Ahmedabad: એક નબીરાના સ્પીડમાં કાર ચલાવવાના શોખમાં બે નિર્દોષ યુવાનોને મોત મળ્યું
આરોપીએ કબુલાત કરી છે કે ગાડી રોંગ સાઈડમાં હોવા છતાં પુરઝડપે ગાડી ચલાવતો હતો ત્યારે સામે બાઇક ચાલક આવ્યો જેનો ધીરજને ખ્યાલ હોવા છતાં અકસ્માત કરી તેને કચડી નાખ્યો હતો.
અમદાવાદ (Ahmedabad) માં એક નબીરાના ઓવર સ્પીડ (over speed) માં કાર ચલાવવાના શોખમાં બે નિર્દોષ યુવાનોને મોત (death) મળ્યું છે. બે પરિવારોએ પોતાના લાડકવાયા દિકરા ગુમાવ્યા છે. એસ.પી.રિંગરોડ નજીક થયેલ અકસ્માતમાં કાર ચલાવતા યુવકની ધરપકડ કરી લેવામાં આવી છે. કાર માલિકી લઈ ચાલેલા ડ્રામાં બાદ પોલીસે કાર ચાલકની ધરપકડ કરી રિમાન્ડ મેળવી વધુ તપાસ શરૂ કરી છે.
ટ્રાફિક પોલીસે જેની ધરપકડ કરી છે તે ધીરજ દિપક ઠાકોરે પોતાની થાર કારથી બાઇક સવાર બે મિત્રો કચડી મોતને ઘાટ ઉતાર્યા હતા. અકસ્માતના બનાવની વિગતવાર વાત કરીએ તો 28 જૂનના રોજ સાંજના સમયે મહંમદપુરા ઝવેરી સર્કલથી એસપી રિંગરોડ તરફ રોંગ સાઈડ પર થાર કાર ચાલક ધીરજ ઠાકોર પુરઝડપે કાર ચલાવી સુરેશ ઠાકોર અને સારંગ કોઠારી નામના બાઇક સવાર મિત્રોને કચડી મારી મોત ઘાટ ઉતારી ફરાર થઈ ગયો હતો. થાર ગાડીમાં ધીરજ ઠાકોર સાથે તેના 3 મિત્રો પણ હતા. જોકે અકસ્માત થતાં આ તમામ શખસો કાર મૂકી ભાગી ગયા હતા. આ અંગે ટ્રાફિક પોલીસે નાસી છૂટેલા થાર ચાલક વિરુદ્ધ ગુનો નોંધી અકસ્માત કરનાર યુવક ધીરજ ઠાકોરની ધરપકડ કરી છે.
ટ્રાફિક પોલીસે અકસ્માત બાબતે તપાસ કરતાં આ કારનો માલિક સંજય ઠાકોર હોવાનું પુરવાર થયું છે. જેના આધારે પોલીસે સંજય ઠાકોરના ઘરે જઈ તપાસ કરતા સામે આવ્યું કે કાર કૌટુંબિક ભાઈને વેચી દીધી હતી. જેનું સંજય ઠાકોરે એફિડેવિટ કરાવ્યું હોવાનું કહી આ કાર કૌટુંબિક ભાઈ કિરણ ઠાકોરને વેચી હતી. જેમાં કિરણ ઠાકોરનો ભાઈ ધીરજ ઠાકોર દરરોજ થાર ગાડી લઈ મિત્રો સાથે ઓવર સ્પીડ કાર ચલાવતો હોવાનું સામે આવ્યું છે. આરોપી ધીરજ ઠાકોર કોઈ કામધંધો કરતો નથી પરતું મોજશોખ માટે થાર ગાડી લઈ ફરતો હતો.
અકસ્માત કરનાર આરોપી 23 વર્ષીય ધીરજ ઠાકોરની પુછપરછ કરતા તેણે જણાવ્યું કે પોતાના મિત્રો સાથે ગાડી લઈ ફરવામાં નીકળ્યો હતો. ગાડી રોંગ સાઈડમાં હોવા છતાં પુરઝડપે ગાડી ચલાવતો હતો ત્યારે સામે બાઇક ચાલક આવ્યો જેનો ધીરજને ખ્યાલ હોવા છતાં તેને કચડી નાખી અકસ્માત કર્યો હોવાની કબૂલાત કરી છે. હાલ અકસ્માતમાં ટ્રાફિક પોલીસે આરોપીના રિમાન્ડ મેળવી વૈજ્ઞાનિક ઢબે તપાસ હાથ ધરી છે.