Weather Update: રાજ્યના વાતાવરણમાં પલટો, વલસાડ, આણંદ અને સાબરકાંઠા જિલ્લામાં વરસાદી ઝાપટા

હાલ રાજ્યમાં બેવડી ઋતુનો અનુભવ થઈ રહ્યો છે. હવામાન વિભાગે દક્ષિણ ગુજરાત (South Gujarat) અને દક્ષિણ સૌરાષ્ટ્રમાં વરસાદ (Rain) પડવાની આગાહી કરી છે. જેમા વલસાડના વાતાવરણમાં પલટો આવ્યો છે. વલસાડ (Valsad) સહિત વાપી, દમણ અને દાદરા નગર હવેલીમાં વાદળછાયુ વાતાવરણ છવાયુ છે. વરસાદી ઝાપટાના પગલે રસ્તાઓ પર વરસાદી પાણી ફરી વળ્યા છે. આ તરફ આણંદના ઉમરેઠ પંથકમાં પણ કડાકા ભડાકા સાથે ધોધમાર વરસાદ વરસ્યો હતો. ઉમરેઠ પંથકમાં બે દિવસથી સતત વરસાદી માહોલ છે. અહીંના સુંદરપુરા, ભાટપરા અને સુરેલી સહિતના ગ્રામ્ય વિસ્તારોમાં પણ વરસાદ વરસ્યો છે.

સાબરકાંઠા, અરવલ્લી, અમદાવાદમાં વરસાદી ઝાપટા

સાબરકાંઠામાં પ્રાંતિજ સહિતના આસપાસના વિસ્તારોમાં વરસાદના અહેવાલ મળ્યા છે. બાલીસણા, ઉંછા, બાકલપુર, મામરોલી, પંથકમાં ધોધમાર વરસાદ પડ્યો છે. આ સમયગાળામાં વરસાદ પડતા ખેડૂતો ચિંતામાં મુકાયા છે. ખાસ કરીને ડાંગર અને મગફળીના પાકમાં વ્યાપક નુકસાન જવાની ભીતિ સેવી રહ્યા છે.

આ તરફ અરવલ્લી જિલ્લામાં પણ ધોધમાર વરસાદ પડવાના અહેવાલ છે. અહીંના મેઘરજ, માલપુર અને ધનસુરામાં ધોધમાર વરસાદ વરસ્યો છે. આ સાથે રઘુનાથપુર, મોરડુંગરી, સોનિકપુર અને ગોવિંદપુર ગામોમાં પણ વરસાદ વરસ્યો છે. મેઘરજના મોટી મોરડી, ઉંડવા અને ભીમાપુરમાં પણ વરસાદ વરસ્યો છે. અહીં ધનસુરા સહિત આસપાસના ગ્રામ્ય વિસ્તારોમાં વરસાદ પડ્યો છે.

આ સાથે અમદાવાદમાં પણ સતત બીજા દિવસે બપોર બાદ ધોધમાર વરસાદ વરસ્યો હોવાના અહેવાલ મળી રહ્યા છે. શહેરના પૂર્વ વિસ્તારમાં ધોધમાર વરસાદ પડ્યો છે. નારોલ આસપાસના વિસ્તારમાં ધોધમાર વરસાદ થતા પાણી ભરાયા છે.