સરકાર ચાલુ નાણાકીય વર્ષ 2021-22માં ટેક્સ વસૂલાતના લક્ષ્યાંકને વટાવી જશે. મહેસૂલ સચિવ તરુણ બજાજે (Revenue Secretary Tarun Bajaj) આ આશા વ્યક્ત કરી છે. ચાલુ નાણાકીય વર્ષમાં ઓક્ટોબર સુધી સરકારનું ડાયરેક્ટ ટેક્સ કલેક્શન 6 લાખ કરોડ રૂપિયા રહ્યું છે. તે જ સમયે નાણાકીય વર્ષ દરમિયાન દર મહિને સરેરાશ ગુડ્સ એન્ડ સર્વિસ ટેક્સ (GST) કલેક્શન આશરે 1.15 લાખ કરોડ રૂપિયા છે.
બજાજે કહ્યું કે સરકારનું ટેક્સ કલેક્શન ચાલુ નાણાકીય વર્ષના બજેટ અંદાજ કરતાં વધુ હશે. તેમણે કહ્યું કે પેટ્રોલ અને ડીઝલ પર એક્સાઈઝ ડ્યુટીમાં ઘટાડો અને ખાદ્યતેલ પરની કસ્ટમ ડ્યુટીમાં ઘટાડાથી ચાલુ નાણાકીય વર્ષમાં લગભગ 80,000 કરોડ રૂપિયાનું નુકસાન થશે. બજાજે જણાવ્યું હતું કે મહેસૂલ વિભાગ ડિસેમ્બરના એડવાન્સ ટેક્સના આંકડા બહાર આવ્યા પછી બજેટ અંદાજની સરખામણીમાં ટેક્સ કલેક્શનની ગણતરી શરૂ કરશે.
તેમણે કહ્યું કે “રિફંડ પછી પણ ઓક્ટોબર સુધી અમારું ટેક્સ કલેક્શન લગભગ 6 લાખ કરોડ રૂપિયા સુધી પહોંચી ગયું છે. આ સારું દેખાઈ રહ્યું છે. આશા છે કે અમે બજેટ અંદાજને પાર કરી જઈશું.” બજાજે કહ્યું, “જોકે, અમે પેટ્રોલ, ડીઝલ અને ખાદ્ય તેલ પરના પરોક્ષ કરમાં નોંધપાત્ર રાહત આપી છે. આ નફો 75,000થી 80,000 કરોડ રૂપિયાની આસપાસ છે. આમ છતાં મને આશા છે કે અમે પ્રત્યક્ષ અને પરોક્ષ કર બંનેમાં બજેટ અંદાજ કરતાં વધી જઈશું.
સરકારે ચાલુ નાણાકીય વર્ષમાં 22.2 લાખ કરોડ રૂપિયાનો ટેક્સ કલેક્શનનો અંદાજ મૂક્યો છે. અગાઉના નાણાકીય વર્ષની સરખામણીમાં આમાં 9.5 ટકાનો વધારો થયો છે. 2020-21માં ટેક્સ કલેક્શન 20.2 લાખ કરોડ રૂપિયા હતું. કુલ કર સંગ્રહમાં પ્રત્યક્ષ કરનો હિસ્સો 11 લાખ કરોડ રૂપિયા હોવાનો અંદાજ છે. જેમાં 5.47 લાખ કરોડ રૂપિયા કોર્પોરેટ ટેક્સ અને 5.61 લાખ કરોડ રૂપિયાનો આવકવેરો સામેલ છે.
ગુડ્સ એન્ડ સર્વિસ ટેક્સ અંગે બજાજે કહ્યું કે નવેમ્બરનું કલેક્શન સારું રહ્યું છે, પરંતુ ડિસેમ્બરનો આંકડો થોડો ઓછો રહેશે. માર્ચ ક્વાર્ટરમાં GST કલેક્શન ફરી વધશે. બજાજે કહ્યું, “GST કલેક્શન સારું છે. ઓક્ટોબરમાં અમે 1.30 લાખ કરોડ રૂપિયાનો આંકડો પાર કર્યો હતો. આ મહિને પણ દિવાળીના કારણે અમારી સંખ્યા સારી રહેશે.” તેમણે કહ્યું કે GST કલેક્શનનો ‘રન રેટ’ 1.15 લાખ કરોડ રૂપિયાથી નીચે નહીં જાય.
ચાલુ નાણાકીય વર્ષમાં કસ્ટમ ડ્યુટી વસૂલાતનો લક્ષ્યાંક 1.36 લાખ કરોડ રૂપિયા અને એક્સાઈઝ ડ્યુટી વસૂલાતનો લક્ષ્યાંક 3.35 લાખ કરોડ રૂપિયા છે. આ સિવાય કેન્દ્રની GST આવક (વળતર સેસ સહિત) 6.30 લાખ કરોડ રૂપિયા રહેવાનું અનુમાન છે.
આ પણ વાંચો : આંતરરાષ્ટ્રીય ફ્લાઈટ પર લાગેલા પ્રતિબંધના કારણે કથળી રહી રહી છે એરલાઈન્સ કંપનીઓની નાણાકીય સ્થિતિ