MORBI : મોરબીના ઝીંઝુડા ગામેથી પકડાયેલા 600 કરોડના હેરોઈન કેસમાં ATSની તપાસમાં ચોંકાવનારા ઘટસ્ફોટ થઈ રહ્યાં છે. ડ્રગ્સનો જથ્થો આફ્રિકા લઈને જઈ રહેલા આરોપીઓની મધદરિયે દાનત બગડી. જેથી ડ્રગ્સ માફિયાઓ હેરોઈનનો જથ્થો ગુજરાત લાવ્યા હતાં. ગુજરાતમાં હેરોઈનના ગ્રાહકો શોધવા જતા આરોપીઓ ઝડપાઈ ગયા છે.આ ડ્રગ્સ તસ્કરોને આવતીકાલે મોરબી કોર્ટમાં રજૂ કરવામાં આવશે. ગુજરાત ATSએ કરોડોના ડ્રગ્સ કેસમાં ફરાર અન્ય આરોપીઓની શોધખોળ હાથ ધરી છે.
રાજ્યમાં દેવભૂમિદ્વારકા બાદ મોરબીના ઝીંઝુડા ગામેથી કરોડો રૂપિયાનું ડ્રગ્સ ઝડપાયું છે..મોરબીના ઝીંઝુડા ગામમાં ATSએ મોટું ઓપરેશન પાર પાડ્યું છે.ATSએ પાકિસ્તાનથી મગાવાયેલા 120 કિલો હેરોઈનના જથ્થા સાથે 3 શખ્સોને ઝડપી પાડ્યા છે, જેની કિંમત 600 કરોડથી વધુ અંદાજવામાં આવી રહી છે.
મળતી માહિતી પ્રમાણે, ઝીંઝુડાના કોઠાવાડા પીરની દરગાહની બાજુના મકાનમાં ડ્રગ્સ છૂપાવ્યું હતું. જ્યાં ATSની ટીમે રવિવારની રાત્રે બે મકાનમાં દરોડા પાડ્યા હતા.જ્યાંથી ડ્રગ્સ ઝડપાયું છે. આ કેસમાં સંડોવાયેલા શખ્સોની ધરપકડ કરવામાં આવી છે. તેમાં ગુલાબ હુસૈન, શમસુદ્દીન, મુખ્તાર હુસેન ઉર્ફે જબ્બારનો સમાવેશ થાય છે.જેમાં ગુલાબ હુસૈન જામનગરના સલાયાનો રહેવાસી છે અને મુખ્તાર જબ્બાર જામનગરના જોડિયાનો રહેવાસી છે.