Byju’sની વધી મુશ્કેલી, કંપનીના માલિકે કર્મચારીઓના પગાર ચૂકાવવા ગીરવે મૂક્યું પોતાનું ઘર

આર્થિક સંકટનો સામનો કરી રહેલી એજ્યુટેક કંપની Byju’sની મુશ્કેલીઓ વધી છે. Byju’sના કર્મચારીઓને પગાર મળવામાં વિલંબ થયો છે. આ વિલંબ વચ્ચે કર્મચારીઓ માટે સારા સમાચાર છે કે Byju’sના ફાઉન્ડર રવિન્દ્રને પોતાનું ઘર ગીરવે મૂકીને પૈસા ભેગા કર્યા છે. બ્લૂમબર્ગના અહેવાલ મુજબ, બાયજુ રવિન્દ્રને કર્મચારીઓને પગાર ચૂકવવા માટે પરિવારના અન્ય સભ્યોની માલિકીનું ઘર પણ ગીરવે મૂક્યું છે.

એક સમયે 5 બિલિયન ડોલર હતી નેટવર્થ

રવીન્દ્રન બાયજુનો પરિવાર બેંગલુરુમાં બે ઘર ધરાવે છે. આ સિવાય તેમનો એક વિલા ગેટેડ સોસાયટી ‘એપ્સીલોન’માં નિર્માણાધીન છે. તેમણે 1.2 કરોડ ડોલર (લગભગ રૂ. 100 કરોડ) ઉધાર લેવા માટે તેમની મિલકત ગીરવે મૂકી છે. બાયજુએ તેમની મૂળ કંપની થિંક એન્ડ લર્ન પ્રા.લિમિટેડના 15,000 કર્મચારીઓને પગાર ચૂકવવાનો છે.

એક સમયે બાયજુ રવીન્દ્રનની નેટવર્થ 5 બિલિયન ડૉલર (લગભગ 41,715 કરોડ રૂપિયા) હતી. હવે તેમણે 40 કરોડ ડોલરની પર્સનલ લોન લીધી છે. તેમણે કંપનીમાં તેમના તમામ શેર પણ ગીરવે મૂક્યા છે.

કોઈ પણ ભોગે કંપનીને બચાવવાનો પ્રયાસ

બાયજુનો કેશફ્લો સંપૂર્ણપણે હચમચી ગયો છે. કંપનીએ સ્ટાફની છટણીથી માંડીને નવેસરથી ભંડોળ ઊભું કરવાનો પ્રયાસ કરવામાં આવી રહ્યો છે. આ સિવાય તે ફોરેન એક્સચેન્જ ટ્રાન્ઝેક્શન એક્ટની કેટલીક જોગવાઈઓના ઉલ્લંઘન માટે EDની તપાસનો સામનો કરી રહી છે. આ મામલો લગભગ 9,000 કરોડ રૂપિયાની ઉચાપતનો છે. આ બધાને કારણે કંપનીનું સંકટ સતત વધી રહ્યું છે.

તેના રોકાણકારોએ પણ બાયજુની કામ કરવાની પદ્ધતિ વિશે ફરિયાદ કરી છે. આ અંગે બોર્ડના ઘણા સભ્યોએ વાંધો વ્યક્ત કર્યો છે. કંપનીએ ઘણા વર્ષોથી તેના પુસ્તકોનું ઓડિટ કરાવ્યું નથી. હાલમાં, નાણાકીય વર્ષ 2023-24 ચાલી રહ્યું છે, જ્યારે કંપનીએ 2020-21 માટે ફાઇનાન્સિયલ સ્ટેટમેન્ટ પણ તૈયાર કર્યા નથી. કંપનીના સ્થાપકો કોઈને કોઈ રીતે કંપનીને ચાલુ રાખવાનો પ્રયાસ કરી રહ્યા છે.

અનેક વિવાદોમાં સંકળાયેલી છે કંપની

તાજેતરમાં એક રેટિંગ એજન્સીએ બાયજુના મૂલ્યાંકનમાં ઘટાડો કર્યો છે. તો EDએ બાયજુ અને રવિન્દ્રનને રૂ. 9,362.35 કરોડની રકમના ફોરેન એક્સચેન્જ મેનેજમેન્ટ એક્ટ (FEMA)ના ઉલ્લંઘન માટે કારણ બતાવો નોટિસ જારી કરી હતી. આ ઉપરાંત તેને ભારતીય ક્રિકેટ કંટ્રોલ બોર્ડ (BCCI) દ્વારા પણ બેંગલુરુમાં નેશનલ કંપની લો ટ્રિબ્યુનલ (NCLT)માં નાદારીની અરજી દાખલ કરી છે. આ મામલાની સુનાવણી 22 ડિસેમ્બરે થવાની છે.