ભૂલ ભુલૈયા કરતા કેટલી અલગ છે અક્ષય કુમારની આ ફિલ્મ, પ્રિયદર્શને કર્યો મોટો ખુલાસો

Priyadarshan on Bhooth Bangla : અક્ષય કુમારની ‘ભૂત બંગલા’ની જાહેરાત થતા જ ઘણી ચર્ચાઓ ચાલવા લાગી છે. ચાહકો આ ફિલ્મની આતુરતાથી રાહ જોઈ રહ્યા છે. અક્ષય કુમારની ‘ભૂત બંગલા’ આવતા મહિને રિલીઝ થવાની તૈયારીમાં છે. આ ફિલ્મ 15 વર્ષ પછી અક્ષય અને પ્રિયદર્શનના સહયોગની વાપસી દર્શાવે છે. ‘ભૂત બંગલા’નું ટીઝર તાજેતરમાં રિલીઝ કરવામાં આવ્યું હતું. ત્યારે લોકો 2007ની ફિલ્મ ‘ભૂલ ભુલૈયા’ જેવું જ છે તેવી ચર્ચાઓ થવા લાગી હતી. આ દરમિયાન, પ્રિયદર્શને ‘ભૂત બંગલા’ અને ‘ભૂલ ભુલૈયા’ વચ્ચેનો તફાવત સમજાવ્યો છે તેમજ ખુલાસો કર્યો છે કે બંને ફિલ્મો એકબીજાથી સંપૂર્ણપણે અલગ છે.

‘ભૂત બંગલા’ના ટીઝર બાદ ‘ભૂલ ભુલૈયા’ની કરાઇ યાદ

‘ભૂત બંગલા’ 10 એપ્રિલ, 2026 ના રોજ સિનેમાઘરોમાં રિલીઝ થવાની છે. તાજેતરના ટીઝરમાં અક્ષય કુમાર, રાજપાલ યાદવ અને પરેશ રાવલની જૂની ત્રિપુટી દર્શાવવામાં આવી છે. જે 2007 ની ‘ભૂલ ભુલૈયા’ માં દેખાયા હતા. આ ટીઝર જોઈને, લોકો ‘ભૂત બંગલા’ ની તુલના ‘ભૂલ ભુલૈયા’ સાથે કરવા લાગ્યા. જોકે પ્રિયદર્શને એક ઇન્ટરવ્યુમાં સ્પષ્ટતા કરી હતી કે બંને ફિલ્મો સંપૂર્ણપણે અલગ છે, ફક્ત કલાકારો એ જ છે.

શું ‘ભૂલ ભુલૈયા’જેવુ જ છે ‘ભૂત બંગલા’ ફિલ્મ ?

પ્રિયદર્શનને પૂછવામાં આવ્યું કે ‘ભૂલ ભુલૈયા’ અને ‘ભૂત બંગલા’ વચ્ચેની સરખામણી થાય છે તેના પર તમે શું કહેશો ? ત્યારે પ્રિયદર્શને જવાબ આપ્યો, ‘તમે આ બે ફિલ્મોની તુલના કરી શકશો નહીં કારણ કે બંને ફિલ્મોના દ્રષ્ટિકોણ સંપૂર્ણપણે અલગ છે. ‘ભૂલ ભુલૈયા’ એક મનોવૈજ્ઞાનિક થ્રિલર હતી, જ્યારે ‘ભૂત બંગલા’ એક કાલ્પનિક ફિલ્મ છે. તેના દ્રશ્યો અને રચના ‘ભૂલ ભુલૈયા’ થી સંપૂર્ણપણે અલગ છે. ‘ભૂત બંગલા’ એક સંપૂર્ણપણે નવી ફિલ્મ છે અને તે અન્ય કોઈ ફિલ્મની રિમેક નથી. અમે તેની સ્ક્રિપ્ટ એવી રીતે લખી છે કે તે દર્શકોમાં ખૂબ જ ઉત્સાહ પેદા કરી શકે.’

‘દરેક વ્યક્તિના સૂચનોનું માન રખાય છે’

આ ઉપરાંત દિગ્દર્શકને પૂછવામાં આવ્યું કે આ ફિલ્મમાં કેટલી કોમેડી સ્ક્રિપ્ટમાં પહેલાથી લખાયેલી હતી અને કેટલી સેટ પર બનાવવામાં આવી હતી. પ્રિયદર્શને જવાબ આપ્યો, ‘90% સ્ક્રિપ્ટમાં લખાયેલી હતી અને 10% સેટ પર બનાવવામાં આવી હતી. દરેક વ્યક્તિ પોતાના સૂચનો આપે છે. જો મને લાગે કે તે ફિલ્મ માટે સારું રહેશે, તો હું તેને સ્વીકારું છું. નહીં તો, હું તેને સ્વીકારતો નથી.’

10 એપ્રિલે બોક્સ ઓફિસ પર ધમાકો ! આવી રહી છે આ બે ફિલ્મો, જુઓ કોની વધશે ચિંતા..વધુ વાંચવા માટે અહીં ક્લિક કરો