ઘણા સમયથી ચર્ચા થઈ રહી છે કે એલોન મસ્ક ભારતમાં ટેસ્લાને (Tesla in India) લોન્ચ કરશે. જો કે સરકાર દ્વારા કેટલીક શરતો મૂકવામાં આવી છે, જેને એલન મસ્ક (Elon Musk) પૂરી કરવા માગતા નથી. ભારતમાં ટેસ્લાના લોન્ચિંગ અંગે મસ્કે શુક્રવારે ટ્વીટર પર જણાવ્યું હતું કે ટેસ્લા કોઈપણ દેશમાં મેન્યુફેક્ચરિંગ પ્લાન્ટ સ્થાપશે નહીં, જ્યાં સુધી તેને પહેલા વેચાણ માટે અને સર્વિસ સેન્ટર ખોલવાની મંજૂરી આપવામાં ન આવે. ઓલા ઈલેક્ટ્રીકના ભાવિશ અગ્રવાલે મસ્કના ટ્વીટનો યોગ્ય જવાબ આપ્યો છે. ટ્વીટનો જવાબ આપતા તેમણે લખ્યું, “Thanks, but no thanks!”. ભારતમાં એલોન મસ્કની ઈલેક્ટ્રિક વાહન કંપનીની એન્ટ્રીની ચર્ચા વર્ષ 2019થી થઈ રહી છે.
ઈલેક્ટ્રિક વાહનની આયાતની વાત કરીએ તો જો કોઈ વાહનની કિંમત 40 હજાર ડોલર એટલે કે 30 લાખથી ઓછી હોય તો તે કારને વિદેશથી આયાત કરવા પર 60 ટકા ઈમ્પોર્ટ ડ્યુટી લાગે છે. જો કારની કિંમત 40 હજાર ડોલરથી વધુ છે તો 100 ટકા ઈમ્પોર્ટ ડ્યુટી લાદવામાં આવે છે.
Thanks, but no thanks! 🙂🇮🇳 https://t.co/yeO4qI2gg2
— Bhavish Aggarwal (@bhash) May 28, 2022
એશિયાની વાત કરીએ તો ચીનના શાંઘાઈ શહેરમાં ટેસ્લાનું મેન્યુફેક્ચરિંગ યુનિટ છે. મસ્ક ઈચ્છે છે કે ભારત સરકાર ચીનમાંથી ટેસ્લા કાર આયાત કરીને તેને બજારમાં વેચવાની છૂટ આપે. ભવિષ્યમાં, તે મેન્યુફેક્ચરિંગ યુનિટ સ્થાપવાનું વિચારશે. સરકાર આ વાતની તરફેણમાં નથી. ઈકોનોમિક ટાઈમ્સના રિપોર્ટ અનુસાર, ટેસ્લા એશિયાનું બીજું મેન્યુફેક્ચરિંગ યુનિટ ભારતમાં નહીં પણ ઈન્ડોનેશિયામાં સ્થાપવા પર વિચાર કરી રહી છે.
સરકાર પાસે ઈલેક્ટ્રિક વાહનોને લઈને મહત્વકાંક્ષી યોજના છે. આવી સ્થિતિમાં ટેસ્લા એક મહત્વપૂર્ણ બ્રાન્ડ બની જાય છે, જેની ઓળખ વૈશ્વિક છે. ઈલેક્ટ્રિક વાહનોને પ્રોત્સાહન આપવા માટે સરકાર મેન્યુફેક્ચરિંગ સાથે જોડાયેલી ઘણી યોજનાઓ ચલાવી રહી છે. આ સિવાય ઈલેક્ટ્રિક કાર ખરીદનારાઓને ઘણા પ્રકારનું ડિસ્કાઉન્ટ પણ આપવામાં આવી રહ્યું છે. આમાં 10 હજાર કરોડની FAME-2 સ્કીમ પણ છે. આ સિવાય 18 હજાર કરોડની પ્રોડક્શન લિન્ક્ડ ઈન્સેન્ટિવ સ્કીમ છે, જેનો ફાયદો ઉત્પાદકોને થાય છે. સરકારને આશા હતી કે ટેસ્લા PLI સ્કીમમાં જોડાશે, પરંતુ તેમ થયું નહીં.
પરિવહન મંત્રી નીતિન ગડકરીએ સ્પષ્ટ કહ્યું છે કે ટેસ્લાને ચીનમાં ઉત્પાદિત કાર લાવવા અને તેને ભારતીય બજારમાં વેચવાની મંજૂરી આપવામાં આવશે નહીં. જો કંપની ભારતમાં મેન્યુફેક્ચરિંગ પ્લાન્ટ લગાવે છે તો તેને ઘણા ફાયદા થશે. હાલમાં, શાંઘાઈમાં ટેસ્લાની ગીગા ફેક્ટરી ભારતની સૌથી નજીક છે.