બંગાળમાં મતદાન વચ્ચે ખેલા હોબે…! પોલિંગ બૂથ બહાર લાઠી-ડંડા ઉછળ્યા, નેતાઓના કાફલા પર પથ્થરમારો

પશ્ચિમ બંગાળમાં પ્રથમ તબક્કાના મતદાનમાં 16 જિલ્લાની 152 બેઠકો પર વોટિંગ ચાલુ છે, પરંતુ લોકશાહીના આ પર્વમાં મુર્શિદાબાદમાં હિંસાની આગ ભભૂકી ઉઠી છે. અહીં તૃણમૂલ કોંગ્રેસ (TMC) અને હુમાયુ કબીરના સમર્થકો વચ્ચે ભારે હોબાળો અને જૂથ અથડામણ જોવા મળી છે.

હુમાયુ કબીરના કાફલા પર હુમલો

મુર્શિદાબાદના પોલિંગ બૂથની બહાર બંને પક્ષો વચ્ચે ઉગ્ર દલીલો થયા બાદ મામલો લાકડીઓ અને પથ્થરમારા સુધી પહોંચ્યો હતો. હુમાયુ કબીરના કાફલા પર પથ્થરમારો કરવામાં આવ્યો હતો, જેમાં અનેક વાહનોના કાચ ફૂટી ગયા હતા. આરોપ છે કે TMC કાર્યકર્તાઓએ કબીરની કાર અને તેમના સમર્થકોના વાહનોમાં તોડફોડ કરી છે. હિંસાના ડરથી બૂથ પર હાજર મતદારોમાં પણ ફફડાટ ફેલાયો હતો.

સુરક્ષા દળો સાથે ધક્કામુક્કી અને સ્ટેટ હાઈવે જામ

મુર્શિદાબાદના ભાગીરથપુરમાં સ્થિતિ એટલી હદે વણસી હતી કે સેન્ટ્રલ ફોર્સને ભીડ વિખેરવા માટે મેદાનમાં ઉતરવું પડ્યું હતું. આ દરમિયાન સુરક્ષાકર્મીઓ સાથે પણ ધક્કામુક્કી થઈ હતી. અત્યારે હુમાયુ કબીર અને TMC બ્લોક પ્રમુખ શફીઉજ્જમાં શેખ બંને પોતપોતાના સમર્થકો સાથે અમતાલા-બહેરામપુર સ્ટેટ હાઈવે પર ચક્કાજામ કરી રહ્યા છે.

#WATCH | West Bengal Elections 2026 | Visuals of the violence in Murshidabad as a clash broke out between TMC and Aam Janata Unnayan Party (AUJP) party workers.

Stones are also being pelted at each other. Police and central security forces try to control the situation. pic.twitter.com/ScMeW1gSNJ

— ANI (@ANI) April 23, 2026

રાત્રે બોમ્બ વિસ્ફોટ બાદ હિંસા વધી

વાસ્તવમાં, ગત રાત્રે નાઓદા વિસ્તારમાં બોમ્બ વિસ્ફોટ થયો હતો, જેના કારણે વિસ્તારમાં તણાવ હતો. આજે જ્યારે હુમાયુ કબીર પ્રભાવિત બૂથ પર પહોંચ્યા ત્યારે મામલો ફરી ગરમાયો હતો. કબીરે આરોપ લગાવ્યો છે કે TMC સમર્થકોએ પોલીસના બેગ પણ છીનવી લીધા હતા અને ગુંડાગીરી આચરી રહ્યા છે.

અન્ય સ્થળોએ પણ હિંસાના અહેવાલ

માત્ર મુર્શિદાબાદ જ નહીં, સિલીગુડીમાં ભાજપના ઉમેદવાર શંકર ઘોષ અને TMC કાર્યકર્તાઓ વચ્ચે ઘર્ષણ થયું છે. આસનસોલમાં ભાજપના ઉમેદવાર અગ્નિમિત્રા પોલને પોલીસ દ્વારા રોકવામાં આવતા તીખી દલીલો થઈ હતી. બંગાળમાં ભારે સુરક્ષા બંદોબસ્ત હોવા છતાં પ્રથમ તબક્કાનું મતદાન હિંસાના છાયા હેઠળ ચાલી રહ્યું છે.

જૂના પંખામાં પૈસા નાખતા પહેલા ચેતજો ! જાણો ક્યારે રિપેરિંગ કરાવવો અને ક્યારે નવો ખરીદવો