ગુજરાત ઈલેક્શન 2022 : PM મોદીએ સુરત એરપોર્ટથી જનસભા સ્થળ સુધી 27 કીમીનો મેગા રોડ શો યોજ્યો હતો. જેમાં મોટી સંખ્યામાં સમર્થકોએ PM મોદીનું સ્વાગત કર્યું હતું. અને રોડની બંને બાજૂ ઉમટેલી જનમેદનીનું PM મોદીએ અભિવાદન સ્વીકાર્યું હતું. આ રોડ શોમાં PM મોદીના એક ચાહકે પીએમ મોદીની કુલ 7હજાર 980 તસવીરોનો ઉપયોગ કરી સુંદર ફોટોફ્રેમ તૈયાર કરી હતી.
મેગા રોડ શો બાદ PM મોદીએ જનસભા સંબોધી હતી. અને કહ્યું કે, સુરતના લોકોએ પહેલાથી જ અમને જીતાડવાની ગેરેંટી આપી છે. હું ચૂંટણીને લઈને નથી આવ્યો, માત્ર તમારા આશિર્વાદ લેવા આવ્યો છું. આપને જણાવી દઈએ કે, વડાપ્રધાન મોદીને આવકારવા સુરતીલાલાઓમાં અનેરો થનગનાટ જોવા મળ્યો હતો. ત્યારે વડાપ્રધાન મોદીના એક ચાહકે તેમની 53×41 ઇંચની વિશાળ તસવીર બનાવી હતી. જેની વિશેષતા એ છે કે પીએમની વિવિધ પ્રકારની કુલ 7 હજાર 980 તસવીરનો ઉપયોગ કરીને આ સુંદર ફોટોફ્રેમ તૈયાર કરવામાં આવી છે.