સુરત: ક્રિસમસની ડિમાન્ડ નીકળતા હીરાઉદ્યોગને મળવા લાગ્યા ઓર્ડર, દિવાળી વેકેશન 5 દિવસનું રાખવા નિર્ણય

ક્રિસમસ પહેલા યુએસ, યુકે, ઓસ્ટ્રેલિયા અને અન્ય વેસ્ટ એશિયન દેશોમાં પોલિશડ ડાયમંડની ડિમાન્ડ વધતા સુરત હીરાઉદ્યોગમાં આશાનું કિરણ દેખાઈ રહ્યું છે. જેથી સુરત હીરાઉદ્યોગ દ્વારા આ વર્ષે દિવાળીમાં સૌથી ઓછા પાંચ દિવસનું જ વેકેશન રાખવામાં આવનાર છે. દિવાળી વેકેશન ઓછું કરવા પાછળનું કારણ એ પણ છે કે આ વર્ષે કોરોના મહામારીને કારણે અને મળેલા ઓર્ડરને પહોંચી વળવા પહેલાથી જ સુરતના ડાયમંડ યુનિટો કોરોના ગાઈડલાઈન પ્રમાણે 60% ક્ષમતાથી ચાલી રહ્યા છે. ડાયમંડ એસોસિએશનના જણાવ્યા પ્રમાણે સુરત હીરાઉદ્યોગના 80 ટકા ડાયમંડ યુનિટો કાર્યરત થઈ ગયા છે. હાલમાં 7000 યુનિટોમાંથી 6000 જેટલા ડાયમંડ યુનિટો 60% કેપેસિટીથી ચાલી રહ્યા છે. જૂન જુલાઈથી રફ ડાયમંડની નિકાસ થઈ શકી નથી.

પોલિશડ ડાયમંડ જૂનો માલ પૂર્ણ થઈ ગયો છે અને યુનિટોને હાલાકી પડી રહી છે કે ઈન્ટરનેશનલ ફ્લાઈટ બંધ હોવાના કારણે રફ ડાયમંડ પૂરતા નથી મળી રહ્યા. આવી પરિસ્થિતિમાં ડાયમંડ યુનિટોને 20 દિવસનું વેકેશન પોષાય તેમ નથી. જેથી માત્ર પાંચ દિવસનું વેકેશન લઈને ક્રિસમસ માટે નીકળેલી ડિમાન્ડને પહોંચી વળવા સુરત હીરાઉદ્યોગ તૈયારી કરી રહ્યું છે. ઈન્ટરનેશનલ ડાયમંડ માર્કેટમાં હાલ ક્રિસમસને લઈને સુધારો થઈ રહ્યો છે. હાલ નિકાસ પણ કોરોના પહેલા જે સ્તરે હતી તે સ્તરે પહોંચી રહી છે. ડાયમંડ યુનિટોને રોજ 10થી 15 કલાક કામ કરવું પડે તેટલી સારી ડિમાન્ડ પણ દેખાઈ રહી છે.

રોચક VIDEO જોવા માટે TV9Gujaratiના YOUTUBE પેજને SUBSCRIBE કરો