરવામાં આવેલી માગણીઓ પૂરી કરવાની ખાતરી આપી હતી. તંત્રની ખાતરી બાદ હાલ ધરણા મોકૂફ રાખવામાં આવ્યા છે. જોકે, માગણીઓનો અમલ નહીં થાય તો ફરીથી વિરોધ કરવાની ચીમકી આપવામાં આવી છે.

અગાઉ પણ કેન્ટીન સંચાલક બદલવાની માગ

સમરસ ગર્લ્સ હોસ્ટેલમાં ભોજનની ગુણવત્તા અંગે અગાઉ પણ અનેક ફરિયાદો સામે આવી છે. ભોજનમાં જીવાત મળવા ઉપરાંત પીવાના પાણી અને અન્ય પાયાની સુવિધાઓ અંગે પણ વિદ્યાર્થિનીઓએ સવાલો ઉઠાવ્યા હતા. ભોજન પૂરું પાડતી એજન્સીને બદલવાની અથવા બ્લેકલિસ્ટ કરવાની માગ પણ અગાઉ કરવામાં આવી હતી.

આ પણ વાંચો- Breaking News : વલસાડના વાપીમાં સ્વિમિંગ પુલમાં ડૂબી જવાથી 20 વર્ષીય વિદ્યાર્થિનીનું મોત, જુઓ Video