Rajkot: જેતપુર તેમજ ઉપલેટાના ગ્રામ્ય પંથકમાં ભારે વરસાદ, સતત ચોથા દિવસે મેઘમહે યથાવત
રાજકોટ જિલ્લાના જેતપુર અને ગ્રામ્ય પંથકમાં ભારે વરસાદ વરસી રહ્યો છે. શહેરમાં સતત ચોથા દિવસે મેઘમહેર યથાવત જોવા મળી રહિ છે.
Rajkot: રાજકોટ જિલ્લાના જેતપુર અને ગ્રામ્ય પંથકમાં ભારે વરસાદ (Heavy Rain) વરસી રહ્યો છે. શહેરમાં સતત ચોથા દિવસે મેઘમહેર યથાવત જોવા મળી રહિ છે. તેમજ તાલુકાના સાંકળી,પેઢલા,ગામમાં ધોધમાર વરસાદ ખાબક્યો હતો. ધારેશ્વર, જેતલસર, સહિતના ગામોમાં નોંધપાત્ર વરસાદ વરસ્યો હતો. તો બીજી તરફ રાજકોટના ઉપલેટામાં સતત ચોથા દિવસે મેઘરાજાની કૃપા યથાવત્ છે. ઉપલેટામાં સવારથી વરસાદી માહોલ છવાયેલો જોવા મળ્યો હતો. ઉપલેટામાં ધોધમાર વરસાદ વરસતા રસ્તાઓ પર પાણી ફરી વળ્યા હતા. અડધા કલાકમાં જ એક ઈંચ જેટલો વરસાદ વરસતા કેટલાક નીચાણવાળા વિસ્તારોમાં પાણી ભરાયા હતા. ઝકરિયા ચોક, કટલેરી બજાર, અશ્વિની ચોક વિસ્તારમાં પાણી ભરાયા હતા. મહત્વનું છે કે, વાવણીલાયક વરસાદ પડતા ખેડૂતો ખુશખુશાલ થઈ ગયા હતા.
21 તાલુકામાં એકથી અઢી ઈંચ વરસાદ નોંધાયો
સમગ્ર રાજ્યમાં અષાઢી બિજથી મેઘરાજાની મહેર જોવા મળી રહી છે.ક્યાંક ધીમી ધારે તો ક્યાંક ધોધમાર વરસાદ વરસી રહ્યો છે.છેલ્લા 24 કલાકમાં 21 તાલુકામાં મેઘાની જમાવટ જોવા મળી છે.જેમાં મહેસાણાના સતલાસણા તાલુકામાં સૌથી વધુ અઢી ઈંચ વરસાદ,નવસારીમાં બે ઈંચ તો સાબરકાંઠાના વડાલીમાં પોણા બે ઈંચ વરસાદ,તેમજ સુરતના માંડવી અને માંગરોળમાં દોઢ ઈંચ વરસાદ ખાબકતા ઠેર-ઠેર પાણી ભરાયા હતા. તો બીજી તરફ સાબરકાંઠાના વિજયનગર, મહિસાગરના વીરપુરમાં સવા ઈંચ વરસાદ નોંધાયો હતો.
અનેક તાલુકામાં વરસાદી માહોલ
રવિવારે મહેસાણા શહેરના વાતાવરમાં પલટો જોવા મળ્યો હતો. શહેરમાં ધીમીધારે વરસાદ પડ્યો હતો તો વડોદરામાં સયાજીગંજ, ફતેહગંજ, અલકાપુરી, નિઝામપુરા સહિતના વિસ્તારોમાં ધોધમાર વરસાદ વરસ્યો હતો. ભારે વરસાદના પગલે કેટલાક વિસ્તારમાં પાણી ભરાયા હતા. આ તરફ બોરસદમાં પણ વરસાદી માહોલ યથાવત છે.તો દાહોદમાં પણ મેઘરાજા હેત વરસાવી રહ્યા છે.બોરસદ તાલુકાના સીસ્વામાં તબાહી બાદ પણ હજુ પાણી ઓસરવાના નામ નથી લઈ રહ્યા.
