PM નરેન્દ્ર મોદી પહેરે છે એક ખાસ પ્રકારની દેશી ઘડિયાળ, જેમા જડેલો છે એક ખાસ સિક્કો- જાણો ઘડિયાળની કિંમત કેટલી છે?

વડાપ્રધાન નરેન્દ્ર મોદીની એક ખાસ ઘડિયાળ આજકાલ ચર્ચામાં છે. આ ઘડિયાળની ખાસિયત એ છે કે તેના ડાયલમાં 1947નો એક દુર્લભ એક રૂપિયાનો સિક્કો જડાયેલો છે. જયપુર વોચ કંપની દ્વારા બનાવવામાં આવેલી, આ ઘડિયાળની કિંમત ₹55000 થી ₹60000 ની વચ્ચે હોવાનો અંદાજ છે. આ ઘડિયાળનું નામ “રોમન ટાઇગર” છે, જે ભારતની સ્વતંત્રતા અને “મેક ઇન ઇન્ડિયા” પહેલનું પ્રતીક છે. PM મોદીએ દેશમાં બનેલા ઉત્પાદનોને અપનાવવા માટે સતત પ્રોત્સાહિત કરી રહ્યા છે. તેઓ દેશવાસીઓને “વોકલ ફોર લોકલ” બનવા માટે અવારનવાર આહ્વાન કરતા રહે છે. આનો અર્થ એ છે કે સ્થાનિક રીતે ઉત્પાદિત ઉત્પાદનોને પ્રાથમિકતા આપવી અને તેમના વિશે ખુલ્લેઆમ વાત કરવી. આત્મનિર્ભર ભારત માટે આ જરૂરી છે.

પ્રધાનમંત્રી મોદી ઘણીવાર તેમની વિશિષ્ટ શૈલી માટે જાણીતા છે. આ ઘડિયાળ તેમના સ્ટાઇલ સ્ટેટમેન્ટનો એક ભાગ છે. PM મોદીનો પોશાક હંમેશા ભારતીયતાને પ્રતિબિંબિત કરે છે. તેઓ તેના દ્વારા એક ખાસ સંદેશ પણ આપે છે. તાજેતરમાં, તેઓએ ખૂબ જ અનોખી ઘડિયાળ પહેરેલી જોવા મળી, જે બાદ આ ઘડિયાળ આકર્ષણનું કેન્દ્ર બની છે.

આ ઘડિયાળમાં શું ખાસ છે?

આ ઘડિયાળની સૌથી આકર્ષક વિશેષતા એ છે કે તેના ડાયલમાં દુર્લભ ગણાતો 1947નો એક રૂપિયાનો સિક્કો જડાયેલો છે. જયપુર વોચ કંપની દ્વારા બનાવવામાં આવેલ, આ 43 મીમી સ્ટેનલેસ સ્ટીલ ઘડિયાળ છે જેમાં જાપાનીઝ મિયોટા મુવમેન્ટ છે. આ ઘડિયાળનું નામ “રોમન ટાઇગર” છે, જેના પર એક ચાલતા વાઘની તસવીર અંકિત છે. જે ભારતની આઝાદીની યાત્રા અને દેશની “મેક ઇન ઇન્ડિયા” પહેલથી પ્રેરિત છે.

ઘડિયાળના વર્ણન મુજબ, “આ એક રૂપિયાનો સિક્કો ખૂબ જ ખાસ છે કારણ કે તે બ્રિટિશ શાસન હેઠળ બનાવવામાં આવેલ છેલ્લો સિક્કો હતો. તે ફક્ત 1946 (બીજા ભાગમાં) અને 1947માં જ બનાવવામાં આવ્યો હતો.” આ જ બાબત આ ઘડિયાળને ઐતિહાસિક બનાવે છે.

ઘડિયાળ ચાર અલગ અલગ પ્રકારોમાં ઉપલબ્ધ છે. તે ગોલ્ડન અને સિલ્વરના રંગમાં ઉપલબ્ધ છે. તેમાં રોમન અને દેવનાગરી અંકોના વિકલ્પો પણ છે. આ ઘડિયાળમાં નીલમ સ્ફટિકનો ઉપયોગ કરાયો છે. તેની અંદર એક એન્ટી રિફ્લેક્ટીંગ કોટીંગ લાગેલુ છે. તેની પાછળની તરફ અંદરના ઘટકો જોઈ શકાય છે. આ ઘડિયાળ 5 ATM સુધી વોટર રેજિસ્ટેંટ છે. એટલે કે પાણીના છાંટા કે તેના પર થોડુ પાણી પડે તો તુરંત ખરાબ નથી થતી.

હાર્પર્સ બજાર ઇન્ડિયા અનુસાર, સપ્ટેમ્બર અને નવેમ્બર વચ્ચે અનેક મોટા કાર્યક્રમોમાં વડાપ્રધાન મોદી આ ઘડિયાળ પહેરેલા જોવા મળ્યા હતા.

પીએમ મોદીએ ઘડિયાળ પહેર્યા પછી ચર્ચા

જયપુર વોચ કંપનીના સ્થાપક ગૌરવ મહેતાએ જણાવ્યું હતું કે વડાપ્રધાન દ્વારા આ ઘડિયાળ પહેરવાથી સોશિયલ મીડિયા પર આ પ્રોડક્ટને લઈને ઘણી ચર્ચા શરૂ થઈ છે. મહેતાએ કહ્યું, “જ્યારે સ્વદેશીની ભાવના ફરી વધી રહી છે, ત્યારે વડાપ્રધાન નરેન્દ્ર મોદીને જયપુર વોચ કંપની દ્વારા બનાવેલી સ્વદેશી ઘડિયાળ પસંદ કરતા જોઈને એક એવી લહેર ઉભી થઈ છે જેની આપણામાંથી કોઈએ અપેક્ષા નહોતી રાખી.” તેમણે વધુમાં કહ્યું, “વર્ષોથી, ભારતીય લક્ઝરીને એક મિથક માનવામાં આવતી હતી. આજે, તે ચર્ચાનો વિષય છે. ખૂબ જ ટૂંક સમયમાં, તે એક દંતકથા બની જશે.”

પીએમ મોદીએ આ ઘડિયાળ કેમ પસંદ કરી?

અગાઉ, અમિતાભ બચ્ચન અને એડ શીરન જેવા સેલિબ્રિટી મહેતાની કંપની દ્વારા બનાવેલી ઘડિયાળો પહેરેલા જોવા મળ્યા છે. આ દર્શાવે છે કે જયપુર વોચ કંપની ભારતીય કારીગરી અને આધુનિક ડિઝાઇનનું સંપૂર્ણ મિશ્રણ પ્રદાન કરે છે. વડાપ્રધાન મોદી દ્વારા આ ઘડિયાળની પસંદગી ‘મેક ઇન ઇન્ડિયા’ પહેલને પ્રોત્સાહન આપવા અને ભારતીય ઉત્પાદનોમાં ગર્વ લેવાનો મજબૂત સંદેશ આપે છે. આ ઘડિયાળ માત્ર એક ઘડિયાળ જ નથી, પરંતુ ભારતના સ્વતંત્રતા ઇતિહાસ અને દેશની આત્મનિર્ભરતાની ભાવનાનું પ્રતીક પણ છે.

માનવજાતિની સૌથી શક્તિશાળી એવી પેટ્રોલ-ડીઝલની શોધ કેવી રીતે કરવામાં આવી? એ પહેલા લોકો શું કરતા હતા?