Ambani Family : ઈશા અંબાણીથી લઈને અનંત અંબાણી કેવી રીતે કમાય છે કરોડો રૂપિયા ? જાણી લો

દેશના સૌથી મોટા અને પ્રભાવશાળી બિઝનેસ પરિવારોમાંનો એક અંબાણી પરિવાર ફરી એકવાર ચર્ચામાં છે. ખાસ વાત એ છે કે મુકેશ અંબાણીથી લઈને ઈશા અંબાણી, આકાશ અંબાણી અને અનંત અંબાણી સુધી કોઈ પણ વ્યક્તિ રિલાયન્સ ઇન્ડસ્ટ્રીઝ તરફથી નિયમિત પગાર લેતી નથી. છતાં તેમની કમાણી કરોડો રૂપિયામાં થાય છે. રિલાયન્સ ઇન્ડસ્ટ્રીઝના તાજેતરના વાર્ષિક અહેવાલમાં આ અંગે મહત્વપૂર્ણ માહિતી સામે આવી છે.

રિપોર્ટ મુજબ, મુકેશ અંબાણીએ સતત છઠ્ઠા વર્ષે પણ કંપનીમાંથી કોઈ પગાર લીધો નથી. બીજી તરફ, ઈશા અંબાણી, આકાશ અંબાણી અને અનંત અંબાણીને પણ કંપની તરફથી કોઈ ફિક્સ માસિક કે વાર્ષિક સેલરી મળતી નથી. તેમ છતાં અંબાણી પરિવારની સંપત્તિ સતત વધી રહી છે.

અંબાણી પરિવારની નવી પેઢી હવે રિલાયન્સના બિઝનેસમાં મહત્વપૂર્ણ જવાબદારીઓ સંભાળી રહી છે. ઓક્ટોબર 2023માં ઈશા અંબાણી, આકાશ અંબાણી અને અનંત અંબાણીને કંપનીના બોર્ડ ઓફ ડિરેક્ટર્સમાં સામેલ કરવામાં આવ્યા હતા. ત્યારથી તેઓ કંપનીના વિવિધ નિર્ણયો અને વ્યવસાયિક કામગીરીમાં સક્રિય ભૂમિકા ભજવી રહ્યા છે.

5 લાખ રૂપિયાની મીટિંગ ફી

કંપનીના વાર્ષિક અહેવાલ અનુસાર, ઈશા અંબાણી અને આકાશ અંબાણીને બોર્ડ મીટિંગમાં હાજરી આપવા બદલ દરેકને 5 લાખ રૂપિયાની મીટિંગ ફી આપવામાં આવી હતી. આ ઉપરાંત બંનેને 2.5 કરોડ રૂપિયાનું કમિશન પણ ચૂકવવામાં આવ્યું હતું. અનંત અંબાણીને પણ તેમની જવાબદારીઓ અનુસાર નાણાકીય લાભ મળતો હોવાનું જણાવાયું છે.

હકીકતમાં અંબાણી પરિવારની સૌથી મોટી આવકનો સ્ત્રોત રિલાયન્સ ઇન્ડસ્ટ્રીઝમાં તેમની મોટી શેરહોલ્ડિંગ છે. જ્યારે પણ કંપની તેના શેરહોલ્ડર્સને ડિવિડન્ડ જાહેર કરે છે, ત્યારે અંબાણી પરિવારને કરોડો રૂપિયાની આવક થાય છે. ઉપરાંત, રિલાયન્સના શેરના ભાવમાં વધારો થવાથી તેમની કુલ સંપત્તિમાં પણ સતત વધારો થાય છે.

કમાણીનો મોટો ભાગ રોકાણ, શેરહોલ્ડિંગ અને ડિવિડન્ડ

આ જ કારણ છે કે ફિક્સ પગાર વિના પણ અંબાણી પરિવાર દેશના સૌથી ધનિક પરિવારોમાં સામેલ છે. તેમની કમાણીનો મોટો ભાગ રોકાણ, શેરહોલ્ડિંગ અને ડિવિડન્ડ આધારિત આવકમાંથી આવે છે.

રિલાયન્સ ઇન્ડસ્ટ્રીઝે તેના વાર્ષિક અહેવાલમાં વૈશ્વિક બજાર અંગે કેટલીક ચિંતાઓ પણ વ્યક્ત કરી છે. કંપનીએ જણાવ્યું છે કે ક્રૂડ ઓઇલના વધતા ભાવ, વૈશ્વિક આર્થિક મંદી અને મધ્ય પૂર્વમાં વધી રહેલા તણાવના કારણે આગામી સમયમાં વૈશ્વિક તેલની માંગ પર અસર પડી શકે છે. તેમ છતાં કંપની ઊર્જા અને મટિરિયલ્સ ક્ષેત્રમાં લાંબા ગાળાની તકો પર ફોકસ કરી રહી છે.

ગુજરાતી બિઝનેસમેન મુકેશ અંબાણી કેટલી જગ્યાએથી કમાણી કરે છે? 6 વર્ષથી નથી લીધો પગાર, જાણો