ભાવનગરમાં જાહેરમાં કચરો ફેંકનાર દંડાશે, સ્વચ્છતા માટે રાજયમાં ભાવનગર મહાનગર પાલિકાનો સૌ-પ્રથમ પ્રયોગ

ભાવનગરમાં હવે જાહેરમાં કચરો ફેંકનાર પણ દંડાશે. સ્વચ્છતા માટે આખા ગુજરાતમાં સૌ-પ્રથમ વખત ભાવનગરમાં આ પ્રયોગ હાથ ધરવામાં આવ્યો છે. મહાનગરપાલિકાના સોલિડ વેસ્ટ વિભાગ દ્વારા રસ્તા પર કચરો ફેંકતા શહેરીજનો પર નજર રાખવા માટે બે કર્મચારીઓને ભાવનગર પોલીસના CCTV વિભાગમાં તૈનાત કરાયા છે. જેઓ શહેરના 185 CCTV કેમેરા પર સતત નજર રાખી રહ્યા છે. જો કોઈ વાહનચાલક જાહેરમાં કચરો ફેંકતો દેખાશે તો તેને દંડ ફટકારવામાં આવશે. વાહન પરથી કચરો ફેંકનાર કોણ હતો તેની જાણકારી મળી શકે છે. પરંતુ સવાલ એ થાય કે કોઈ ચાલીને જતો વ્યક્તિ કચરો ફેંકે તો તેને કેવી રીતે દંડ ફટકારવો? આવા કેસમાં એવો નિર્ણય લેવાયો છે કે જે દુકાન કે પાનના ગલ્લા પાસે રાહદારીએ કચરો ફેંક્યો હશે તે દુકાનદાર અથવા પાનના ગલ્લાવાળાને દંડ ફટકારવામાં આવશે. દુકાન કે ગલ્લો સિઝ કરવા સુધીના પગલાં લેવાશે.