રશિયા સાથે આર્થિક સંબંધો પર વિદેશ મંત્રાલયનું નિવેદન, કહ્યું- અમે રશિયા સાથે આર્થિક સંબંધો સ્થાપિત કર્યા છે, રાજકીય રંગ આપવાની જરૂર નહી

વિદેશ મંત્રીએ લોકસભામાં કહ્યું કે સરકાર રશિયા સાથે આર્થિક વ્યવહારોને સ્થિર કરવા માટે કામ કરી રહી છે. રશિયા ભારતનું મહત્વપૂર્ણ આર્થિક ભાગીદાર છે. રશિયા ભારતનું સૌથી મોટું ડિફેન્સ હાર્ડવેર પ્રોવાઈડર છે. આ સાથે સત્તાવાર સૂત્રોએ અગાઉ જણાવ્યું હતું કે ભારત સરકાર રૂપિયા-રુબલ ટ્રેડિંગ સિસ્ટમ સ્થાપિત કરવા વિચારી રહી છે.

યુએસ પ્રશાસને ભારતને રશિયા સાથે જોડાણ કરવા સામે ચેતવણી આપી છે

રશિયા પર ભારતના વલણથી અમેરિકા ખૂબ જ નિરાશ છે. વારંવારના દબાણ છતાં ભારતે જ્યારે રશિયા અંગે તટસ્થ વલણ ન બદલ્યું ત્યારે અમેરિકા હવે ધમકી પર ઉતરી આવ્યું છે. અમેરિકાનું કહેવું છે કે જો ભારત રશિયા સાથે ગઠબંધન કરશે તો ભારે કિંમત ચૂકવવી પડશે. એક અહેવાલ અનુસાર, રાષ્ટ્રપતિ જો બાઈડનના ટોચના આર્થિક સલાહકાર બ્રાયન ડીજે કહ્યું છે કે, અમેરિકી પ્રશાસને ભારતને રશિયા સાથે જોડાણ કરવા સામે ચેતવણી આપી છે. તેમણે કહ્યું કે યુક્રેન-રશિયા યુદ્ધ પર ભારતની કેટલીક પ્રતિક્રિયાઓથી અમેરિકા નિરાશ છે.

તેમણે બુધવારે આંતરરાષ્ટ્રીય સમાચાર વેબસાઇટ ક્રિશ્ચિયન સાયન્સ મોનિટર દ્વારા આયોજિત એક કાર્યક્રમમાં પત્રકારોને જણાવ્યું હતું કે, “યુદ્ધના સંદર્ભમાં ઘણા પ્રસંગો આવ્યા છે જ્યાં અમે ચીન અને ભારત બંનેના નિર્ણયોથી નિરાશ થયા છીએ.” તેમણે કહ્યું કે અમેરિકાએ ભારતને કહ્યું છે કે જો ભારત રશિયા સાથે તેની વ્યૂહાત્મક ભાગીદારીને વધુ વધારશે તો ભારતે તેના લાંબા ગાળાના પરિણામો ભોગવવા પડશે.