દક્ષિણ ગુજરાત (South Gujarat)માં નોંધપાત્ર વરસાદ નોંધાયો છે. જેમા વલસાડ (Valsad) જિલ્લામાં મેઘરાજા મહેરબાન થયા છે. જિલ્લાના કપરાડા, ધરમપુર, વાપી, પારડી અને ઉમરગામ તાલુકામાં વરસાદ ભારે વરસાદ પડ્યો છે. ઉમરગામમાં સૌથી વધુ સાડા પાંચ ઈંચ વરસાદ (Rain) પડ્યો છે. ભારે વરસાદને પગલે નીચાણવાળા વિસ્તારોમાં પાણી ભરાયા છે. અનેક વિસ્તારો જળમગ્ન બન્યા છે. રોડ પર પણ પાણી ભરાઈ ગયા છે. રસ્તાઓ જાણે બેટમાં ફેરવાઈ ગયા હોય તેવી સ્થિતિ સર્જાઈ છે. રસ્તા પરથી જાણે નદીઓ વહી રહી હોય તેવા દૃશ્યો સામે આવ્યા છે. જિલ્લામાં ભારે વરસાદને પગલે જિલ્લા કલેકટરે આવતીકાલે શાળા-કોલેજોમાં રજા જાહેર કરી છે. જિલ્લામાં ભારે વરસાદની આગાહીને પગલે શાળા કોલેજોમાં રજા જાહેર કરી દેવામાં આવી છે. આ અંગે જિલ્લા કલેક્ટરે ટ્વીટ કરીને માહિતી આપી છે.
હવામાન વિભાગની આગાહી મુજબ દક્ષિણ ગુજરાત અને સૌરાષ્ટ્ર-કચ્છમાં મધ્યમથી ભારે વરસાદની શકયતા છે. દક્ષિણ ગુજરાતના તાપી, વલસાડ, સુરત સહિતના વિસ્તારોમાં વરસાદ પડશે. જયારે મધ્ય ગુજરાત અને ઉત્તર ગુજરાતમાં સામાન્ય વરસાદ પડશે. વરસાદની આગાહીના પગલે એક દિવસ માટે માછીમારોને દરિયો ન ખેડવા સૂચના આપી છે.ઉલ્લેખનીય છે કે, ચોમાસું વિદાય નહીં લે તો નવરાત્રિમાં પણ વરસાદની પડવાની શકયતા છે.
દક્ષિણ ગુજરાતમાં ભારે વરસાદને પગલે ઉકાઈ ડેમમાં 1 લાખ 74 હજાર ક્યુસેક પાણીની આવક થતા 14 દરવાજા 6 ફૂટ ખોલી દેવાયા છે. ઉકાઇ ડેમની જળસપાટી 341.22 ફૂટે પહોંચી છે. ભારે વરસાદને પગલે પંચાયત હસ્તકના 19 રસ્તા બંધ કરાયા છે. જેમાં વ્યારાના 11, ડોલવણના 2 અને સોનગઢના 2 રસ્તા બંધ કરાયા છે. વાંકાનેરનો મચ્છુ 1 ડેમ પણ 135.33 મીટર ભરાયો છે. મચ્છુ 1 ડેમ છલકાવવાથી 0.10 મીટર ભરાઈ ગયો છે. ગુજરાતની જીવાદોરી સમાન નર્મદા ડેમમાં પણ ઉપરવાસથી સારી આવકને પગલે સંપૂર્ણ ભરાયો છે.