એવોર્ડ લેવામાં નંબર-1, કામમાં થર્ડ ક્લાસ! ખરાબ રસ્તા રિપેર કરવાના બદલે સારા રોડ પર જ ફરી ‘ડામર’ પથરાયો, આ કામગીરી પાછળનો અસલી ખેલ શું?
અમદાવાદના બાપુનગરમાંથી એક એવો કિસ્સો સામે આવ્યો છે કે, જેણે અમદાવાદ મ્યુનિસિપલ કોર્પોરેશનની કામગીરી સામે મોટા સવાલો ઊભા કર્યા છે. વાત એમ છે કે, જે જગ્યા પર સારો રોડ છે ત્યાં જ ડામર પાથરીને નવો રોડ બનાવવામાં આવ્યો છે.
અમદાવાદ મ્યુનિસિપલ કોર્પોરેશન (AMC)ના અધિકારીઓ ભલે સ્માર્ટ સિટીના એવોર્ડ મેળવી લેતા હોય પરંતુ સિક્કાની બીજીબાજુએ આ જ અધિકારીઓની મિલીભગતથી ચાલતા કૌભાંડો અને નબળી કામગીરીની પોલ ખુલી રહી છે.
ઉપરથી ચમકતી કાળી ડામરની સડકો જોઈને ભલે એમ લાગે કે વાહ, શું કામ થયું છે પરંતુ આ રસ્તાઓની અસલી હકીકત કંઈક જુદી જ છે. જો આ રોડની મજબૂતાઈ અને ગુણવત્તાની તટસ્થ તપાસ કરવામાં આવે, તો તંત્રની કામગીરીના લીરેલીરા ઊડી જાય તેમ છે. સ્થાનિકોનો આક્ષેપ છે કે, આ કોઈ મજબૂત રોડ નથી પરંતુ તંત્રના ભ્રષ્ટાચારને છુપાવવા માટે કરાયેલો માત્ર ‘મેકઅપ’ છે.
આ આખો મામલો અમદાવાદના બાપુનગર વિસ્તારનો છે. અહીં આવેલો સ્ટેડિયમ રોડ પહેલેથી જ એકદમ સારી અને મજબૂત સ્થિતિમાં હતો, તેમ છતાં જૂના રોડ પર જ નવો રોડ બનાવવાની કામગીરી શરૂ કરી દેવાઈ. જૂના રોડ પર ડામર પાથરીને તેને નવો દેખાડવાનો પ્રયાસ તો થયો પણ આ ડામરની ગુણવત્તા એટલી હલકી છે કે, રસ્તા પરથી હાથ અડાડતાની સાથે જ ડામર ઉખડી રહ્યો છે. સ્થાનિકોનો દાવો છે કે, અહીં કોઈ નવો રોડ બનાવવાની જરૂર જ નહોતી, માત્ર કોન્ટ્રાક્ટરના કરોડોના બિલ પાસ કરાવવા માટે જ આ કામગીરી ઊભી કરવામાં આવી છે.
આ હલકી ગુણવત્તાના કામથી હવે અમદાવાદ મનપા સામે અનેક આકરા સવાલો ઊઠી રહ્યા છે:
- જો રોડ એકદમ સારો હતો, તો તેના પર ફરીથી કરોડોનો ધુમાડો કરીને નવો રોડ બનાવવાની જરૂર કેમ પડી?
- કરોડો રૂપિયાના ખર્ચે બનેલા આ નવા ડામર રોડની ગુણવત્તા આટલી થર્ડ-ક્લાસ કેમ છે?
- સારો રસ્તો હોવા છતાં નવો રોડ બનાવીને કોના ગજવા ભરવાનું કારસ્તાન ચાલી રહ્યું છે?
- શું મનપાના એન્જિનિયરો આ કામગીરીનું કોઈ સુપરવિઝન કરે છે કે પછી આંખ આડા કાન કરી રહ્યા છે?
- શું ગુણવત્તાની ઐસીતૈસી કરીને અધિકારીઓએ આ કામ માત્ર કાગળ પર બિલ મૂકવા પૂરતું જ કર્યું છે?
- અમદાવાદના અનેક વિસ્તારોમાં રસ્તાઓ બિસ્માર હાલતમાં છે, તે રિપેર કરવાને બદલે સારા રસ્તા પર ડામર પટ્ટી મારીને જનતાના ટેક્સના પૈસા કેમ વેડફાઈ રહ્યા છે?
